ازامات باسىنداعى ابىروي مەن اتاق, بەدەل مەن باق تۋعان ەلىنە سىڭىرگەن ادال ەڭبەك ارقىلى كەلەدى دەسەك, بۇل كۇندە باس اسكەري پروكۋرور, ادىلەت گەنەرال-لەيتەنانتى ەرعالي مەرزادينوۆتىڭ ونەگەلى ءومىرى, وتانعا قىزمەت ەتۋ جولدارى وسىنىڭ ايقىن دالەلى بولماق. ونىڭ زاڭ سالاسىندا ۇزدىكسىز, ابىرويلى ەڭبەك ەتىپ كەلە جاتقانىنا 35 جىلدىڭ ءجۇزى بولىپتى.
ە.مەرزادينوۆ قازمۋ-ءدىڭ جولداماسىمەن ەڭبەك جولىن الماتىنىڭ سول تۇستاعى كالينين اۋداندىق پروكۋراتۋراسىندا تالىمگەر بولىپ باستادى. جاس جىگىتتىڭ ۋنيۆەرسيتەت قابىرعاسىندا ءجۇرىپ قۇقىقتىق زاڭنامالاردى جان-جاقتى مەڭگەرگەنى جۇمىسقا العاشقى قۇلشىنا كىرىسكەن كۇننەن-اق بايقالدى. تىندىرىمدى ءجىگىت ءبىرشاما تاجىريبە جيناپ, ىسىلا كەلە قۇقىقتىق قاداعالاۋ ءىسىنىڭ قىر-سىرىن تەز مەڭگەرىپ الدى. وسى جەردە اعا تەرگەۋشىلىك قىزمەتكە دەيىن ءوستى. بارلىق تاپسىرىلعان ءمىندەتتى ءمۇلتىكسىز ورىنداپ, زاڭنامالىق انىقتامالاردى ساۋاتتىلىقپەن ءجانە ءبىلىكتىلىكپەن جازا بىلەتىن, ويىن ورامدى ەتىپ جەتكىزە الاتىن, ونىڭ ۇستىنە, زاڭدىلىق تۇرعىسىنان ورنىقتى ۇسىنىس, تىڭعىلىقتى كەڭەس بەرۋگە قابىلەتتى مامان 1986 جىلى قازاق كسر باس پروكۋراتۋراسى تەرگەۋ باسقارماسىنىڭ پروكۋرورى بولىپ تاعايىندالسا, 1991 جىلى اسا قاۋىپتى قىلمىستاردى تەرگەۋ ءبولىمى باستىعىنىڭ ورىنباسارلىعىنا كوتەرىلدى.
تاۋەلسىزدىكتىڭ اق تاڭى ارايلاپ اتقان كەزدە ەرعالي سەرىكباي ۇلىنىڭ ەلدىك مۇراتتى اسقاقتاتۋ جولىندا بار بولمىسىمەن بەرىلە قىزمەت ەتكەنىن انىق كورۋگە بولادى. ول 1991-1992 جىلدارى قازاق كولىك پروكۋراتۋراسىنىڭ تەرگەۋ باسقارماسى باستىعىنىڭ ورىنباسارى, 1992-1994 جىلدارى الماتى قالاسى سوۆەت اۋدانىنىڭ, 1994-1996 جىلدارى الماتى قالالىق پروكۋرورىنىڭ ءبىرىنشى ورىنباسارى, 1996-1997 جىلدارى سولتۇستىك قازاقستان وبلىسىنىڭ, 1997-2001 جىلدارى الماتى قالاسىنىڭ, 2001-2002 جىلدارى قاراعاندى وبلىسىنىڭ پروكۋرورى سىندى اسا جاۋاپتى قىزمەتتەر اتقارىپ, ەگەمەن مەملەكەتىمىزدىڭ زاڭدىلىق تۇرعىدا نىعايۋىنا زور ۇلەس قوستى.
