مەملەكەت باسشىسى نۇرسۇلتان نازارباەۆ ۇلتتىق بانك توراعاسى گريگوري مارچەنكونى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
گ.مارچەنكو پرەزيدەنتكە قازاقستاننىڭ ۆاليۋتا نارىعىنداعى جاعداي تۋرالى بايانداپ بەردى. قازاقستان رەسپۋبليكاسىنىڭ ۇلتتىق بانكى 2011 جىلدىڭ باسىنان بەرى 6 ميلليارد اقش دوللارىن ساتىپ العان. تەڭگەنىڭ اقش دوللارىنا شاققانداعى باعامى 1,25 پايىزعا نىعايدى.
– مۇنىڭ اقشا اگرەگاتىنىڭ ۇلعايۋىنا جانە ينفلياتسياعا ەشبىر اسەرى بولعان جوق. اتالعان جاعداي ءبىزدىڭ ەكونوميكامىزدىڭ باسەكەگە قابىلەتتىلىگى ءۇشىن پروبلەما تۋعىزبايدى. سەبەبى, ەۋرو, رەسەي ءرۋبلى, قىتاي ءيۋانى سەكىلدى وزگە ۆاليۋتالار اقش دوللارىنا شاققاندا ەداۋىر جوعارى قارقىنمەن نىعايۋدا. سوندىقتان ءبىز ۇلتتىق بانكتىڭ باقىلاۋىمەن اقش دوللارىنا شاققاندا تەڭگەنى نىعايتا الامىز جانە بۇل قازاقستاندىق ەكونوميكانىڭ باسەكەگە قابىلەتتىلىگىن تومەندەتۋگە جول بەرمەيدى, – دەدى ۇلتتىق بانك توراعاسى جۋرناليستەرگە ارنالعان بريفينگ بارىسىندا.