كەشە قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ شۆەيتساريا پرەزيدەنتى – سىرتقى ىستەر فەدەرالدىق كەڭەسشىسى (مينيستر) ميشلين كالمي-رەيمەن تەلەفون ارقىلى سويلەستى, دەپ حابارلادى قر ءسىم-ءىنىڭ ءباسپاسوز قىزمەتى.
كەزدەسۋ بارىسىندا سۇحباتتاستار قازىرگى تاڭدا ايتارلىقتاي وڭ ناتيجەگە يە بولىپ وتىرعان ەكىجاقتى قارىم-قاتىناستىڭ پەرسپەكتيۆالى باعىتتارىن تالقىلادى. ۇستىمىزدەگى جىلدىڭ كوكتەمىندە ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ ءماجىلىسىن ءوتكىزۋ تۋرالى ۋاعدالاستىققا قول جەتكىزىلدى. وندا اتالعان باعىتتى ودان ءارى كەڭەيتۋ جانە تەرەڭدەتۋ جونىندە ناقتى شارالار تالقىلاناتىن بولادى.
ق.ساۋداباەۆ سونداي-اق, سۇحباتتاسىن كەزەكتەن تىس پرەزيدەنتتىك سايلاۋعا دايىندىق بارىسىمەن تانىستىرىپ, قازاقستاننىڭ الداعى ەلەكتورالدىق ناۋقاندى حالىقارالىق ستاندارتتارعا ساي ءوتكىزۋگە نيەتتى ەكەنىن اتاپ كورسەتتى.