جاۋاپتى قىزمەتپەن عىلىمدى دا قوسا الىپ ءجۇردى. ول 2001 جىلى زاڭ عىلىمدارىنىڭ دوكتورى, اكادەميك ع.س.ساپارعاليەۆتىڭ جەتەكشىلىگىمەن «ادام مەن ازامات قۇقىقتارىنىڭ ساقتالۋىنا پروكۋرورلىق قاداعالاۋ ءجۇرگىزۋ جۇمىسىنداعى كونستيتۋتسيالىق-قۇقىقتىق ءماسەلەلەر» تاقىرىبىندا كانديداتتىق ديسسەرتاتسيا قورعادى. ال 2002 جىلدىڭ اقپانىندا ەلىمىزدىڭ ىشكى ءىستەر ۆيتسە-ءمينيسترى بولىپ تاعايىندالدى. 2004 جىلى مامىردا استانا قالاسىنىڭ پروكۋرورى, ءبىر جىلدان سوڭ قازاقستان رەسپۋبليكاسى باس پروكۋرورىنىڭ ورىنباسارى بولىپ تاعايىندالسا, 2009 جىلدىڭ مامىرىنان بەرى ەلىمىزدىڭ باس اسكەري پروكۋرورى بولىپ جەمىستى قىزمەت اتقارىپ كەلەدى.
ادىلەت گەنەرال-لەيتەنانتى ە.مەرزادينوۆتىڭ قازاقستاندىق قۇقىقتىق جۇيەدە الار ورنى, قوعام ءومىرىندەگى ءسىڭىرىپ كەلە جاتقان ەڭبەگى ءوز الدىنا بولەك ءاڭگىمە.
ونىڭ باستاماسىمەن باس اسكەري پروكۋراتۋرانىڭ استاناعا كوشىرىلۋى قامتاماسىز ەتىلدى, ءاسكەري پروكۋرورلاردىڭ جۇمىس ءتاسىلدەرى مەن ادىستەرى جەتىلدىرىلدى, قاداعالاۋ فۋنك-
تسيالارى, ونىڭ ىشىندە الەۋمەتتىك-ەكونوميكالىق سالادا كۇشەيتىلدى, پروكۋراتۋرا ورگاندارىنا تەرگەۋ قۇقىعىنىڭ بەرىلۋىنە بايلانىستى تەرگەۋ اپپاراتى قۇرىلدى. سونداي-اق, ءاسكەري پروكۋرورلاردىڭ كۇش-ءجىگەرى قۇقىق بۇزۋشىلىقتىڭ الدىن الۋعا جانە مەملەكەتتىڭ قورعانىس الەۋەتىن نىعايتۋ مەن ساقتاۋعا, جاستارعا اسكەري-پاتريوتتىق تاربيە بەرۋ جۇيەسىن دامىتۋعا ىقپالىن تيگىزەتىن باسقا دا وزەكتى جوبالارعا باعىتتالدى.
وسى جىلدارى باس اسكەري پروكۋراتۋرا ازەربايجان, بەلارۋس, ۆەنگريا, رەسەي, ۋكراينا جانە قىتايدىڭ ءاسكەري پروكۋراتۋرالارىمەن ىنتىماقتاستىق ورناتتى. وسىنىڭ نەگىزىندە قازىر مامانداردى شەت ەلدەردە وقىتۋ جۇزەگە اسىرىلۋدا. ەندى, ءمىنە, بۇگىندە وسىنداي اتقارىلعان زور جۇمىستاردىڭ ارقاسىندا قازاقستاننىڭ ءاسكەري پروكۋراتۋراسى العا قويىلعان مىندەتتەردى تابىستى ءارى مۇلتىكسىز ورىنداپ وتىرعان دەربەس قۇقىق قورعاۋ ورگانى بولىپ تابىلادى.
ەرەكەڭنىڭ كوپ جىلعى ادال ەڭبەگى ەسكەرۋسىز قالعان جوق. قۇقىق قورعاۋ سالاسىنداعى ەڭبەگى ەسكەرىلىپ ءى جانە ءىى ءدارەجەلى «داڭق» وردەندەرىمەن, «پروكۋراتۋرانىڭ قۇرمەتتى قىزمەتكەرى», «ىشكى ىستەر سالاسىنىڭ ەڭبەك سىڭىرگەن قىزمەتكەرى» اتاقتارىمەن, سونداي-اق, كوپتەگەن مەرەكەلىك مەدالدارمەن ماراپاتتالدى. 2013 جىلى ەلباسىنىڭ قولىنان ءادىلەت گەنەرال-لەيتەنانت جوعارى اسكەري شەنىن الدى.
