بەلورۋسسيا استاناسى – مينسك قالاسىنداعى مەترونىڭ «وكتيابرسكايا» ستانساسىنداعى جارىلىستان 12 ادام قازا تاۋىپ, 149-ى ءار ءتۇرلى دەڭگەيدەگى جاراقاتتار الدى.
وسى ەلدىڭ مەملەكەتتىك قاۋىپسىزدىك كوميتەتى جارىلىستى جۇزەگە اسىرۋى مۇمكىن دەگەن كۇدىكتىنى انىقتاعاندارى تۋرالى مالىمەت تە تاراتتى. جارىلىس قۋاتى 5-7 كيلو تروتيلدەي. جارىلعىش زات مەتالل كەسىندىلەرىمەن تولتىرىلىپتى. قازىرگى كەزدە ۇلىبريتانيا, رەسەي جانە يزرايل ەلدەرى قىلمىستى اشۋعا ءوز كومەكتەرىن ۇسىنىپ وتىر.
ۆاشينگتون قالاسىنىڭ مەرى تۇتقىندالدى
ۆاشينگتونداعى كونگرەسس عيماراتىنىڭ الدىندا رۇقسات ەتىلمەگەن قارسىلىق اكتسياسىنا قاتىسقاندارى ءۇشىن ۆاشينگتون مەرى ۆينسەنت گرەيدى جانە قالا كەڭەسىنىڭ بەس مۇشەسىن كاپيتوليا پوليتسياسى تۇتقىنعا الدى.
200-گە تارتا شەنەۋنىك پەن قوعامدىق بەلسەندىلەر قاتىسقان بۇل اكتسيا قالا باعدارلامالارىن قارجىلاندىرۋدىڭ قىسقارۋىنا نارازىلىق رەتىندە ۇيىمداستىرىلعان. قول ۇستاسىپ كوشەنى جاۋىپ تاستاعاندار «قالادان قولدارىڭدى تارتىڭدار!» دەپ ۇرانداتقان كورىنەدى. ەسكە سالا كەتسەك, اقش كونگرەسىنىڭ تومەنگى پالاتاسى پرەزيدەنت اكىمشىلىگىمەن كەلىسە وتىرىپ, 2012 جىلدىڭ بيۋدجەتىن ايتارلىقتاي قىسقارتقان بولاتىن.
رادياتسيالىق قاۋىپ كۇشەيە ءتۇستى
جاپونيا «فۋكۋسيما-1» اتوم ەلەكتر ستانساسىنىڭ قاۋىپتىلىك دەڭگەيىن چەرنوبىل اپاتىنداعىداي 7-ءشى دەڭگەيگە دەيىن كوتەردى. ەل بيلىگى «فۋكۋسيما-1» ستانساسىندا چەرنوبىل اەس-ىندە ورىن العان اپات قاۋپى تۋىنداعانىن مويىنداپ وتىر.
«فۋكۋسيما-1» اەس-ىندەگى جاعدايدىڭ بۇلايشا كۇرت ناشارلاپ كەتۋ سەبەبى ازىرگە ايتىلماۋدا. بەلگىلىسى, №4 رەاكتوردا ءورت شىققان, بىراق ول تەز سوندىرىلگەن. وسى رەتتە حونسيۋ ارالىنىڭ شىعىس جاعالاۋىندا قۋاتى 6,6 بالل بولاتىن جەر سىلكىنىسى تىركەلگەندىگىن ايتا كەتەيىك. ءدۇمپۋ وشاعى توكيونىڭ سولتۇستىك-شىعىسىندا, قالادان 77 شاقىرىم جەردە 13,1 شاقىرىم تەرەڭدىكتە بولعان.
بۇرىنعى پرەزيدەنتتىڭ ۇستىنەن ءىس قوزعالدى
كوت-د’يۆۋاردىڭ جاڭادان سايلانعان پرەزيدەنتى الاسسان ۋاتتارا ءوزىنىڭ تەلەديدار ارقىلى حالىققا ارناعان ءۇندەۋىندە ەلدىڭ بۇرىنعى پرەزيدەنتى لوران گباگبونىڭ ۇستىنەن سوت تەكسەرىسى باستالعاندىعىن مالىمدەدى.
ارنايى كوميسسيا گباگبو جانە ونىڭ وداقتاستارىنىڭ ەلدەگى اسكەري قاقتىعىستاعى ارەكەتتەرىن تەكسەرۋمەن اينالىساتىن بولادى. رەسپۋبليكانىڭ مويىندالماعان باسشىسى اپتا بويى ءوز رەزيدەنتسياسىنداعى بۋنكەردە جاسىرىنىپ كەلگەن. ۋاتتارا تەلەارنا ارقىلى تاراتقان ۇندەۋىندە كوتديۆۋارلىقتاردى كەك قايتارماۋعا شاقىرىپ, «جاڭا ءداۋىردىڭ» تۋعاندىعىن اتاپ وتكەن.
