كەشە ورتالىق سايلاۋ كوميسسياسىنىڭ كەزەكتى وتىرىسى ءوتتى. وتىرىستا ەقىۇ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ 3 ساۋىرگە تاعايىندالعان كەزەكتەن تىس پرەزيدەنتتىك سايلاۋىن باقىلاۋ جونىندەگى 1-14 ناۋرىز ارالىعىنداعى №1 ارالىق ەسەبىن بەكىتۋ تۋرالى حاتتامالىق شەشىم قابىلداندى.
ءاليسۇلتان قۇلانباي.
ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆتىڭ ءمالىم ەتۋىنشە, قۇجاتتى ەقىۇ/دياقب 21 ناۋرىزدا جاريا ەتكەن. ول 12 بولىمنەن تۇرادى, ونىڭ نەگىزگى بولىگىندە سايلاۋدىڭ قۇقىقتىق بازاسىنا قىسقاشا شولۋ جاسالعان. سونداي-اق قۇجات كەزەكتەن تىس پرەزيدەنت سايلاۋىنا بايلانىستى اكىمشىلەندىرۋ جۇيەسى, كانديداتتاردى ۇسىنۋ مەن تىركەۋ ءتارتىبى, بۇقارالىق اقپارات قۇرالدارىنىڭ قىزمەتى, ازاماتتاردىڭ ارىز-شاعىمدارىن قاراۋ ءتارتىبى مەن پروتسەدۋرالارى, بايقاۋشىلار قىزمەتىنىڭ قۇقىقتىق نەگىزدەرى سياقتى ءبىرقاتار ماسەلەلەردى قامتيدى.
ەسەپ نەگىزىنەن اقپاراتتىق بەيتاراپ سيپاتقا يە. وندا ورتالىق سايلاۋ كوميسسياسىنىڭ سايلاۋعا ازىرلەنۋ مەن ونى وتكىزۋ جۇمىستارىن جاقسى جۇرگىزىپ جاتقاندىعى, وسك ءوزىنىڭ ءماجىلىستەرىن تۇراقتى تۇردە وتكىزىپ, ونى قوعامعا بارىنشا اشىق ۇيىمداستىرىپ جۇرگەندىگى ايتىلعان. ەسەپتىڭ مالىمەتتەرى بويىنشا, وسك جۋرناليستەرمەن سايلاۋعا بايلانىستى بريفينگتەردى دە تۇراقتى وتكىزىپ, اقپاراتتىق ۆەب-سايتىنا مالىمەتتەر ورنالاستىرىپ وتىرادى.
– حالىقارالىق ۇيىم ميسسياسىنىڭ ەسەبىندە سايلاۋدى ۇيىمداستىرۋشىلاردى وقىتۋ, سايلاۋشىلاردى سايلاۋدىڭ وتەتىندىگىنەن حاباردار ەتۋ ماقساتىندا جۇرگىزىپ جاتقان جۇمىستارى دا جاقسى باعالانعان, – دەدى وسك باسشىسى ق.تۇرعانقۇلوۆ وسى تۋرالى. – ەسەپتە ساراپشىلاردىڭ سايلاۋدى ۇيىمداستىرۋعا بايلانىستى سىني كوزقاراستارى دا جاريالانعان. ولار لينگۆيستيكالىق كوميسسيانىڭ جۇمىسى مەن كوميسسيا مۇشەلەرىنىڭ پرەزيدەنتتىككە ۇمىتكەرلەردىڭ مەملەكەتتىك ءتىلدى ءبىلۋ دەڭگەيىن باعالاۋى, كانديداتتاردىڭ اقپارات قۇرالدارىنا تەڭدەي قولجەتىمدىلىگىن قامتاماسىز ەتۋى جانە اقپارات قۇرالدارىنداعى كانديداتتار تۋرالى ماتەريالداردىڭ جاريالانۋى سياقتى سان ءتۇرلى ءماسەلەلەردى قامتيدى. ساراپشىلار تاراپىنان بەرىلگەن سىني باعالاردىڭ اراسىندا ناقتى فاكتىلەرمەن دالەلدەۋدى جانە سايلاۋعا قاتىستى زاڭدار مەن حالىقارالىق تالاپتاردىڭ ناقتى باپتارىنا سىلتەمە جاساپ, دالەلدەۋدى قاجەت ەتەتىن ماسەلەلەر دە بار.
* * *
كەشە ورتالىق سايلاۋ كوميسسياسى سىرتقى ىستەر مينيسترلىگىنىڭ ۇسىنۋىمەن كەزەكتەن تىس پرەزيدەنت سايلاۋىنا بايقاۋشى رەتىندە قاتىساتىن حالىقارالىق ۇيىمدار مەن شەت مەملەكەتتەردىڭ 328 بايقاۋشىسىن تىركەدى.
وسك مۇشەسى تاتيانا وحلوپكوۆانىڭ حاباردار ەتكەنىندەي, بۇگىندە كەزەكتەن تىس پرەزيدەنت سايلاۋىنا تىركەلگەن بايقاۋشىلاردىڭ جالپى سانى 868-گە جەتتى. ولاردىڭ اراسىندا ەقىۇ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ ميسسياسىنان – 335, تمد ميسسياسىنان – 375, شىۇ ميسسياسىنان – 12, ءتورت حالىقارالىق ۇيىمنان – 22, شەت مەملەكەتتەردەن 124 بايقاۋشى بار.