شەنەۋنىكتەردىڭ دە سىرعاناق تەبۋگە مۇمكىندىگى بار

وبلىستىق اكىمدىك عيماراتى جانىنداعى مۇز ايدىنى ەرىكسىز قىزىقتىرادى. اشىق الاڭعا جاسالعان مۇز ايدىنى كەلۋشىلەرگە وتە ىڭعايلى. ءتىپتى, تۇسكى ءۇزىلىس كەزىندە مەملەكەتتىك قىزمەتشىلەردىڭ دە كونكي تەۋىپ, سپورتپەن شۇعىلدانۋعا مۇمكىندىكتەرى بار. قالالىق سپورت ءبولىمىنىڭ مالىمەتىنشە, سىرعاناقتى جاساۋعا جەرگىلىكتى بيۋدجەتتەن 2 ميلليو­ن 263 مىڭ تەڭگە جۇمسالسا, 1,5 ميلليون تەڭگەگە 150-دەي كونكي ساتىپ الىنعان كورىنەدى. مۇز ايدىنعا كۇندىز دە, كەشكىلىكتە دە, سەنبى-جەكسەنبى كۇندەرى دە كونكي تەبۋشىلەر كوپ كەلەدى. وسى ەكى-ءۇش ايدىڭ ىشىندە 5 مىڭنان اسا ادام مۇز ۇستىندە سىرعاناپ, كونكيلەردى جالعا بەرۋ ەسەبىنەن 750 مىڭ تەڭگەگە جۋىق تابىس ءتۇسىپتى. بالالار اراسىندا شايبالى حوككەيدەن قالالىق تۋرنير دە وتكىزىلدى. ءدال وسىنداي قاراپايىم الاڭداردان چەمپيوندار ءوسىپ شىعادى. مىسالى, ناگانودا وتكەن قىسقى وليمپيادانىڭ قولا جۇلدەگەرى جەرلەسىمىز ليۋدميلا پروكاشەۆانى, ءۇش ماۋسىم قاتارىنان ەل چەمپيونى اتانعان «ەرتىس» حوككەي كلۋبىنىڭ ويىنشىلارىن ايتۋعا بولار. وبلىس ورتالىعىنداعى بالالار-جاسوسپىرىمدەر سپورت مەكتەپتەرىندە مانەرلەپ سىرعا­ناۋ, حوككەي ويناۋشى وقۋشىلار سانى كوبەيۋدە. بيىل جالپى قالادا 60-قا جۋىق مۇز ايدىنى اشىلدى. وبلىستىق اكىمدىك عيماراتى جا­نىنداعى مۇز ايدىنى ۇكىمەت باسشىسى باقىتجان ساعىنتاەۆ وسى وڭىردە اكىم بولىپ تۇرعان كەزدە سونىڭ باستاماسىمەن 2011 جىلى جاسالعان بولاتىن. اكىمدىك تەرەزەلەرىنەن مۇز ايدىنعا قارايتىن شەنەۋنىك­تەردىڭ جۇمىسقا دەگەن ىنتا-جىگەر­لەرىن شىڭداپ, ءبىر ۋاق سەرگىپ, كونكيلەرىن بايلاپ شى­نىق­سىن دەگەن دە بولار, بالكىم... فاريدا بىقاي, «ەگەمەن قازاقستان» پاۆلودار سۋرەتتەردى تۇسىرگەن ۆالەري بۋگاەۆ