قوستاناي وبلىسىندا «102» پۋلتىنە تاۋلىك بويى مىڭنان اسا قوڭىراۋ تۇسەدى. بۇل تۋرالى وبلىستىق ىشكى ىستەر دەپارتامەنتى جەرگىلىكتى پوليتسيا قىزمەتىنىڭ باسشىسى, پوليتسيا پولكوۆنيگى نىعمەت سماعۇلوۆ تۇرعىندارمەن كەزدەسۋدە مالىمدەدى.
ول وڭىردە قۇقىق ءتارتىبىن قامتاماسىز ەتۋ ءۇشىن جەرگىلىكتى پوليتسيا قىزمەتى تۇرعىندار مەن پوليتسيانىڭ بىرلەسىپ جۇمىس ىستەۋىنىڭ جاڭا فورمالارىن تابۋعا كۇش سالعانى جونىندە ايتتى. وتكەن جىلى وڭىردە قىلمىس 11,3 پايىزعا نەمەسە 2500-گە ازايدى.
وبلىستا ءبىر جىلدا 96 مىڭ قۇقىق بۇزۋشىلىق تىركەلگەن, 5500-ءى ەلدى مەكەندەردى كوگالداندىرۋ, كوركەيتۋ ىسىنە قاتىستى بولعان. بۇل ىستە قۇقىق بۇزعاندارعا 7 ميلليون تەڭگە ايىپپۇل سالىنعان, ونىڭ 4 ميلليونى تولەنگەن. سونىمەن قاتار, جاسوسپىرىمدەر اراسىنداعى قىلمىس 24,5 پايىزعا تومەندەگەن.
جۇرتشىلىقپەن كەزدەسكەندە جەرگىلىكتى پوليتسيا قىزمەتىناى باسشىسىنا 200-گە جۋىق سۇراق ءتۇستى. ونىڭ ىشىندە ەلۋ سۇراق الىس اۋدان تۇرعىندارىنان ەلەكتروندىق پوشتا ارقىلى كەلدى. ونىڭ بارلىعىنا جەرگىلىكتى پوليتسيا باستىعى جاۋاپ بەردى.
وسى كەزدەسۋدە تۇرعىندارعا جەرگىلىكتى پوليتسيا قىزمەتىنىڭ جۇمىستا پايدالاناتىن تەحنيكالارى مەن قۇرالدارى كورسەتىلدى.
ءنازيرا جارىمبەتوۆا «ەگەمەن قازاقستان»