قوستاناي وبلىسىنىڭ اڭشىلار مەن بالىقشىلار قوعامى قاسقىر اتۋعا باقىلاۋ قويۋدى ۇسىنىپ وتىر. ساراپشىلار پىكىرىنشە, ايماقتا بۇل اڭنىڭ جويلىپ كەتۋ قاۋپى بار, - دەپ جازادى kaztengrinews.kz.
رەسمي ستاتيستيكا بويىنشا, وبلىستا 450 قاسقىر عانا قالعان. بيىل بۇل جىرتقىشتار وتە تىنىش. وبلىستىڭ ورمان شارۋاشىلىعى جانە جانۋارلار الەمى ينسپەكتسياسىنىڭ مالىمەتى بويىنشا, بىلتىر 20 قاسقىر اتىپ الىنعان. دەگەنمەن بۇل رەسمي مالىمەت, ال بۇل جىرتقىشتى اۋلاۋعا ەرەكشە رۇقساتتىڭ جوقتىعىنان اڭدى كەز كەلگەن ادام اتىپ الىپ ءجۇر.
"قاسقىر اۋلاناتىن اڭدار قاتارىنا كىرمەيدى, ول رەتتەلۋگە جاتاتىن اڭ. اڭشىلىق كەزىندە ادامعا قاسقىر جولىعىپ قالسا, جىرتقىشتى اۋلاپ الۋعا رۇقسات ەتىلگەن", - دەپ اتاپ ءوتتى ايماقتىڭ ينسپەكتسيا مامانى ءداۋىت تاجىباەۆ.
قوستاناي وبلىسىنىڭ اڭشىلار مەن بالىقشىلار قوعامىنىڭ توراعاسى اناتولي كوۆالەنكو قاسقىر جويىلىپ كەتپەس ءۇشىن, ونى اڭشىلىققا جاتاتىن اڭدار قاتارىنا كىرگىزۋ كەرەكتىگىن ايتادى. "قاسقىر قوستاناي وبلىسىنىڭ تاريحىنداعى قايعىلى ەستەلىك قانا بولىپ قالۋى مۇمكىن, ويتكەنى قارمەن جۇرەتىن تەحنيكا پايدا بولعالى قاسقىر ازايىپ كەتتى. ەشبىر اڭ ول تەحنيكادان قاشىپ قۇتىلا المايدى. وتە ازايىپ كەتتى", - دەيدى كوۆالەنكو.
ازىرگە بۇل ۇسىنىس بويىنشا شەنەۋنىكتەردەن وڭدى جاۋاپ كەلمەگەن كورىنەدى.