استانا قالاسىنىڭ ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى جانە «جاستار تەاترىنىڭ» ۇجىمى ورتالىق ازيا مەملەكەتتەرىنىڭ VI حالىقارالىق تەاترلار فەستيۆالىندە جەڭىسكە جەتتى. فەستيۆال 24-27 قازان ارالىعىندا تالدىقورعاندا ءوتتى. وعان قازاقستان, قىرعىزستان, تاجىكستان, تاتارستان جانە وزبەكستاننىڭ ۇزدىك ۇجىمدارى قاتىستى.
ەلوردالىق قازاق دراما تەاترىنىڭ اكتەرلارى ا. چەحوۆتىڭ «شيە باعى» كومەدياسىن قويىپ, گران-پري يەلەندى, دەپ حابارلايدى استانا قالاسىنىڭ مادەنيەت, مۇراعاتتار جانە قۇجاتتاما باسقارماسىنىڭ ءباسپاسوز قىزمەتى.
سپەكتاكلدى قويۋشى تانىمال تەاتر جانە كينو رەجيسسەرى, «زولوتايا ماسكا» رەسەيلىك ۇلتتىق تەاتر سىيلىعىنىڭ يەگەرى - سەرگەي پوتاپوۆ. باستى ءرولدى سومداعان - «زولوتوي ۆيتياز-2015» حالىقارالىق تەاتر فەستيۆالىنىڭ ديپلومانتى اقمارال تاناباەۆا. سونداي-اق, ساحنا تورىندە «قاللەكي» تەاترىنىڭ ارتىستەرى, قازاقستان رەسپۋبليكاسىنىڭ ەڭبەك سىڭىرگەن قايراتكەرلەرى - كەڭەس نۇرلانوۆ, قۋاندىق قىستىقباەۆ, نۇركەن وتەۋىلوۆ, «دارىن» جاستار سىيلىعىنىڭ يەگەرى سىرىم قاشكاباەۆ جانە ت.ب. ونەر كورسەتتى.
ال ەلوردالىق «جاستار» تەاترىنىڭ ۇجىمى بۇل فەستيۆالدە ءبىرىنشى ورىن الدى. تەاتر اكتەرلارى شەكسپيردىڭ «اساۋعا تۇساۋ» قويىلىمىن كورسەتتى. سپەكتاكلدىڭ قويۋشى رەجيسسيورى قازاقستان رەسپۋبليكاسىنىڭ ەڭبەك سىڭىرگەن قايراتكەرى نۇرقانات جاقىپباي بولدى.