قازاقستاندا 2017 جىلى وتەتىن 28-ءشى قىسقى ۋنيۆەرسياداعا ەرىكتىلەردى ىرىكتەۋ باستالدى. شاراعا بارلىعى 3 مىڭ ادامدى ىرىكتەۋ جوسپارلانعان.
ۋنيۆەرسيادا كەزىندە ەرىكتىلەر 30 فۋنكتسيونالدى باعىتتا جۇمىس اتقارىپ, الماتىعا كەلگەن سپورتشىلارعا, باپكەرلەرگە, دەلەگاتتارعا جانە تۋريستەرگە قاجەتتى قىزمەت كورسەتەدى.
«ۋنيۆەرسياداعا دايىندىق بارىسىندا ەرىكتىلەردى ترەنينگتەردەن وتكىزىپ قانا قويماي, ولاردىڭ كوشباسشىلىق جانە ۇيىمداستىرۋشىلىق قاسيەتتەرىن دامىتۋ ءۇشىن ءتۇرلى كوماندالىق ويىندار ۇيىمداستىرامىز. ەرىكتىلەردى تارتۋعا قازاقستاندىق اكتەرلار مەن شوۋ-بيزنەس وكىلدەرى كومەكتەسۋدە», دەدى 2017 جىلعى ۋنيۆەرسياداعا دايىندالۋ مەن وتكىزۋ ديرەكتسياسى باسشىسىنىڭ ورىنباسارى كاميلا لۇقپانوۆا.
ديرەكتسيانىڭ مالىمەتىنشە, 2017 جىلعى ۋنيۆەرسياداعا رەسەي, گەرمانيا, بەلارۋس, پولشا, كورەيا, قىتاي, اقش, ۇلىبريتانيا جانە قىرعىزستاننان حالىقارالىق ەرىكتىلەر ەرەكشە قىزىعۋشىلىق تانىتۋدا.
«2017 جىلعى ۋنيۆەرسيادا كەزىندە 100 حالىقارالىق ەرىكتىنى جۇمىلدىرۋدى جوسپارلاۋدامىز. ولاردىڭ بارلىعى كەز-كەلگەن اۋا-رايىنا ارنالعان سپورتتىق كيىممەن, تاماقپەن, ۇيالى بايلانىسپەن قامتاماسىز ەتىلەدى. سونداي-اق, قالادا كولىكپەن ەركىن جۇرۋگە مۇمكىدىك الادى. ەرىكتى بولۋعا نيەتى بار كەز-كەلگەن ادام almaty2017.com سايتىنا كىرىپ, ساۋالناما تولتىرا الادى», دەپ اتاپ ءوتتى ك. لۇقپانوۆا.
ەگەمەن-اقپارات