سوعىستى توقتاتۋعا كەلىسكەندەي ەدى
كواليتسيا ۇشاقتارى ليۆيانىڭ ءال-دجۋفرا قالاسىنداعى بىرقاتار ازاماتتىق جانە اسكەري نىسانداردى بومبالاعان. بۇل جونىندە ليۆيا تەلەارناسى اسكەري باسقارما دەرەكتەرىنە سۇيەنە وتىرىپ حابارلادى.
«ليۆياعا كرەست جورىعىن جاساعان باسقىنشىلاردىڭ ۇشاقتارى تاستاعان بومبالار ءال-دجۋفرا قالاسىنداعى اسكەري, سونداي-اق ازاماتتىق نىساندارعا دا ءتۇستى», دەپ حابارلادى ليۆيالىق تەلەارنا. بۇعان دەيىن وڭتۇستىك افريكا رەسپۋبليكاسىنىڭ پرەزيدەنتى دجەكوب زۋما باستاعان افريكا وداعىنىڭ دەلەگاتسياسى مۋاممار كاددافيمەن كەزدەسىپ, ونىمەن سوعىستى توقتاتۋعا كەلىسكەندەي بولعان. ال وپپوزيتسيا بولسا, مامىلە ۋاقىتىنىڭ تىم كەش جاسالعاندىعىن العا تارتۋدا.
قاۋىپ تۋدىرعان كەزدە ىسكە قوسىلادى
يزرايل اسكەريلەرى سوعىس جاعدايىندا «تەمىر كۇمبەز» تومەنگى ەشەلوندى زىمىراندارعا قارسى قورعانىس جۇيەسىن سىناقتان ءساتتى وتكىزگەندىكتەرىن مالىمدەدى. ءساۋىردىڭ 7-9-ى ارالىعىندا وسى قارۋ ارقىلى يزرايل اۋماعىنا قاراي اتىلعان 35 «كاسسام» جانە «گراد» زىمىراندارىنىڭ سەگىزىن جويۋعا قول جەتكىزىلىپتى.
اتالعان قارۋ جۇيەسى زىمىرانداردىڭ تەك 24 پايىزىن عانا جويعان. ونى جاساۋشىلار «تەمىر كۇمبەز» زىمىراندار تەك ەلدى مەكەندەرگە ناقتى قاۋىپ تۋدىرعان كەزدە عانا ىسكە قوسىلاتىندىعىن ايتادى. تەل-اۆيۆ بۇل باعىتتاعى جۇمىستى دۇرىس ساناپ وتىر. بۇعان دەيىن اۋە نەمەسە ارتيللەريادان سوققى بەرۋ ايتارلىقتاي ناتيجە بەرمەي كەلگەن كورىنەدى.
ءتىلسىز جاۋ – ءورت 80 ءۇيدى جالمادى
اقش-تىڭ تەحاس شتاتىنداعى تابيعي ءورت سالدارىنان 80-گە تارتا عيمارات قىزىل جالىنعا ورانعان. تەك فورت-دەۆيس قالاسىنىڭ وزىندە 40-قا تارتا ءۇي جانىپ كەتكەن.
دجەفف-دەۆيس پەن ميدلەند وكرۋگتەرىندە ءتىلسىز جاۋ جالماعان اۋماق 100 مىڭ (شامامەن 404 شارشى شاقىرىم) اكرعا جەتكەن. كەيبىر جەرلەردە قىزىل جالىن 5-6 مەترگە دەيىن كوتەرىلىپتى. ونىڭ مۇنشالىقتى تەز تاراۋىنا كۇشتى جەل مەن اۋا رايىنىڭ جىلىلىعى اسەر ەتكەن. ءتىلسىز جاۋدى اۋىزدىقتاۋعا ەرىكتىلەر مەن كورشىلەس شتاتتاردان ءورت ءسوندىرۋ كوماندالارى جۇمىلدىرىلعان.
قىسقا قايىرىپ ايتقاندا:
سيتسيليادا ەتنا ۆۋلكانى وياندى. ودان اتقىلاعان لاۆا مەن ءتۇتىن باعانىنىڭ بيىكتىگى ءۇش شاقىرىمعا دەيىن كوتەرىلىپ, جەل ارقىلى كۇل ونداعان شاقىرىم جەرگە تاراعان.
ەگيپەتتىڭ بۇرىنعى پرەزيدەنتى مەن ونىڭ بالالارى گامال مەن ءالي سوتقا كەلۋى كەرەكتىگى تۋرالى شاقىرتۋ الدى. بۇل جونىندە ەلدىڭ ۋاقىتشا ۇكىمەتىنىڭ قۇرامىنا كىرگەن ىشكى ىستەر ءمينيسترى «ءال-ارابيا» سپۋتنيكتىك تەلەارناسىنا بەرگەن سۇحباتىندا مالىمدەگەن.
قاردىڭ قالىڭ تۇسۋىنەن ترانسكاۆكاز اۆتوماگيسترالى بويىنداعى قوزعالىس مۇلدەم توقتاپ قالدى. اتالعان جولدا سەل مەن قار كوشكىنىنىڭ ورىن الۋ مۇمكىندىگى جوعارى.
ينتەرنەت ماتەريالدارى نەگىزىندە ازىرلەندى.