«جاڭا سەرپىن» ورتالىعى» كوممۋنالدىق مەملەكەتتىك مەكەمەسى قۇرىلىس سالاسىنا قاجەت مامانداردى دايىندايدى. 2020 جىلعا دەيىن وبلىس اكىمدىگىنىڭ قولداۋىمەن تۇرعىنداردى ەڭبەكپەن قامتۋ بويىنشا ىقپال ەتۋ باعدارلاماسى قابىلدانعان بولاتىن. بۇل تۋرالى ماڭعىستاۋ وڭىرىندەگى قۇرىلىس كومپانيالارىنىڭ وكىلدەرى حاباردار بولدى, دەپ مالىمدەدى «جاڭا سەرپىن» ورتالىعى مكم ءباسپاسوز حاتشىسى مايرا دوسنياز.
قۇرىلىس كومپانيا وكىلدەرىنىڭ الدىندا ءسوز سويلەپ, پرەزەنتاتسيا جاساعان «جاڭا سەرپىن» ورتالىعى ديرەكتورىنىڭ ورىنباسارى نۇربەك سۇلتان جۇمىس بەرۋشىلەردى مەملەكەت ەسەبىنەن جۇمىس كۇشىن تارتۋعا بەرىلىپ وتىرعان مۇمكىندىكتى ءتيىمدى پايدالانۋعا شاقىردى.
جۇمىس بەرۋشى وزىنە قاجەتتى مامان ىزدەپ ورتالىققا ءوتىنىم بەرەدى, ال ورتالىق ماماندارى جۇمىسسىزدار اراسىنان كەرەكتى ۇمىتكەردى ىزدەستىرەدى. وقۋ-ۇيرەتۋ ۇيىمدارىنىڭ ءتىزىمى اۋماقتىق جاعىنان شەكتەلمەيدى, كاسىبي بىلىكتىلىگىن ارتتىرۋ ءۇشىن تەك ەل ىشىندە عانا ەمەس, سونىمەن قاتار شەت مەملەكەتتەرگە دە بارۋعا بولادى. ول ءۇشىن جۇمىس بەرۋشى «جاڭا سەرپىن» ورتالىعىنا ءوتىنىم بەرسە جەتىپ جاتىر. وقۋ كۋرستارىن بىتىرگەن سوڭ قورىتىندى اڭگىمەلەسۋ وتكىزىلەدى جانە ودان جاقسى وتسە جەكە ەڭبەك كەلىسىمشارتى جاسالادى.
«ايتا كەتۋ كەرەك, ماڭعىستاۋ وڭىرىندە سوڭعى جىلدارى قۇرىلىس سالاسى قارقىندى دامىپ كەلەدى. جاڭادان سالىنىپ جاتقان عيماراتتار سانى از ەمەس, اسىرەسە تۇرعىن ۇيلەر, كەڭسەلەر, اكىمشىلىك عيماراتتار, اۋرۋحانالار, مەكتەپتەر, بالاباقشالار جانە باسقا دا الەۋمەتتىك نىساندار بىرىنەن سوڭ ءبىرى بوي كوتەرۋدە. بۇل ورايدا قۇرىلىس كومپانيالارى كادر تاپشىلىعىن سەزىنۋى مۇمكىن. سول سەبەپتى بۇگىن وسى شارانى ۇيىمداستىردىق. ياعني, ءبىزدىڭ ورتالىق ارقىلى دايىن مامان شىعارۋعا بولاتىنىن تۇسىندىرۋگە تىرىستىق. بۇل جاقسى مۇمكىندىك ەكەندىگىن قۇرىلىس كومپانيا وكىلدەرى دە ءتۇسىنىپ وتىر», – دەيدى «جاڭا سەرپىن» ورتالىعى ديرەكتورىنىڭ ورىنباسارى نۇربەك سۇلتان.
كەزدەسۋ بارىسىندا بەلگىلى بولعانداي, قۇرىلىس كومپانيالارى ايتارلىقتاي مامان تاپشىلىعىن سەزىنبەيدى ەكەن. الايدا, مەملەكەتتىك قولداۋدان باس تارتقىسى جوق, كەرىسىنشە الداعى ۋاقىتتا ورتالىقتىڭ كومەگىنە جۇگىنۋى مۇمكىن ەكەندىگىن جاسىرمادى.
اتالمىش باعدارلامدا قايتا دايارلاۋ كۋرسىنان وتەتىن جاس ماماندارعا الەۋمەتتىك قولداۋ قاراستىرىلعان. ياعني, اي سايىنعى شاكىرتاقى, تاماقپەن قامتۋ, جاتاقحانا جانە قاجەت بولعان جاعدايدا جول اقىسى دا تولەنەدى. سونداي-اق, شالعاي اۋىلدان كەلگەن جۇمىسسىز ادامدار تۇراقتى ەڭبەكپەن قامتىلعان جاعدايدا, مەملەكەت ەسەبىنەن جاتاقحانادان ولارعا ورىن بەرىلەدى.
گۇلايىم شىنتەمىرقىزى, «ەگەمەن قازاقستان»