بيىل قار جاقسى ءتۇستى. رەسمي دەرەكتەرگە سۇيەنسەك, وزەندەردەگى مۇزدىڭ قالىڭدىعى 40 سانتيمەتر شاماسىندا. ونىڭ ۇستىنە, سينوپتيكتەردىڭ حابارىنا قاراعاندا, ناۋرىز ايىنىڭ ەكىنشى ونكۇندىگىندە كۇن 10 گرادۋسقا دەيىن جىلىنۋى مۇمكىن. بولجامعا سەنسەك, قاردىڭ كۇرت ەريتىن ءتۇرى بار. اقتوبە قالاسىنىڭ اكىمى ارحيمەد مۇحامبەتوۆتىڭ توراعالىعىمەن وتكەن سۋ تاسقىنىنىڭ الدىن الۋ شارالارىنا بايلانىستى ماجىلىستە كوكتەمگى سۋ تاسقىنىنا دايىندىق ماسەلەلەرى تاعى ءبىر رەت پىسىقتالدى.
قازىر قالا كوشەلەرىن قاردان تازالاۋ جۇمىستارى جالعاسۋدا. ءالى دە 70 كوشەنى تازالاۋ جوسپارلانىپ وتىر. قىس باستالعالى 40 مىڭ توننا قار شىعارىلعان. كوكتەمگى سۋ تاسقىنى كەزىندەگى شارۋالارعا 50 سۋ سوراتىن تەحنيكا, 3 ەكسكاۆاتور, 70 قۇم تاسيتىن كولىك, 8 بۋلدوزەر, ءارقايسىسىنىڭ سىيىمدىلىعى 20 تەكشە مەتر 4 جىلجىمالى سورعى ستانساسى جانە باسقا دا كولىك قۇرالدارى مەن 3 مىڭ تەكشە مەتر قۇم دايىندالعان. سۋ تاسقىنىنىڭ الدىن الۋ شارالارىنا 22 ميلليون تەڭگەدەن استام قارجى ءبولىنىپتى.
قالا ماڭىنداعى نەگىزگى ءۇش سۋ قويماسىنىڭ كوكتەمگى قار سۋىن قابىلداۋ ءجايى دە تياناقتالدى. «اقتوبەسۋشارۋاشىلىعى» مەكەمەسىنىڭ ديرەكتورى بەكزات ءنامەتوۆتىڭ مالىمدەۋىنشە, ەڭ ءۇلكەن قارعالى سۋ قويماسىندا قازىرگى كۇنى 42 ميلليون تەكشە مەتر سۋ بار. ونىڭ جالپى سىيىمدىلىعى – 280 ميلليون تەكشە مەتر. سوندىقتان ءالى دە 240 ميلليون تەكشە مەتر سۋدى قابىلداي الادى. ال اقتوبە سۋ قويماسى 145 ميلليون تەكشە مەتر سۋدى قابىلداسا, سازدى سۋ قويماسىنا 5 ميلليون تەكشە مەتر سۋ كەتەدى.
«اقتوبە سۋدان قۇتقارۋ قىزمەتى» مەكەمەسىنىڭ باستىعى قاسىمجان بايساداقوۆ سۋدان قۇتقارۋ بريگادالارىنىڭ كوكتەمگى سۋ تاسقىنى جۇمىستارىنا ساقاداي-ساي دايىندىعىن ءمالىمدەدى. توتەنشە جاعدايلار تۋىنداعان جاعدايدا قۇتقارۋ قايىقتارى, جانار-جاعار ماي, ءدارى-دارمەكتەر, باسقا دا قاجەتتى زاتتار جەتكىلىكتى.
كوكتەمگى سۋ تاسقىنىنىڭ الدىن الۋ ءىس-شارالارىن ءجۇرگىزۋ ءۇشىن قۇرىلعان ارنايى كوميسسيانىڭ قۇرامى بەكىتىلدى. جۇمىس جوسپارى جاسالىپ, 8 جەدەل توپ جاساقتالدى. جەدەل توپتار وزدەرىنە بەكىتىلگەن ايماقتاردا تاۋلىك بويىنا كەزەكشىلىك ۇيىمداستىرىپ, ەرىگەن قار سۋىنىڭ قاۋىپتى جاعدايىن قاداعالايتىن بولادى.
قازاقتا «ساقتانساڭ ساقتارمىن» دەگەن ءسوز بار. وتكەن جىلعى شىعىس قازاقستان جانە الماتى وبلىستارىنداعى سۋ تاسقىنى كەزىندەگى وقيعالار ءتىلسىز جاۋدان ءارقاشان ساقتانۋدىڭ اششى ساباقتارى بولدى. سوندىقتان دا قالا باسشىلارىنىڭ كوكتەمگى سۋ تاسقىنىنان ەشكىمنىڭ زارداپ شەكپەۋىن وسى باستان ويلاستىرۋى قۇپتارلىق ءىس.
ساتىبالدى ءساۋىرباي.
اقتوبە وبلىسى.