2011 جىلعى 8 ءساۋىر – مەنىڭ ومىرىمدەگى ەڭ ماڭىزدى كۇندەردىڭ ءبىرى. جيىرما جاسىمدا تاۋەلسىز ەلىمنىڭ ايبىنىن اسىرىپ, سالتاناتىن تاسىتقان ايتۋلى شاراعا قاتىسىپ, ءوز ۇلەسىمدى قوستىم. جاڭادان سايلانعان ەلباسى – قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتى ۇلىقتاۋ راسىمىندە مەن اقوردا ەسىگى الدىنداعى ءبىزدىڭ تىلىمىزدە «ۆەەر» اتالاتىن قۇرامدا تۇردىم. ءبىز اقوردا باسپالداقتارىندا تۇرىپ, قاس قاقپاي قىزمەت ەتتىك, ياعني ەلباسى شىققان ساتتە تۇرعان سىمباتتى ساربازداردىڭ ءبىرى مەنمىن.
بۇل مەن ءۇشىن ۇلكەن مارتەبە ەكەنىن سوزبەن ايتىپ جەتكىزۋ قيىن. وسىنداي بيىك مىندەتتى اتقارۋعا ءمۇمكىندىك الۋىما مەنىڭ رەسپۋبليكالىق ۇلان سەكىلدى ەليتالىق اسكەري قۇرىلىم قاتارىندا مەرزىمدىك اسكەري قىزمەت اتقارۋىم سەبەپشى بولدى. ءبىزدىڭ جەكە قۇرام ۇلىقتاۋ سالتاناتىنا قىسقا مەرزىم ىشىندە دايىن بولدى. بارلىعىمىز ءبىر كىسىدەي جاۋاپتىلىق, تاباندىلىق تانىتىپ, ساعاتتار بويى ۇزدىكسىز دايىندالدىق. مەن دە, اسكەري بورىشىمىزدى بىرگە اتقارىپ جۇرگەن جولداستارىم دا ەلباسىن ۇلىقتاۋ سالتاناتىنا قاتىسىپ, جوعارى ساپالى ساپتىق دايارلىق كورسەتۋدىڭ قانشالىقتى ماڭىزدى ەكەنىن تۇسىندىك.
اتىراۋ قالاسىندا تۇراتىن مەن وتكەن جىلدىڭ كوكتەمىندە وتان الدىنداعى بورىشىمدى اتقارۋ ءۇشىن اسكەر قاتارىنا شاقىرىلدىم. باعىما قاراي, رەسپۋبليكالىق ۇلانعا ىرىكتەۋدەن سۇرىنبەي ءوتىپ, پرەزيدەنتكە تىكەلەي باعىناتىن وسىناۋ قۇرىلىمعا تاڭدالىپ الىندىم. مۇنى وزىمە جاقسى تاربيە بەرىپ, جاۋاپتى ازامات ەتىپ وسىرگەن اتا-انام ىلەس ەرجانوۆ پەن عاليا جۇماعاليەۆانىڭ ەڭبەگى دەپ بىلەمىن.
قازىر مەن رەسپۋبليكالىق ۇلاننىڭ استانا قالاسىندا ورنالاسقان 0112 اسكەري ءبولىمىنىڭ راسىمدىك باتالونى ءىى قۇرمەت قاراۋىلى روتاسىندامىن. وسى كوكتەمدە اسكەري قىزمەت مەرزىمى اياقتالادى. بىراق رەسپۋبليكالىق ۇلان قاتارىندا قىزمەت ەتكەن ۋاقىتىم, اسىرەسە, ەلباسىن ۇلىقتاۋ سالتاناتىنا قاتىسقانىم ەشقاشان اسەرى جوعالمايتىن اياۋلى ۋاقىت بولدى.
ازامات ەرجانوۆ, رەسپۋبليكالىق ۇلاننىڭ 0112 اسكەري ءبولىمىنىڭ ساربازى.