ەت جەۋگە دە ەپ كەرەك

دۇنيەجۇزىلىك دەنساۋلىق ساقتاۋ ۇيىمىنىڭ بولجاۋىنشا, الداعى قىرىق جىلدا ادامزاتتىڭ تاماققا دەگەن سۇرانىسى ەكى ەسە ارتادى. بۇعان ءبىرىنشى كەزەكتە الەم بويىنشا حالىق سانىنىڭ ءوسۋى جانە كوپتەگەن ەلدەردە حالىق جاعدايىنىڭ جاقسارۋى سەبەپكەر بولادى. اتالعان ۇيىمنىڭ ساراپشىلارى وسى جاعدايعا وراي ادامزاتتىڭ, اسىرەسە, ەتكە دەگەن سۇرانىسىن قاناعاتتاندىرۋ قيىنعا تۇسەتىندىگىن ايتىپ وتىر. بۇل بولجاممەن وسى ماسەلەدە بىلىكتى باسقا دا حالىقارالىق ۇيىمدار كەلىسىپ وتىر. ماسەلەن, بۇۇ ازىق-ت ۇلىك جانە اۋىل شارۋاشىلىعى ۇيىمىنىڭ ماماندارى 2050 جىلعا دەيىن-اق ادامزاتتىڭ ەتكە دەگەن سۇرانىسىنىڭ ەكى ەسە وسەتىندىگىن مالىمدەگەن. ماماندار قازىردىڭ وزىندە جەر شارىنداعى اۋىل شارۋاشىلىعىنا جارامدى جەرلەردىڭ 70 پايىزىن مال شارۋاشىلىعى جايلاپ وتىرعاندىعىن ەسكە سالا كەلە كەلەشەكتە ەت سۇرانىسىن قامتاماسىز ەتۋدىڭ وتە قيىنعا سوعاتىندىعىن, ويتكەنى جاڭا جايىلىمدىقتاردىڭ قالماعاندىعىن, سوندىقتان الداعى ۋاقىتتارى ەت باعاسىنىڭ شارىقتاي ءوسۋى مۇمكىن ەكەندىگىن ەسكەرتكەن. وسى جاعدايعا وراي اتالعان ۇيىمنىڭ ساراپشىسى حەننينگ شتاينفەلد ءىرى قارانىڭ ەتىن «بولاشاقتىڭ ۋىلدىرىعى» دەپ اتاعان. بۇل جەردە ساراپشىنىڭ نەگە سيىر ەتىنە ەكپىن ءتۇسىرىپ وتىرعانى تۇسىنىكتى بولسا كەرەك. ويتكەنى سيىر ەتىن الەمنىڭ كوپتەگەن حالىقتارى تۇتىنادى. الداعى ۋاقىتتا الەمدە ەت تاپشىلىعىنىڭ ورناۋى مۇمكىن ەكەندىگىن ەسكەرە وتىرىپ, امەريكالىق ModernMeadow كومپانياسى مال ەتى مەن تابيعي تەرىنى يندۋستريا جولىمەن ازىرلەۋدىڭ تەحنولوگياسىن ويلاپ تاپقان. مۇنداي ەت پەن تەرىنى ازىرلەۋ ۇدەرىسى بىرنەشە كەزەڭنەن تۇرادى. ەڭ الدىمەن, عالىمدار مەن ماماندار دونور مالداردان ميلليونداعان كلەتكالاردى ءبولىپ الادى. ولاردىڭ ءوزى كادىمگى مالدار نەمەسە تەرىسى ءۇشىن ءجيى ءولتىرىلىپ جاتاتىن ەكزوتيكالىق جانۋارلار بولۋى مۇمكىن. الىنعان كلەتكالار بيورەاكتورلاردا كوبەيتىلەدى. مۇنان كەيىنگى كەزەڭدە كلەتكالار بويىنداعى قورەكتىك سۇيىقتاردان اجىراتىلىپ بارىپ, ءبىر ماسساعا بىرىكتىرىلەدى. ودان كەيىن 3D بيوپرينتەرىنىڭ كومەگىمەن قاباتتاستىرىلادى. بۇل بىرىكتىرىلگەن كلەتكا