قازاقستان پرەزيدەنتى جانىنداعى مەملەكەتتىك باسقارۋ اكادەمياسىندا ەلباسى نۇرسۇلتان نازارباەۆتىڭ بيلىك تارماقتارى اراسىندا وكىلەتتىكتەردى قايتا ءبولۋ ماسەلەسى جونىندەگى ۇندەۋىن تالقىلاۋ بويىنشا قازاقستان حالقى اسسامبلەياسى عىلىمي-ساراپشىلىق كەڭەسىنىڭ وتىرىسى ءوتتى. جيىنعا پارلامەنت ءماجىلىسىنىڭ دەپۋتاتتارى, قحا عىلىمي-ساراپشىلىق كەڭەسى مەن عىلىمي-ساراپشىلىق توپ مۇشەلەرى, قحا كافەدراسىنىڭ وكىلدەرى, ەتنوسارالىق قاتىناستار ماسەلەسى بويىنشا مەملەكەتتىك قىزمەتشىلەر مەن ساراپشىلار قاتىستى.
وتىرىستا رەفورمانىڭ نەگىزگى باعىتتارى, ونىڭ ىشىندە پرەزيدەنتتىڭ الەۋمەتتىك-ەكونوميكالىق ۇدەرىستەردى رەتتەۋدەگى ءبىرشاما وكىلەتتىكتەرىن ۇكىمەتكە جانە باسقا دا اتقارۋشى ورگاندارعا بەرۋ, بيلىك تارماقتارى اراسىنداعى قارىم-قاتىناستى كونستيتۋتسيالىق دەڭگەيدە تەڭگەرىمدى ەتۋ, پرەزيدەنتتىڭ بىرقاتار وكىلەتتىگىنىڭ ۇكىمەت پەن پارلامەنتكە بەرىلۋى بويىنشا قازاقستان كونستيتۋتسياسى مەن زاڭدارىنا وزگەرىستەر مەن تۇزەتۋلەر ەنگىزۋ ماسەلەسى قارالدى. سونىمەن قاتار, مەملەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى جۇمىس توبىنا ۇسىنىستار ازىرلەۋ جايى تالقىلاندى.
جيىندى اشقان قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ رەكتورى فاتيما جاقىپوۆا كونستيتۋتسيالىق وزگەرىستەر ەلدەگى دەموكراتيالىق ۇدەرىستەردى دامىتۋعا ىقپال ەتەتىنىن جەتكىزدى. «بيلىك تارماقتارى وكىلەتتىكتەرىن قايتا ءبولۋ ۇكىمەتتىڭ, پارلامەنتتىڭ قۇزىرەتىن كۇشەيتۋمەن قاتار, زور جاۋاپكەرشىلىك جۇكتەيدى. قازىرگى تاڭدا مەملەكەت باسشىسىنىڭ ۇندەۋىن ازاماتتىق قوعام جان-جاقتى تالقىلاپ, ءوز پىكىرلەرىن بىلدىرۋدە. پرەزيدەنتتىڭ ەلىمىزدىڭ وركەندەۋىنە باعىتتالعان جاڭا باستاماسىنىڭ تابىستى جۇزەگە اساتىنىنا سەنىم بىلدىرە وتىرىپ, كەزدەسۋ بارىسىندا ماڭىزدى وي-پىكىرلەردى ەستيمىز دەپ ويلايمىن», – دەدى ف. جاقىپوۆا.
سونىمەن قاتار, ول ەلباسىنىڭ مەملەكەتتىك بيلىك تارماقتارىنا رەفورما جۇرگىزۋ تۋرالى باستاماسى قازاقستاننىڭ ودان ءارى ىلگەرىلەۋى مەن دامۋىنا وڭ اسەرىن تيگىزەدى دەگەن ءوز پايىمىمەن ءبولىستى. «قازىرگى تاڭدا 5 ينستيتۋتتىق رەفورمانىڭ اياسىنداعى «100 ناقتى قادام» ۇلت جوسپارى ءساتتى جۇزەگە اسىرىلۋدا. قازاقستاننىڭ جەتىستىكتەرىن وڭىرلىك جانە حالىقارالىق دەڭگەيدەگى ساراپشىلار قاۋىمداستىعى مويىندايتىن بولدى. الايدا, ءبىزدىڭ الدىمىزدا تۇرعان باستى مىندەت – قول جەتكىزىلگەن جەتىستىكتەرگە توقمەيىلسىمەي, العا قاراي جىلجۋ. ال بۇل رەتتە, مەملەكەتتى باسقارۋدىڭ تيىمدىلىگىن ارتتىرا ءتۇسۋ كەرەك», – دەدى قازاقستان پرەزيدەنتى جانىنداعى مەملەكەتتىك باسقارۋ اكادەمياسىنىڭ رەكتورى.
