كەشە مەملەكەت باسشىسى نۇرسۇلتان نازارباەۆ استانا اكىمدىگىندە بولىپ, قولدانىستاعى زاڭناماعا ءسايكەس, دەپۋتاتتاردىڭ قاراۋىنا استانا قالاسىنىڭ اكىمى قىزمەتىنە ي.تاسماعامبەتوۆتىڭ كانديداتۋراسى ەنگىزىلگەن قالالىق ءماسليحاتتىڭ كەزەكتەن تىس سەسسياسىنىڭ جۇمىسىنا قاتىستى, دەپ حابارلادى قازاقستان رەسپۋبليكاسى پرەزيدەنتىنىڭ باسپاسوز قىزمەتى.
دەپۋتاتتار مەملەكەت باسشىسىنىڭ ۇسىنىسىن ءبىراۋىزدان قولدادى.
– يمانعالي تاسماعامبەتوۆتىڭ باسشىلىق قىزمەتتە مول ءتاجىريبەسى بار. پرەمەر-مينيستر, مەملەكەتتىك حاتشى, پرەزيدەنت اپپاراتىنىڭ باسشىسى بولىپ تاعايىندالدى, اتىراۋ وبلىسىندا, الماتى قالاسىندا اكىم بولىپ ەڭبەك ەتتى, ەندى قازىر وسىندا قىزمەت اتقارۋدا. مەن وعان سەنەمىن, ول مەن ءۇشىن ەرەكشە مانگە يە قالادا, ءبىزدىڭ باستى قالامىزدا ۇلكەن ءىس جاساپ جاتىر دەپ ەسەپتەيمىن, – دەدى پرەزيدەنت.
مەملەكەت باسشىسى وتكەن پرەزيدەنتتىك سايلاۋدا زور سەنىم كورسەتكەن استانالىقتارعا ريزاشىلىعىن ءبىلدىردى.
– ەلىمىز بويىنشا ورتاشا ەسەپپەن الىپ قاراعاندا, سايلاۋعا قاتىسقانداردىڭ اراسىنان استانالىقتاردىڭ 95 پايىزى ماعان داۋىس بەردى – بۇل وسى قالا قۇرىلىسى, ونى كوركەيتۋ ءۇشىن ىستەگەن ىسىمىزگە بەرىلگەن ۇزدىك باعا. ەڭ باستىسى, سايلاۋدىڭ قورىتىندىلارى بۇكىل الەمگە قازاقستان حالقىنىڭ بىرلىگىن, ءبىزدىڭ باعىتىمىزدىڭ دۇرىستىعىن كورسەتتى. قازاقستان حالقى بىزگە سەنەدى جانە ءبىزدىڭ كەلەشەك ءۇمىتىمىز ءبارىمىز بىرگە اتقاراتىن ىستەرگە بايلانىستى. وسىنداي جوعارى دەڭگەيدەگى قولداۋ ءبىزدىڭ تاۋەلسىزدىگىمىزدىڭ 20 جىلدىعى جىلىندا كورسەتىلدى, بۇل كوپ ءجايتتى اڭعارتادى. ءبىز قازىر جالپى ەلىمىز بويىنشا جانە استانا كولەمىندە الدىمىزعا قويعان مىندەتتەردى تابىستى ورىنداۋدامىز. قازاقستان بىرقاتار كورسەتكىشتەر بويىنشا بۇگىندە الەمنىڭ باسەكەگە قابىلەتتى 50 ەلىنىڭ قاتارىنا ەنىپ وتىر. دەسەك تە, وتە كوپ جۇمىس كۇتىپ تۇر. جانە دە ەلىمىز بويىنشا جاعىمدى وزگەرىستەر, ەش اسىرەلەمەي ايتساق, ءبىزدىڭ ەلوردامىزدىڭ قارقىندى دامۋىمەن تىكەلەي بايلانىستى دەۋگە بولادى. استانا بۇگىندە – قازاقستاننىڭ تابىسى مەن جەڭىسىنىڭ نىشانى, – دەپ اتاپ كورسەتتى مەملەكەت باسشىسى.
