كەشە كەشكىلىك وبلىسقا ەلىمىزدىڭ ۇكىمەت باسشىسى كارىم ءماسىموۆ كەلدى. ول وبلىستىق اكىمدىكتە وتكەن اكتيۆ جيىلىسىندا پرەزيدەنتتىڭ ۇسىنىسىنا سايكەس وبلىستىق ءماسليحات دەپۋتاتتارىنىڭ كەلىسىمىمەن قايتادان تاعايىندالعان وبلىس اكىمى باقىتجان ساعىنتاەۆتىڭ الداعى اتقاراتىن قىزمەتىنە تابىس, ساتتىلىك تىلەدى.
باقىتجان ساعىنتاەۆ ءوندىرىستى ءوڭىردى ءۇش جىلداي ۋاقىت باسقارىپ كەلدى. وبلىستاعى يندۋستريالىق-يننوۆاتسيالىق اۋقىمدى باعدارلامالاردىڭ جۇزەگە اسۋىنا ۇلەس قوستى. شالعاي اۋىلدارعا ساندىق تەلەديدار حابارلارى جەتتى. جاڭا مەكتەپتەر, اۋرۋحانالار, بالاباقشالار اشىلدى.
القالى جيىندا باقىتجان ساعىنتاەۆ ءسوز الىپ, وزىنە زور سەنىم بىلدىرگەنى ءۇشىن ەلباسىعا العىسىن ايتتى جانە ەلىمىزدىڭ ەكونوميكالىق الەۋەتىنىڭ ءوسىپ-وركەندەۋىندەگى ءوندىرىستى وبلىستىڭ بۇدان ءارى قاراي دا تابىس بيىگىنەن تۇسپەيتىنىن جەتكىزدى.
جيىن سوڭىندا كارىم ءماسىموۆ قىزمەتىنە قايتا تاعايىندالعان وبلىس اكىمى باقىتجان ساعىنتاەۆقا الداعى ۋاقىتتا دا وسىنداي بيىك بەلەستەردەن كورىنۋىنە تىلەكتەستىك ءبىلدىردى.
فاريدا بىقاي.
پاۆلودار.