باعا قوستانايدا دا كوتەرىلىپ تۇر. جاقىندا وبلىس اكىمى سەرگەي كۋلاگين وبلىستاعى اۋىلشارۋاشىلىق تاۋار ءوندىرۋشىلەرىمەن, ۇقساتۋ كاسىپورىندارىنىڭ باسشىلارىمەن, قالالارداعى ساۋدا ورىندارىنىڭ, بازارلار مەن سۋپەرماركەت يەلەرىمەن جانە ازىق-ت ۇلىك تۇرلەرىن كوتەرمە تاسىمالداۋشىلارمەن كەزدەسۋ وتكىزدى. ارينە, اڭگىمە قازىعى وبلىس وڭىرىندە وندىرىلەتىن جانە سىرتتان اكەلىنەتىن الەۋمەتتىك ماڭىزدى تاۋارلارعا باعانى تۇراقتاندىرۋ ماسەلەسىنە بايلاندى.
كەدەسۋدە وبلىس باسشىسى ايماق ەكونوميكاسىن جانە الەۋمەتتىك سالانى دامىتۋداعى بيزنەستىڭ قوسقان ۇلەسىنە لايىقتى باعا بەردى. وڭىردەگى قوعامدىق-ساياسي جاعدايدىڭ تۇراقتىلىعىن, حالىقتىڭ ءال-اۋقاتىن جاقسارتۋ جولىندا كاسىپكەرلەرمەن بىرلەسە, تۇسىنىستىكپەن جۇمىستار اتقارىلعاندىعىن دا اتاپ ءوتتى. جالپى, بيزنەستى دامىتۋ ءۇشىن كاسىپكەرلەرگە مەملەكەت تاراپىنان جاسالىپ وتىرعان قولداۋ, جەڭىلدىكتەر دە اۋىز تولتىرىپ ايتارلىقتاي.
وبلىس اكىمىنىڭ ورىنباسارى ن.ءسادۋاقاسوۆ كەزدەسۋگە قاتىسۋشىلاردى اۋىلشارۋاشىلىق جىلىنىڭ قورىتىندىلارىمەن تانىستىرىپ ءوتتى جانە وڭىردەگى ازىق-ت ۇلىك تاۋارلارى باعاسىنا تالداۋ جاسادى. وبلىستا باعانىڭ بوجىسىن بوساتپاۋ ءۇشىن از جۇمىس اتقارىلعان جوق. تۇراقتاندىرۋ قورىنىڭ ارقاسىندا تەك بيىل عانا ەمەس, بىرنەشە جىلدان بەرى نان مەن نان ونىمدەرىنە باعا بىرقالىپتى دەڭگەيدەن وزگەرگەن ەمەس. بيىل دا وبلىس قالالارى مەن اۋىلدارداعى كەز كەلگەن دۇكەندەردە ناننىڭ باعاسى كوتەرىلگەن جوق. قىمباتشىلىق سالقىنىن بىلدىرمەۋ ماقساتىندا الەۋمەتتىك دۇكەندەر مەن ساۋدا نۇكتەلەرى جەتكىلىكتى مولشەردە اشىلدى. سونىمەن قاتار رەسپۋبليكانىڭ وزگە وبلىستارى مەن جاقىن شەت ەلدەردەن كوكونىس جەتكىزۋ ورتالىقتاندىرىلدى, قوعامدىق مال مەن اۋىل-سەلوداعى جەكە قوجالىقتار ءۇشىن جەمگە سۋبسيديا بەرىلدى. رەسپۋبليكالىق بيۋدجەت ەسەبىنەن وبلىستا ءتورت ءجۇزدەن اسا شارۋاشىلىق قارجىلاي كومەك الدى.
وبلىس باسشىلىعى ۇستىمىزدەگى جىلى ايماقتا ازىق-ت ۇلىك مولشىلىعىن جاساۋ ءۇشىن بىرقاتار جۇمىستار جوسپارىن جاساپ وتىر. ءسۇت جانە ەت باعىتىنداعى مال جانە قۇس شارۋاشىلىعى باعدارلاماسى جۇزەگە اسۋدا. الدىمىزداعى كوكتەمگى دالا جۇمىستارى كەزىندە كارتوپتىڭ جانە كوكونىس القاپتارى كەڭەيتىلەتىن بولادى. كوكونىستى ساپالى ساقتاۋ ماقساتىندا قويمالار جاساقتالادى جانە وسى باعىتتا ءبىرنەشە قۇرىلىس نىساندارى دا جوسپارلانىپ وتىر.
كەزدەسۋدە وبلىس اكىمى باعانى تۇراقتاندىرۋدا وزدەرىنىڭ قارجىلىق-ەكونوميكالىق جاعدايى ءماز ەمەستىگىنە قاراماستان بۇرىنعى قالىپتاسىپ قالعان داستۇرمەن اۋداندارداعى اۋىلشارۋاشىلىق تاۋارلارىن ءوندىرۋشىلەر ۇلكەن جاۋاپكەرشىلىكتى ارقالاپ جۇرگەنىن ايتتى. سوندىقتان وبلىس باسشىسى بار جۇكتى وندىرۋشىلەرگە ارتا بەرمەي, ۇقساتۋ كاسىپورىندارىن دا ازىق-ت ۇلىك باعاسىن قۇرىقتاۋعا جاۋاپكەرشىلىكپەن اتسالىسۋعا شاقىردى. ول جاۋاپتى ادامدارعا ەتتىڭ ساتىپ الۋ ءجانە ساتىلۋ باعاسىن قاداعالاۋدى تاپسىردى. ويتكەنى, باعانى كوبىنە ورتاداعى الىپساتارلار اسپانداتىپ جىبەرەدى. مىسالى, قوستاناي اۋدانىندا سەلو تۇرعىندارىنان كيلوسىن 350 تەڭگەدەن ساتىپ العان شوشقا ەتى قوستاناي قالاسىنداعى ورتالىق بازارعا كەلگەنشە 600-700 تەڭگەگە وسەدى. باسقا ەت تۇرلەرى مەن وتكەن جىلى قۇرعاقشىلىق بولۋىنا بايلانىستى تاپشىلىق تانىتىپ وتىرعان كارتوپ باعاسى دا وسىلاي قۇبىلادى.
كەزدەسۋ سوڭىندا الەۋمەتتىك ماڭىزدى ازىق-ت ۇلىك تاۋارلارىنا باعانى تۇراقتاندىرۋ ماقساتىندا وبلىستاعى «يۆولگا-حولدينگ», «اراي حولدينگ», «ميلح» جاۋاپكەرشىلىگى شەكتەۋلى سەرىكتەستىكتەرى, «قاراسۋ–ەت» ساۋدا-ءوندىرىستىك كومپانياسى, تاعى باسقا دا ءىرى ۇقساتۋ كاسىپورىندارىمەن, ساۋدا ورىندارىمەن ەكىجاقتى مەموراندۋمعا قول قويىلدى.
ءنازيرا جارىمبەتوۆا, قوستاناي.