كورىپ وتىر كوزىمىز,
شەتىمىزدەن باتىرمىز.
ءوزىمىزدى ءوزىمىز
حان كوتەرىپ جاتىرمىز.
ەگەمەندىك دەگەننىڭ
ەلدىكپەنەن ءتۇبى ءبىر.
مىڭ جاسايتىن ەمەننىڭ
تاستاي بەرىك تۇعىرى.
ءيا, ءيا, ەمەننىڭ
تامىرلارى – تۇعىرى.
ەمەن – ەمەن,
ال ەلدىڭ
ودان دا ۇزاق عۇمىرى.
اقيقات قىپ, انىق قىپ
ايتتىم. ءسوزدى قوشتاساڭ.
رۋحى مىقتى حالىقتى
جاۋ المايدى ەشقاشان!
ساعات سايىن قۇبىلعان
زامانىڭ بار, كۇنىڭ بار.
بەلىن بەكەم بۋىنعان
كوش باستاۋعا كىمىڭ بار؟
بايلامىڭدى كۇرمەپ پە ەڭ؟
اپشىڭدى باس, ابايلا.
دۇنيە-دۋمان دۇرمەكتەن
ورنىڭدى تاپ. سونى ويلا.
كوردىڭ نەبىر زوبالاڭ,
بولىنگەندى ءبورى جەپ.
وتكەنىڭنەن ساباق ال,
ەندىگىنىڭ ءجونى جوق.
بۇلتاقتاماي باس العا,
بار-جوعىڭدى تۇگەندە.
وڭاي ەمەس قاشاندا
ۇلى بولۋ ۇلى ەلگە!
ءتاڭىرى بەرسىن تىلەۋىڭ,
قارا ورمانىم – قازاعىم.
ۇلى ەلىم ءھام كيەلىم,
تارقاماسىن بازارىڭ!
جانىما قۇت, ەم-داۋا
پەيىلىڭە جاراسقان.
شەتسىز-شەكسىز كەڭ دالا,
شەتسىز-شەكسىز كوك اسپان.
وسى ايتاتىن اڭگىمەم,
كوپ سوزبايىن تەرمەلەپ.
ەلدى باستار ماڭگىگە
ەڭىرەگەن ەر كەرەك!
ويلان, جۇرتىم, پارىقتا,
كىمگە تۇسپەك تاڭداۋىڭ؟
جارىلقايتىن حالىقتى
التىن ايدار قانداي ۇل؟!
تىلەۋلى تاڭات.
استانا.