– ماعان كورسەتكەن جانە كورسەتىپ كەلە جاتقان زور سەنىمىڭىز ءۇشىن سىزگە تاعى دا شىن ءجۇرەگىممەن العىس ايتۋىما رۇحسات ەتىڭىز. استانا – بۇل, بارىنەن بۇرىن, ۇدەمەلى دامىپ وتىرعان قالانىڭ نىشانى, بۇل ءبىزدىڭ ەلىمىزدىڭ ءال-اۋقاتىنىڭ نىشانى جانە ەلورداعا دەگەن ءسىزدىڭ كوڭىلىڭىزدىڭ ەرەكشە كورىنىسى. ءسىزدىڭ استاناعا قارىم-قاتىناسىڭىز ەرەكشە ەكەنى ءشۇباسىز, ءبىز ەرەكشە قامقورلىقتامىز. وسىنىڭ ءبارى ءبىزدىڭ ءبارىمىز ءۇشىن زور جاۋاپكەرشىلىك جۇكتەيتىنى ءسوزسىز جانە مەن ءبىز وزىمىزدە بار بارلىق تاجىريبەمىز بەن ءبىلىمىمىزدى ءسىز العا قويعان بيىك مىندەتتەردى ورىنداۋ ءۇشىن جۇمسايتىنىمىزعا سەندىرگىم كەلەدى, – دەدى ي.تاسماعامبەتوۆ.
ءماسليحاتتىڭ كەزەكتەن تىس سەسسياسىندا مەملەكەت باسشىسى استانا اكىمدىگىنىڭ ۇجىمى الدىنا بىرقاتار ناقتى مىندەتتەر قويدى. ءبىرىنشى كەزەكتە, قالادا ينۆەستورلارمەن بەلسەندى جۇمىستار جۇرگىزۋ كەرەك, سونداي-اق يندۋستريالىق-يننوۆاتسيالىق دامۋ باعدارلاماسىنىڭ بارلىق جوسپارىن ورىنداۋدى قامتاماسىز ەتۋ قاجەت. استانالىقتاردى جۇمىسپەن قامتۋعا ەرەكشە نازار اۋدارۋ كەرەك.
نۇرسۇلتان نازارباەۆتىڭ تاپسىرماسى بويىنشا جىلدىڭ اياعىنا دەيىن وتكەن جىلعى مەملەكەتتىك باعدارلاما بويىنشا بارلىق تۇرعىن ءۇي كەشەنىنىڭ قۇرىلىسى اياقتالاتىن بولادى, سونداي-اق ۇلەسكەرلىك قۇرىلىستىڭ 25 نىسانى, الەۋمەتتىك نىسانداردى سالۋ كەستەسى قاتاڭ باقىلاۋعا الىنادى. سونىمەن قاتار, استانادا العاشقى مەديتسينالىق كومەك سالاسىنداعى جۇمىستار جاقساراتىن بولادى, سونداي-اق جاقىن ورنالاسقان وبلىستارمەن بىرلەسىپ ەلوردانىڭ ازىق-ت ۇلىك بەلدەۋى باعدارلاماسىن ىسكە اسىرۋ جالعاسىن تابادى.
– قالانىڭ باسشىلىعىنا, اكىم يمانعالي تاسماعامبەتوۆكە, جانە سىزدەردىڭ بارلىعىڭىزعا ولارمەن ءبىر كوماندا بولىپ ءبىزدىڭ ەلوردامىزدى كوركەيتۋدە, سالۋدا, ونى زاماناۋي اسەم قالاعا اينالدىرۋدا ۇلكەن ناتيجەلەرگە قول جەتكىزۋلەرىڭىزدى تىلەگىم كەلەدى. سىزدەر ءاردايىم وسى مىندەتتى ورىنداپ كەلدىڭىزدەر, الداعى ۋاقىتتا دا سولاي بولارىنا سەنەمىن, سىزدەرگە مىقتى دەنساۋلىق جانە زور تابىس تىلەيمىن, – دەدى مەملەكەت باسشىسى.