قازاقستان پرەزيدەنتى نۇرسۇلتان نازارباەۆ قازاقستان حالقىنا جولداۋىندا الەۋمەتتىك قامتاماسىز ەتۋ سالاسىنداعى وزگەرىستەرگە توقتالدى.
"مەنىڭ تاپسىرمام بويىنشا 2017 جىلعى 1 شىلدەدەن باستاپ 2,1 ميلليون زەينەتكەر ءۇشىن زەينەتاقى 2016 جىلعى دەڭگەيدەن 20 پايىزعا دەيىن ارتتىرىلادى. بۇدان بولەك, بازالىق زەينەتاقى تاعايىنداۋ 2018 جىلعى 1 شىلدەدەن باستاپ جاڭا ادىستەمە بويىنشا جۇزەگە اسىرىلادى. ونىڭ كولەمى زەينەتاقى جۇيەسىنە قاتىسۋ وتىلىنە بايلانىستى بەلگىلەنەدى. وسى ءوسىمنىڭ بارلىعى 2018 جىلى بازالىق زەينەتاقىنىڭ جاڭا مولشەرىن 2017 جىلمەن سالىستىرعاندا 1,8 ەسە ارتتىرۋعا مۇمكىندىك بەرەدى", - دەلىنگەن جولداۋدا.
پرەزيدەنتتىڭ ايتۋىنشا, ەلىمىزدە جىل سايىن 400 مىڭعا جۋىق بالا تۋادى. بۇل 1999 جىلعى دەڭگەيدەن 2 ەسە دەرلىك جوعارى. "مۇنداي جاقسى ءۇردىستى الداعى ۋاقىتتا دا ساقتاۋ كەرەك. مەنىڭ تاپسىرمام بويىنشا 2017 جىلعى 1 شىلدەدەن باستاپ بالا تۋعاندا بەرىلەتىن ءبىر رەتتىك جاردەماقى كولەمى 20 پايىزعا وسىرىلەدى", - دەدى نازارباەۆ.
سونداي-اق, قازاقستان پرەزيدەنتى ەڭ تومەنگى كۇنكورىس شەگىن دە قايتا قاراستىرۋ كەرەكتىگىن ايتتى. "ول قازاقستاندىقتاردىڭ ناقتى تۇتىنۋشىلىق شىعىستارىنا سايكەس كەلۋگە ءتيىس. بۇل قادام 2018 جىلعى 1 قاڭتاردان باستاپ بازالىق زەينەتاقى, مۇگەدەكتەرگە جانە اسىراۋشىسىنان ايرىلعان وتباسىلارعا ارنالعان جاردەماقى, مۇگەدەك بالا تاربيەلەپ وتىرعاندارعا بەرىلەتىن اتاۋلى كومەك پەن جاردەماقى كولەمىن 3 ميلليون ادام ءۇشىن وسىرۋگە مۇمكىندىك بەرەدى.
2018 جىلعى 1 قاڭتاردان باستاپ اتاۋلى الەۋمەتتىك كومەك كورسەتۋ شەگىن ەڭ تومەنگى كۇنكورىس شەگىنىڭ 40 پايىزىنان 50 پايىزعا دەيىن ءوسىرىپ, ونىڭ جاڭا فورماتىن ەنگىزۋ كەرەك. بۇل رەتتە جۇمىس ىستەۋگە قابىلەتتى ادامنىڭ ءبارى تەك جۇمىسپەن قامتۋ باعدارلاماسىنا قاتىسۋ شارتى ارقىلى عانا قولداۋعا يە بولۋعا ءتيىس", - دەلىنگەن جولداۋدا.