ەل پرەزيدەنتتىگىنەن ءۇمىتكەر عاني قاسىموۆ, بايقاپ وتىرساق, شەشىلمەگەن پروبلەمالارعا كوڭىل ءبولىپ قانا قويماي, ءارتۇرلى سالا قىزمەتتەرىمەن ءوزى جاقىن تانىسقان كەزدە سولاردىڭ جاقسى تاجىريبەسىن جالپى جۇرتشىلىققا پاش ەتە ءجۇرۋ ماقساتىن دا كوزدەيدى. جاقىندا پاتريوتتار پارتياسىنىڭ كوشباسشىسى «جۇقپالى اۋرۋلارعا قارسى ءدارى-دارمەكتەر عىلىمي ورتالىعى» رمك-دا بولىپ, وندا قىزمەتكەر عالىمدارمەن كەزدەسىپ ءاڭگىمەلەستى.
ع.قاسىموۆتىڭ ساياسي تۇعىرناماسىندا وتاندىق ىرگەلى جانە قولدانبالى عىلىمي زەرتتەۋلەردى ءتيىمدى دامىتۋ, ولاردى الەمدىك زياتكەرلىك رىنوگىندا ىلگەرى باستىرۋ قاجەتتىگى العا تارتىلعان. كانديداتتىڭ پايىمداۋىنشا, ناق وسى ماقساتتا ەلىمىزدىڭ مەملەكەتتىك عىلىم اكادەمياسىن قۇرۋ قاجەت.
عانەكەڭ كەلگەن عىلىمي ورتالىق جاڭا ۇلگىدەگى ۇيىم بولىپ تابىلادى. مەديتسينالىق پرەپاراتتار جاساۋ جونىندەگى جۇمىس مۇندا تەوريالىق بولجام مەن حيميا سالاسىنداعى اكادەميالىق زەرتتەۋلەر ساتىسىندا اتقارىلادى. ورتالىق قىزمەتىنىڭ ءتۇپكى ماقساتى – تاجىريبەلىك ءوندىرىستى ۇيىمداستىرۋ جانە ءازىرلەنىمدەردى كوممەرتسيالىق جولعا سالۋ.
جوبا جەتەكشىسى, قازاقستان جاراتىلىستانۋ عىلىمدارى ۇلتتىق اكادەمياسىنىڭ اكادەميگى مۇرات قۇلمانوۆ مەملەكەتتىك-جەكەمەنشىك ءارىپتەستىك ناتيجەسىندە ورتالىقتىڭ گەرمانيادا, جاپونيادا, اقش-تا, كورەيا رەسپۋبليكاسىندا وندىرىلگەن الەمدىك دەڭگەيدەگى بىرەگەي جابدىقتارعا يە بولىپ وتىرعاندىعىن اتاپ كورسەتتى. مىسالى, مەكەمە زەرتحاناسىندا ساتىپ الۋ ءۇشىن اقش كونگرەسىنىڭ ارنايى رۇقساتى تالاپ ەتىلەتىن اسپاپ-قۇرالدار بار كورىنەدى. بۇلاردى الۋ قازاقستاننىڭ الەمدىك عىلىمداعى بيىك بەدەلى ارقاسىندا مۇمكىن بولعان.
پرەزيدەنتتىكتەن ۇمىتكەر شەتەلگە شىققاندا ءارتۇرلى عىلىمي ورتالىقتاردا بولىپ, ولاردىڭ جۇمىسىمەن تانىس بولعاندىقتان, ماسەلەگە قانىقتىعىن بايقاتتى. ول قازاقستاندىق عىلىمي ورتالىق وسىنداي شەتەلدىك مەكەمەلەرگە دەس بەرمەيتىنىنە, ءتىپتى كوپ جاعدايلار بويىنشا ولاردان اسىپ تۇسەتىندىگىنە جۇرتتى سەندىردى. پارلامەنت سەناتىنىڭ دەپۋتاتى رەتىندە عاني ەسەنگەلدى ۇلى ءوزى وسى ورتالىققا ۇدايى قولۇشىن بەرىپ تە كەلەدى ەكەن.
قازىرگى ۋاقىتتا ۆەتەرينارلىق جانە مەديتسينالىق ەمدىك ءدارى-دارمەكتەر تاجىريبەلىك ءوندىرىسىنىڭ قۋاتتىلىعى تاۋلىگىنە 14 مىڭ قۇتىعا دەيىن جەتىپ وتىر. ورتالىق قىزمەتكەرلەرى ءدارىلەردى كاپسۋل, تابلەتكا, ەگۋ ەرىتىندىسى تۇرىندە دە شىعارادى.
پرەزيدەنتتىكتەن ۇمىتكەر ءوز ىقىلاسى تۇسكەن ورتالىق ۇجىمىنىڭ وسىنداي ىزگىلىكتى باعىتتا جۇمىس ىستەپ جاتقاندىعىنا ءسۇيىنىشىن جاسىرمادى.
قورعانبەك امانجول, الماتى.
سۋرەتتى تۇسىرگەن بەرسىنبەك سارسەنوۆ.