NewEnergy ەنەرگەتيكا سالاسىنداعى دۇنيەجۇزىلىك ستارتاپ بايقاۋىنىڭ جەڭىمپازدارى ماراپاتتالدى. سونداي-اق ەكسپو-2017 حالىقارالىق كورمەسىندە تانىستىرىلاتىن بالامالى ەنەرگەتيكا جانە «جاسىل» ەكونوميكا سالاسىنداعى 30 ۇزدىك ستارتاپ-كومپانيانى تاڭدالدى. بۇل تۋرالى egemen.kz پرەمەر-ءمينيستردىڭ رەسمي سايتىنا سىلتەمە جاساپ حابارلايدى.
تاڭدالعان جوبالاردىڭ كوبىسى يزرايلگە تيەسىلى. ەكسپو-2017-دە ەنەرگەتيكا سالاسىنداعى ءوز ازىرلەمەلەرىن Eco Wave Power, Farm Dog, GreenQ, HomeBiogas, Tevva Motors Ltd, Unleash the light كومپانيالارى ۇسىنادى.
جەڭىمپازداردىڭ قاتارىنا جوعارى تەحنولوگيالىق ەنەرگيا شوعىرلاندىرۋشى جۇيەلەردى شىعاراتىن قازاقستاندىق Primus Power كومپانياسى دا كىردى. سونىمەن قاتار, جەڭىمپازداردىڭ قاتارىندا ۇلىبريتانيانىڭ (Kelda Technology, DAJIE), ءۇندىستاننىڭ (Promethean Energy Pvt. Ltd., REConnect Energy Solutions Pvt. Ltd.), اقش-تىڭ (Volta, Inficold Inc.), اۆستراليانىڭ (Lightwork), گەرمانيانىڭ (Breeze), يسپانيانىڭ (ezzingSolar), نيدەرلاندىنىڭ (Sympower), پولشانىڭ (Lerta), رەسەيدىڭ (WiseSoil), ۋكراينانىڭ (Ecoisme) جانە وزگە دە ەلدەردىڭ كومپانيالارى بار. ولاردىڭ جالپى سانى 20-دان اسادى.
بۇدان وزگە, قازاقستاننىڭ (Smart Slip, Primus Power), ءيزرايلدىڭ, اقش پەن رەسەيدىڭ التى كومپانياسى ينۆەستورلاردىڭ قارجىلىق قولداۋىنا يە بولدى. سونىڭ ىشىندە ءوز ستارتاپىن دامىتۋ ءۇشىن بيزنەس-مەنەدجمەنت كۋرسىنان وتۋگە سەرتيفيكات تابىستالدى.
ەسكە سالا كەتەيىك, كەشە استانادا قازاقستاننىڭ ەنەرگەتيكا مينيسترلىگىنىڭ ۇيىمداستىرۋىمەن ەنەرگەتيكا سالاسىنداعى NewEnergy ستارتاپ بايقاۋى ءوتتى. وعان 37 ەلدەن بالامالى جانە جاڭعىرتپالى ەنەرگەتيكا, «جاسىل» ەكونوميكا جانە smart-تەحنولوگيالار سالاسىنداعى وزدەرىنىڭ بىرەگەي جوبالارىن ۇسىنعان 100 ستارتاپ-كومپانيا قاتىستى.