استانا قالاسى ىشكى ىستەر دەپارتامەنتىندە ىشكى ىستەر ءمينيسترى, پوليتسيا گەنەرال-لەيتەنانتى قالمۇحانبەت قاسىموۆتىڭ, استانا قالاسىنىڭ اكىمى اسەت يسەكەشەۆتىڭ قاتىسۋىمەن جەدەل كەڭەس ءوتتى.
جيىندا ەلوردالىق ىشكى ىستەر دەپارتامەنتىنىڭ 2016 جىلى اتقارعان جۇمىس ناتيجەلەرى مەن ونىڭ الدا تۇرعان قىزمەت جوسپارى تالقىلاندى. وسىعان وراي ءسوز سويلەگەن ءىىد باستىعى, پوليتسيا گەنەرال-مايورى امانتاي اۋباكىروۆ وتكەن جىلدىڭ جەدەل-قىزمەتتىك جۇمىسىنىڭ قورىتىندىسىن بايانداي وتىرىپ, جالپى جاعداي تۇراقتى ەكەندىگىن جەتكىزدى. جۇرگىزىلگەن ءىس-شارالار ناتيجەسىندە اۋىر, اسا اۋىر, سونىمەن قاتار, ورتا جانە جەڭىل ساناتتاعى قىلمىستاردىڭ سانى ازايعانىن اتاپ ءوتتى. قوعامدا تولقۋ تۋعىزعان اتى-شۋلى قىلمىستاردىڭ بارلىعى اشىلعان. وسىلايشا, ەلوردالىق پوليتسيا مەملەكەت باسشىسىنىڭ تاپسىرمالارىنا سايكەس حالىقتىڭ پوليتسياعا سەنىمىن ارتتىرۋدا, قىزمەت اشىقتىعىن قامتاماسىز ەتۋ مەن زاڭ بۇزۋشىلىقتاردىڭ الدىن الۋدا جۇكتەلگەن مىندەتتەردى ورىنداپ كەلەدى.
مەملەكەت باسشىسىنىڭ تاپسىرماسىن ورىنداۋ جانە حالىقتىڭ سەنىمىن ارتتىرۋ ماقساتىندا جەدەل باسقارۋ ورتالىعىنىڭ 102 پۋلتىنە قوڭىراۋ شالاتىن ادامدارمەن حابارلاسىپ وتىرۋ تاجىريبەگە ەنگىزىلدى. 2016 جىلدان باستاۋ العان مۇنداي تاجىريبە وڭ ناتيجەسىن بەرىپ, ەندى ول ودان ءارى جالعاسا بەرەدى. سول سياقتى, بەس ينستيتۋتتىق رەفورمانى ىسكە اسىرۋ بويىنشا مەملەكەت باسشىسىنىڭ تاپسىرمالارىنا ساي قىزمەتىنە وتكەن جىلدىڭ باسىندا كىرىسكەن جەرگىلىكتى پوليتسياعا ەرەكشە دەن قويىلادى. بۇل ورايدا استانا قالاسى ىشكى ىستەر دەپارتامەنتى جۇمىسىنىڭ وتكەن جىلعى جەدەل قىزمەتى تۋرالى اقپاراتتى تىڭداعان ىشكى ىستەر ءمينيسترى قالمۇحانبەت قاسىموۆ «100 ناقتى قادام» ۇلت جوسپارىن ورىنداۋ بارىسىندا ەلىمىزدىڭ باس قالاسىندا تارتىپتىك جاعدايدى تۇراقتى قامتاماسىز ەتۋ كەرەكتىگىن ايتتى. سونىمەن قاتار, جەدەل-قىزمەتتىك جۇمىستى جاقسارتۋ قاجەتتىلىگى, ۇرلىقتى اشۋ جانە بولدىرماۋ, قىلمىس تۋرالى بارلىق ارىزدار مەن حابارلامالارعا جەدەل دەن قويۋ, جەكە قۇرام اراسىندا ءتارتىپ پەن زاڭدىلىقتى ساقتاۋ قاجەتتىگى اتاپ كورسەتىلدى.
جيىندى قورىتىندىلاعان استانا قالاسىنىڭ اكىمى اسەت يسەكەشەۆ ەلوردالىق پوليتسيا مەن جەرگىلىكتى اتقارۋشى ورگانداردىڭ قارىم-قاتىناسى مانىنە توقتالدى. استانا قالاسى جىلدان جىلعا دامىپ, سايكەسىنشە استانالىق پوليتسيا قىزمەتى دە بارعان سايىن جەتىلدىرىلۋدە. قازىرگى تاڭدا مۇندا «smart-تەحنولوگيا» باعىتىنداعى ەڭ وزىق تەحنولوگيالار قولدانىلۋدا. استانا كوشەلەرىندە زاماناۋي بەينەكامەرالار ورناتىلعان جانە ولاردىڭ سانى ارتۋدا. دەمەك, مىندەتىن تالاپقا ساي اتقارۋدا پوليتسيا ءۇشىن بارلىق جاعداي جاسالعان. وسىعان وراي ءا. يسەكەشەۆ جەرگىلىكتى پوليتسيا قىزمەتىنە قوعامدىق ورىندار مەن قالا كوشەلەرىندە جاسالاتىن قۇقىق بۇزۋشىلىقتاردىڭ الدىن الىپ, ناقتى ءتارتىپتىڭ ورنىعۋى مەن باسىمدى ءىس-شارالار اتقارىلۋى قاجەتتىگىن تاپسىردى. ويتكەنى, بيىل ەلوردالىق پوليتسيا الدىنا ەكسپو-2017 حالىقارالىق كورمەسىن وتكىزۋدە قاۋىپسىزدىك پەن تىنىشتىقتى ساقتاۋدا ەرەكشە مىندەت قويىلىپ وتىر.
الەكساندر تاسبولاتوۆ,
«ەگەمەن قازاقستان»