پارلامەنت ءماجىلىسىنىڭ دەپۋتاتى, قازاقستان حالقى اسسامبلەياسى دەپۋتاتتىق توبىنىڭ جەتەكشىسى ساۋىتبەك ابدراحمانوۆ بۇل ۇندەۋ قابىلدانا سالىسىمەن قازاقستان حالقى اسسامبلەياسىنىڭ كەڭەسى حالىققا مالىمدەمە جاريالاعانىنا, سونداي-اق, قحا كەڭەسى وتىرىسىنىڭ وتكەنىنە, بۇل كوپ نارسەنى اڭعارتاتىنىنا نازار اۋداردى. «پرەزيدەنت ۇندەۋى جاريالانا سالىسىمەن گازەتتەردە قازاقستان حالقى اسسامبلەياسى كەڭەسىنىڭ مالىمدەمەسى شىقتى. ونىڭ ەرتەڭىندە اسسامبلەيا كەڭەسىنىڭ وتىرىسى وتكىزىلدى. مىنە, بۇگىن اسسامبلەيا عىلىمي-ساراپشىلىق كەڭەسىنىڭ ساراپشىلىق كەزدەسۋى ۇيىمداستىرىلىپ وتىر. بۇل نەنى كورسەتەدى؟ بۇل ەلباسى ۇندەۋىنەن تۋىندايتىن مىندەتتەر ەلىمىزدەگى قوعامدىق كەلىسىمنىڭ, ەتنوسارالىق بىرلىكتىڭ, تاتۋلىقتىڭ, دوستىقتىڭ ءمان-ماڭىزىن بۇرىنعىدان دا ارتتىرا تۇسەتىنىن كورسەتەدى», – دەدى پارلامەنت ءماجىلىسىنىڭ دەپۋتاتى.
بۇعان قوسا, ساۋىتبەك ابدراحمانوۆ تاۋەلسىزدىك العان العاشقى جىلدارى قازاقستانداعى مەملەكەتتىك باسقارۋ جۇيەسى قالاي جۇزەگە اسقانىنا, جالپى, سول كەزدەگى تاريحي كەزەڭ جايىنا توقتالىپ ءوتتى. «مەن سول جىلداردا اتقارعان قىزمەتىمە بايلانىستى تاۋەلسىزدىكتىڭ ءتاڭسارى شاعىنان مەملەكەتتى باسقارۋ ىسىندە قانداي قادامدار جاسالعانىن جان-جاقتى بىلەتىن اداممىن. سول كەزدەگى پارلامەنتكە ءبىراز وكىلەتتىكتەر بەرىلگەن بولاتىن. بىراق, ول كەزدە بۇل شەشىم بيلىك تارماقتارى اراسىنداعى كەلىسپەۋشىلىككە, ءجونسىز باسەكەلەستىككە اكەلىپ سوقتىرعانى ءمالىم. بۇل كولليزيا 1995 جىلى قازىرگى كونستيتۋتسيانى قابىلداۋمەن, وندا پرەزيدەنتتىك بيلىك نىسانىنىڭ اتا زاڭ دەڭگەيىندە شەگەلەنىپ ايتىلۋىمەن شەشىلدى. سودان كەيىن قازاقستان ءوز دامۋىنىڭ جاڭا بەلەسىنە شىقتى. ال ەندى جاڭا تاريحي جاعدايدا پرەزيدەنتتىڭ ءوز وكىلەتتىگىنىڭ ءبىراز بولىگىن پارلامەنتكە بەرۋ مۇمكىندىگى ايتىلىپ وتىر. تاۋەلسىزدىكتىڭ شيرەك عاسىرلىق جولىنان كەيىنگى ۇكىمەت تە ءوزى شەشىم قابىلداپ, ءوزى جۇزەگە اسىراتىن, سوعان ءوزى جاۋاپ بەرەتىن دەڭگەيگە ەركىن كەلىپ وتىر. كونستيتۋتسياعا ەنگىزىلەتىن وزگەرىستەر جوباسىندا ءبىزدىڭ مەملەكەتتىك تاۋەلسىزدىگىمىزدىڭ مىزعىمايتىندىعى جونىندە ارنايى اتاپ جازىلۋى وتە-موتە ماڭىزدى. بۇل ءبىزدىڭ ەلدىگىمىزگە سەنىمدى ءبىرجولاتا بەكىتىپ بەرەتىن ۇلى شەشىم بولىپ شىعادى», – دەدى ول ءوز سوزىندە.
سونداي-اق, كەزدەسۋ بارىسىندا ءسوز العان پارلامەنت ءماجىلىسىنىڭ دەپۋتاتى نۇرلان دۋلاتبەكوۆ بۇل باستامانىڭ استارىندا ەلدىڭ دەموكراتيالىق دامۋعا بەتۋ الۋشىلىق ءۇردىسى كورىنىس تاۋىپ وتىرعانىنا, ال مۇنداي جاعدايدا بيلىك تارماقتارى اراسىنداعى تەپە-تەڭدىكتىڭ ساقتالۋىنا ايرىقشا ءمان بەرۋدىڭ ماڭىزىنا توقتالسا, قازاقستان حالقى اسسامبلەياسى عىلىمي-ساراپشىلىق كەڭەسىنىڭ مۇشەسى, فيلولوگيا عىلىمدارىنىڭ دوكتورى ءادىل احمەتوۆ, قازاقستان جازۋشىلار وداعىنىڭ مۇشەسى, ەكونوميكا عىلىمدارىنىڭ دوكتورى مىرزاگەلدى كەمەل مەملەكەتتىك باسقارۋ سالاسىنىڭ تەتىكتەرىنە, بيلىك تارماقتارىنىڭ اراسىندا وكىلەتتىكتەردى ءبولۋدىڭ تيىمدىلىگىنە قاتىستى وزدەرىنىڭ ءتۇيىندى ويلارىن ورتاعا سالدى.
ءلايلا ەدىلقىزى,
«ەگەمەن قازاقستان»