قاباتتارى قايتادان بيورەاكتورعا ورنالاستىرىلىپ وسىرىلەدى. تەرى كلەتكالارى كوللاگەندى تالشىقتاردى قالىپتاستىرىپ, ەت كلەتكالارى ناعىز بۇلشىق ەت جىپشەلەرىن قۇرايتىن بولادى. بۇل ۇدەرىسكە بىرنەشە اپتا قاجەت. مۇنان كەيىن جاساندى جولمەن الىنعان بۇلشىق ەت پەن ماي تاعام ازىرلەۋ ءۇشىن قولدانىلسا, ال تەرىلەردەن كيىم, اياقكيىم, سومكەلەر ازىرلەنەدى. كومپانيا ماماندارىنىڭ ايتۋىنشا, قازىرگى تابيعي جولمەن مال وسىرۋگە قاراعاندا 3D پرينتەرى ارقىلى ەت وندىرۋگە قۋات كوزى ءۇش ەسە, سۋ 10 ەسە از جۇمسالادى, اۋانىڭ لاستانۋى 20 ەسە ازايادى. ونىڭ ۇستىنە, پايدالانىلاتىن جەر كولەمى 100 ەسەگە جۋىق قىسقارا تۇسەدى. بىلايشا ايتقاندا, جايىلىم قاجەت بولمايدى. تەك جاساندى جولمەن ءونىم الاتىن زاۋىتتى ورناتۋعا عانا جەر بولىنەدى. مامانداردىڭ پىكىرىنشە, مۇنداي جولمەن ەت ءوندىرۋ ءۇشىن ءالى تالاي ۋاقىت كەرەك. ونىڭ ۇستىنە, جاساندى ەتتى ادامزات قالاي قابىلداماق؟ ول اعزاعا قالاي اسەر ەتەتىن بولادى؟ بۇل جاعى ءالى بەلگىسىز. ونىڭ ۇستىنە, الەمدە جاساندى ەت پايدا بولعان كەزدە تابيعي جولمەن الىنعان ەتتىڭ باعاسى شارىقتاي كوتەرىلەدى دەگەن بولجام بار. شاماسى, حەننينگ شتاينفەلدتىڭ سيىر ەتىن «بولاشاقتىڭ ۋىلدىرىعى» دەپ باعالاۋى دا وسىدان بولسا كەرەك. مىنە, وسى بولجامدار ءبىزدىڭ قازاقستاننىڭ وڭ جامباسىنا ءدوپ كەلەتىندەي. بىزدە بوس جاتقان جايىلىمدىقتار جەتەدى. مال سانىن ەسەلەي ارتتىرۋدىڭ مۇمكىندىكتەرى بار. ونىڭ ۇستىنە, ەت باعاسى دا جىلدان جىلعا كوتەرىلىپ كەلەدى. ماسەلەن, استانانىڭ ىرگەسىندەگى «التىن تاعا» مال بازارىندا بىلتىر تايلار 180-200 مىڭ تەڭگەگە باعالانسا, بيىل 250 مىڭ تەڭگەدەن كەم تۇسپەي تۇر. ويلاپ قاراساڭىز, ەندىگى ۋاقىتتارى ەت جەۋگە دە ەپ قاجەت بولاتىن سەكىلدى. مەملەكەت سوڭعى جىلداردان بەرى مال شارۋاشىلىعىن دامىتۋعا ەرەكشە ەكپىن تۇسىرۋدە. وسى ءۇشىن سۋبسيديالاردىڭ كوپتەگەن ءتۇرى بەلگىلەندى. الەمدە جانە ءوز ەلىمىزدىڭ ىشىندە ءجۇرىپ جاتقان وسى وزگەرىستەردىڭ بارلىعى ازىق-ت ۇلىك سالاسىنداعى بىلىكتى حالىقارالىق ۇيىمداردىڭ ەت ماسەلەسىندەگى جاساپ وتىرعان بولجامدارىنا الدىن-الا دايىندىقتىڭ بەلگىسى ىسپەتتى. سۇڭعات ءالىپباي, «ەگەمەن قازاقستان»