«تابيعات» ەكولوگيالىق وداعىنىڭ توراعاسى پرەزيدەنتتىكتەن ۇمىتكەر مەلس ەلەۋسىزوۆ اۋىل شارۋاشىلىعى مينيسترلىگىنىڭ ورمان جانە اڭشىلىق شارۋاشىلىعى كوميتەتىندە بولىپ, اتالعان قۇرىلىمنىڭ وبلىستىق باسقارمالارىنىڭ باسشىلارىمەن كەزدەسۋ وتكىزدى.
كەزدەسۋ بارىسىندا مەلس حامزا ۇلى ەلىمىزدى جاسىل جەلەكپەن جامىلدىرۋ ىسىمەن تەك ماماندار اينالىسۋى جەتكىلىكسىز, وعان بۇكىل ەل جۇمىلۋى ءتيىس. اسىرەسە, وعان وسكەلەڭ ۇرپاق, جاسوسپىرىمدەردى تارتۋدىڭ ماڭىزى زور, دەدى. وسىعان بايلانىستى ەلىمىزدە جىل سايىن ارنايى اكتسيا ۇيىمداستىرىلۋى قاجەتتىگىن ايتقان ول ەلىمىز تاۋەلسىزدىگىنىڭ 20 جىلدىعىنا بايلانىستى اكتسيانى باستاۋعا شاقىردى.
ارينە, وتانىمىزدىڭ ۇلان بايتاقتىعىنا بايلانىستى, كوكتەم دالاعا اركەلكى كەلەدى. سوندىقتان قار جامىلعىسىن تاستاماعان جەرلەردە ونى ءوتكىزۋدىڭ ءتيىمدى جولى بار, دەپ وسكەمەن قالاسىنداعى ءبىر مەكتەپتىڭ ءادىسىن ورتاعا سالدى. وسكەمەندىك وقۋشىلار كوشەتتەردى كۇن جىلىنعانشا ىدىستارعا سالىپ ءوسىرىپ, باعىپ, كۇتىپ, ال جەر دايىن بولدى-اۋ دەگەندە بارىپ قانا وتىرعىزادى ەكەن. وسىلايشا بالالار اعاش كۇتىمىنە تارتىلادى, ال تال ەككەن تالدى كەسپەيدى, ەندەشە, ءبىز بۇدان ۇتاتىن بولامىز. جاسىل جەلەكتى كۇتىپ, باپتاپ ءوسىرەتىن بۋىن تاربيەلەپ شىعامىز, دەدى پرەزيدەنتتىكتەن ۇمىتكەر.
جالپى, اعاش وتىرعىزۋدى ءداستۇرگە اينالدىرۋ مادەنيەتىن قالىپتاستىرۋ وتە ماڭىزدى, دەگەن كانديدات, ماسەلەن, جاس جۇبايلار العاش وتاۋ قۇرعاندارىنا, كىشكەنتاي بوبەكتەرىنىڭ دۇنيەگە كەلگەنىنە ارناپ اعاش ەكسە قالالاردا تۇتاستاي قالالىق «جاس جۇبايلار» ساياباقتارى دا ومىرگە كەلەر ەدى, دەگەن پىكىرىن ءبىلدىردى. سونىمەن قاتار ومىردەن وزعان جاقىندارىمىزعا ارناپ نەگە اعاش وتىرعىزباسقا؟ مەن ءوزىم ءدال وسىلاي جاسادىم. كوز جۇمعان دوسىمنىڭ قۇرمەتىنە ءۇيىمنىڭ جانىنا اعاش ەكتىم. قازىر قاسىنان وتكەن سايىن, بۇتاقتارى كەيدە ءوزىمدى جاناپ كەتكەندە دوسىمدى اركەز ەسىمە تۇسىرەدى.
ەلدى جاسىل جەلەككە مالىندىرىپ قويۋ قازاقستاندىقتاردىڭ قولىنان كەلەتىن ءىس, ال وسىلاي جاسالسا, بۇل سىزدەردىڭ جۇمىستارىڭىزعا دا وڭ ىقپالىن تيگىزەدى. جانە مەملەكەت تاراپىنان ورمان شارۋاشىلىقتارىنا كومەك قالدىق قاعيداتىمەن جاسالماۋى ءتيىس. كەڭ مولشەردە مەملەكەت كورسەتكەن قامقورلىق ورتەنگەن ورمان القاپتارىن تەزىرەك قالپىنا كەلتىرەدى, دەدى پرەزيدەنتتىكتەن ءۇمىتكەر مەلس ەلەۋسىزوۆ.
انار تولەۋحانقىزى, استانا.