11 ناۋرىز كۇنى جاپونيانى شارپىعان سۇراپىل تابيعي اپاتقا بايلانىستى قازاقستان پرەزيدەنتى نۇرسۇلتان نازارباەۆ كۇنشىعىس ەلىنىڭ حالقىنا كوڭىل ايتۋ جەدەلحاتىن جولداعانى بەلگىلى.
قازاقستان وسىنشاما قاسىرەتتى كەزەڭدە دوستاس جاپون حالقىنا جان-جاقتى جاردەم بەرۋگە, ونىڭ ىشىندە گۋمانيتارلىق كومەك, قۇتقارۋشىلار مەن وزگە دە قاجەتتى مامانداردى جىبەرۋ ارقىلى قولۇشىن بەرۋگە دايىن ەكەندىگىن ءبىلدىردى. بۇگىنگى تاڭدا جاپون تارابى كومەكتىڭ ناقتى مولشەرى مەن ءتۇرىن ايقىنداۋدا.
توكيوداعى قازاقستان ەلشىلىگى تاۋلىك بويى ۇزدىكسىز جۇمىس ىستەپ, جاپونيا اۋماعىندا تۇراقتى جانە ۋاقىتشا تۇراتىن وتانداستارىمىزدىڭ ورنالاسقان جەرلەرىن انىقتاۋدا. قازىرگى كەزدە زارداپ شەككەندەردىڭ قاتارىندا قازاقستاندىقتار جوق.
سونىمەن بىرگە, جاپونياداعى تۋىسقاندارىنىڭ تاعدىرىنا الاڭداۋشىلىق ءبىلدىرىپ وتىرعان وتانداستارىمىزدىڭ كوپتەگەن وتىنىشتەرىن نازارعا الا وتىرىپ, ەلىمىزدىڭ ازاماتتارىن ۇيىمداسقان تۇردە قازاقستانعا جەتكىزۋ جونىندە شەشىم قابىلداندى. بۇل شارانى سىرتقى ىستەر جانە توتەنشە جاعدايلار مينيسترلىكتەرى بىرلەسىپ اتقارۋدا, دەپ حابارلادى قر ءسىم-ءىنىڭ ءباسپاسوز قىزمەتى.