«ورداباسى» فۋتبول كلۋبىنىڭ جاتتىقتىرۋشىسى باقتيار بايسەيىتوۆ «استانا» كومانداسىنىڭ بۇرىنعى شابۋىلشىسى تاڭات نوسەرباەۆ جايلى ءوز پىكىرىن ءبىلدىردى. بۇل تۋرالى vesti.kz حابارلادى.
ەلوردالىقتاردىڭ ساپىنان كەتكەننەن كەيىن نوسەرباەۆ ەركىن اگەنت رەتىندە ءجۇر. سونداي-اق, سوڭعى كەزدەرى جامبىل كوكەەۆكە دە نازار اۋدارعانى تۋرالى سىبىستار تاراعان. بۇل تۋرالى: «تاڭات شىمكەنتتەگى جالپى جيىندا بىزبەن بىرگە جاتتىقتى. ەگەر ءبارى ويداعىداي بولىپ, كوڭىلىمىزدەن شىعىپ جاتسا, كەلىسىمشارتقا وتىرامىز. ال كوكەەۆ جايلى اقپارات جالعان. مەن ءبىراز ويىنشىلارعا قىزىعۋشىلىق تانىتىپ جۇرگەنىم راس. بىراق ولاردىڭ اراسىندا جامبىل جوق», – دەدى.
سونىمەن قاتار, جاقىندا باقتيار بايسەيىتوۆتىڭ باپكەرلىك قىزمەتتەن كلۋبتىڭ باسشىلىعىنا اۋىسادى دەگەن جاڭالىقتار تاراعان. الايدا, ول اقپاراتتى دا جوققا شىعارىپ, جاتتىقتىرۋشىلىق مىندەتىن ارى قاراي جالعاستىراتىنىن مالىمدەدى.
ايتا كەتەيىك, تاڭات نوسەرباەۆ سوڭعى ءۇش جىلىن «استانادا» وتكىزدى. مۇندا ول 152 ماتچقا قاتىسىپ, 46 گولدىڭ اۆتورى اتانعان. قايرات نۇرداۋلەتوۆ كەتكەننەن كەيىن كاپيتاندىق مىندەتتى اتقاردى.
وتكەن ماۋسىمدى ءتورتىنشى ورىندا اياقتاعان «ورداباسى» بۇعان دەيىن سامات سماقوۆپەن كەلىسىمشارت مەرزىمىن ۇزارتقان. سونىمەن قاتار, شىمكەنتتىكتەر كومانداسىز جۇرگەن باۋىرجان جولشيەۆتى دە بىرنەشە رەت شاقىرعان بولاتىن.