الماتىداعى قازاق ۇلتتىق اگرارلىق ۋنيۆەرسيتەتىندە ەلباسى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى اياسىندا «اگروونەركاسىپتىك كەشەن – قازاقستان رەسپۋبليكاسى ەكونوميكاسىنىڭ درايۆەرى» تاقىرىبىندا رەسپۋبليكالىق فورۋم ءوتتى. وعان اگرارلىق سالاداعى ەلىمىزدىڭ ايتۋلى عالىمدارى مەن اتالعان ۋنيۆەرسيتەت ۇجىمى قاتىستى.
جيىن بارىسىندا ازىق-ت ۇلىك قاۋىپسىزدىگى, ونىڭ تۇرلەرىن ەكولوگيالىق تازا ءارى ساپالى ءوندىرۋ, ەكسپورت كولەمىن كوبەيتۋ, ماي داقىلدارى مەن جەمشوپ داقىلدارىنىڭ ەگىستىك كولەمىن ارتتىرۋ, مال سانىن كوبەيتۋ سياقتى بىرقاتار ماسەلەلەر ايتىلدى. جەر قۇنارلىلىعىن ساقتاي وتىرىپ, جەكە شارۋاشىلىقتارعا قولداۋ كورسەتۋ ماسەلەسى دە نازاردان تىس قالمادى.
قازاق ۇلتتىق اگرارلىق ۋنيۆەرسيتەتىنىڭ رەكتورى, اكادەميك تىلەكتەس ەسپولوۆ اگرارلىق سەكتورعا بايلانىستى جولداۋدا ايتىلعان وزەكتى ماسەلەلەرگە توقتالدى. «بۇگىنگى كۇنى مال شارۋاشىلىعى ءونىمىنىڭ ساپاسى مەن ونىمدىلىگىنە ەرەكشە كوڭىل ءبولىنىپ وتىر. مال شارۋاشىلىعىن ىرىلەندىرۋدە قازىرگى تاڭداعى الەم تالابىنا بايلانىستى جاڭا يننوۆاتسيا مەن تەحنولوگيانى ەلىمىزگە الىپ كەلۋىمىز قاجەت. وزدەرىڭىز بىلەتىندەي, 2016 جىلى اۋىل شارۋاشىلىعى كووپەراتيۆى تۋرالى زاڭ قابىلداندى. وعان دەيىن ەلىمىزدە 5 زاڭ قابىلدانعان بولاتىن. ەكەۋى سالالىق, ۇشەۋى مامانداندىرىلعان. سوعان بايلانىستى اۋىل شارۋاشىلىعى كووپەراتيۆتەرىن سۋبسيديالاندىرۋ جونىندە ەرەكشە كەلىسىمدەر قابىلداندى. اۋىل شارۋاشىلىعى كووپەراتيۆتەرىنە سالىق كولەمى جونىنەن 70 پايىز جەڭىلدىك كورسەتىلىپ وتىر. بۇل − مەملەكەت تاراپىنان ۇلكەن قولداۋ», دەدى رەكتور.
اتالعان ءبىلىم وشاعىنداعى «اگرونوميا» كافەدراسىنىڭ مەڭگەرۋشىسى پروفەسسور سەرىك ورازباەۆ: «پرەزيدەنت جولداۋىنا بايلانىستى ءبىز كووپەراتسيا ماسەلەسىن كوتەرىپ وتىرمىز. اۋىل شارۋاشىلىعىنداعى ۇساق شارۋاشىلىقتاردىڭ باسىن بىرىكتىرىپ, ءىرى شارۋاشىلىقتارعا اينالدىرۋ, ءار سالانى جەكە جەتىلدىرۋگە باسا نازار اۋدارا كەلىپ, مال شارۋاشىلىعى, وسىمدىك شارۋاشىلىعى, سەلەكتسيا سياقتى اۋىل شارۋاشىلىعىنىڭ نەگىزگى جۇمىستارىنا زور كوڭىل بولىنۋدە. ءبىزدىڭ ۋنيۆەرسيتەت وسى سالاداعى بىلىكتى, زاماناۋي تەحنولوگيالاردى مەڭگەرگەن ساۋاتتى كادرلار دايارلاۋعا كۇش سالىپ جاتىر», − دەپ مالىمدەدى.
ەل ەكونوميكاسىنىڭ ءبىر تىنىسى − اگرارلىق سالانى دامىتۋعا مەملەكەت تاراپىنان كوپ قولداۋ كورسەتىلۋدە. ەلباسى ايتقانداي, «اۋىل شارۋاشىلىعىن ەكونوميكانىڭ درايۆەرىنە اينالدىرۋ» − بۇگىنگى كۇننىڭ نەگىزگى تالابى.
ارمان وكتيابر,
جۋرناليست