بۇگىندە وسكەلەڭ ۇرپاقتىڭ ءتاربيەسىنە دە اسكەري پروكۋراتۋرانىڭ تەرەڭ ءمان بەرگەن جايى بار. باس اسكەري پروكۋروردىڭ باستاماسىمەن ەلورداداعى بىرقاتار مەكتەپتەر ءجانە تۋعان اۋىلىندا «اسكەري پروكۋراتۋرانىڭ كادەت سىنىپتارى» جۇمىس ىستەپ تۇر. مۇنان ءارى دە بۇل جۇمىستار قاناتىن كەڭگە جايا بەرمەك. ويتكەنى, ءار ادامنىڭ تۋعان جەرى – قۇتتى مەكەنى عوي. ەرەكەڭ قاي قياندا ءجۇرسە دە تۋعان جەرگە دەگەن ءسۇيىسپەنشىلىك سەزىمىن, پەرزەنتتىك العىسىن ءبىلدىرۋ مەن اۋىلداستارىنا قامقورلىق جاساۋدى ۇمىتپايدى. ونىڭ تۋعان ءوڭىرىنىڭ ءوسىپ-وركەندەۋىنە قوسقان ۇلەسى دە ايتارلىقتاي. بۇعان ناقتى دالەل بار. ول جىل سايىن تۋعان اۋىلىنىڭ مەكتەبىندە جەكە قاراجاتىنان «ۇزدىك وقۋشى» جانە «ۇزدىك ۇستاز» اتالىمدارى بويىنشا ەكى ستيپەنديا تاعايىنداپ كەلەدى. اۋدان بويىنشا دا سپورت ءىسىن جانداندىرۋ, ءوركەندەتۋ جولىندا نەبىر جاڭا باستامالار كوتەرىپ, ىزگى ىستەر-
دى جۇزەگە اسىردى. ونىڭ ءتىكەلەي قولداۋىمەن وڭتۇستىك قازاقستان وبلىسى ماقتاارال اۋدانىندا «ماقتاارال» فۋتبول كومانداسى قۇرىلىپ, ءبۇگىندە بۇل سپورت كومانداسى ەل چەمپيوناتىندا ۇزدىك ويىن ۇلگىسىن كورسەتىپ ءجۇر.
جالپى, قازاق – باقىتتى حالىق. مىڭ ءولىپ, مىڭ تىرىلسە دە توز-توزى شىعىپ توزعان جوق. قايتا ءوزىن جاقسى ىسىمەن ءدالەلدەپ, قازاق اتىن الەمگە ءايگىلەدى. ەلباسى نۇرسۇلتان نازارباەۆتاي ەرەن ەردىڭ باستاۋىمەن ءبىر تۋدىڭ استىندا جينالىپ, تاتۋ-ءتاتتى ءومىر ءسۇرۋدىڭ, جاسامپاز ءومىردىڭ جارقىن ۇلگىسىن كورسەتىپ كەلەدى. سول ەگەمەندىكتىڭ اق ۋىعىن كوتەرىسىپ, ەلدىك دەڭگەيدەگى بيىك مانساپتى ارقالاپ, قۇقىق ءىسىنە ءبىر ازاماتتاي ۇلەس قوسىپ ءجۇرگەن العاداي ەر ازاماتتىڭ ءبىرى, ءبىرى ەمەس-اۋ, بىرەگەيى ە.مەرزادينوۆ ەكەندىگىندە ءسوز جوق. وسى ورايدا, ايتا كەتەتىن ءبىر جايت – 17 اقپاندا قازاقستان ءاسكەري پروكۋراتۋراسىنىڭ قۇرىلعانىنا دا شيرەك عاسىر تولماقشى. وتكەن مەرزىم ىشىندە ءادىلدىكتىڭ اق تۋىن ۇستاعان اسكەري پروكۋرورلارىمىزدىڭ ەل دامۋىنا قوسقان ۇلەسى ۇشان-تەڭىز دەسەك, شىندىقتان ەش الشاق كەتپەيمىز.
اباي تاسبولاتوۆ,
پارلامەنت ءماجىلىسىنىڭ دەپۋتاتى