وندىرىستىك قۋاتى تاۋلىگىنە 80 تونناعا جەتەتىن جاڭا كاسىپورىن وبلىس ورتالىعىنىڭ تۇرعىندارىن عانا ەمەس, سەرىكتەس قالالاردى دا نان-توقاش ونىمدەرىمەن تولىقتاي قامتاماسىز ەتەتىن بولادى.
«دامۋ» قورىنىڭ قولداۋىمەن سالىنىپ جاتقان جاڭا كاسىپورىننىڭ ىرگەتاسى بيىلعى جىلدىڭ ءساۋىر ايىندا قالانعان بولاتىن. سوعان قاراماستان, جۇمىس قارقىندى ءجۇرىپ, بۇگىنگى كۇندە قۇرىلىسشىلار ءىشكى ارلەۋ-وڭدەۋ جۇمىستارىن اياقتاۋعا جاقىنداپ, قۇرال-جابدىقتاردى ورناتىپ جاتىر. جابدىق دەمەكشى, ونىڭ بارلىعى ەۋروپانىڭ ەڭ ۇزدىك زاۋىتتارىنان جەتكىزىلىپتى. ءبارى بىردەي شەتەلدىكى دەپ ايتۋعا تاعى بولماس, عيماراتتى سالۋعا كەتكەن قۇرىلىس ماتەريالدارىنىڭ تۇگەلى وزىمىزدە جاسالعان وتاندىق ونىمدەر ەكەن. مۇنى بىزگە «سارىارقا نان قاراعاندى» جسش باس ديرەكتورى ۆالەنتين كاراكاليۋك ايتىپ بەردى.
– مەن, – دەيدى ۆ.كاراكاليۋك, – قالادا شىعارىلاتىن نان ونىمدەرىنىڭ تۇگەلىنىڭ ءدامىن تاتتىم. ءدال قازىر بۇلاردىڭ ءبارىنەن دە ءدامدى نان پىسىرەمىز دەپ سەنىممەن ايتا الامىن...
جاڭا زاۋىتتا قالىپتى نان جانە باتون شىعاراتىن اۆتوماتتى ەكى جۇيە بولماق. تاعى ەكەۋى بولكە نان مەن توقاش ءپىسىرۋگە ارنالادى. سونىمەن قاتار, كونديتەر جانە قاباتتاما تسەحتارى دا سالىنۋدا. زاۋىت باسشىلارىنىڭ ايتۋىنشا, جاڭا كاسىپورىن كونۆەيەرىنەن شىققان ونىمدەردىڭ باعاسى باسقا وندىرۋشىلەردىكىنەن جوعارى بولمايدى. ال ساپا جاعىنان كەلگەندە, ماقسات – ءباسەكەلەستەردى باسىپ وزۋ. بۇل يگى ءىستىڭ جۇزەگە اسىرىلۋىن زاۋىتتاعى ارنايى زەرتحانا قاتاڭ تۇردە قاداعالاپ وتىرادى.
نان زاۋىتى ىسكە قوسىلعان كەزدە مۇندا 400-دەن استام ادام ەڭبەك ەتەتىن بولادى. قازىردىڭ وزىندە سىننان سۇرىنبەي وتكەن ناۋبايحاناشىلار جۇمىسقا الىنىپ جاتىر. تىلەك بىلدىرگەندەردىڭ كوپتىگىنە قاراعاندا, كاسىپورىننىڭ جۇمىسشى كادردان تارىقپايتىنى بەسەنەدەن بەلگىلى. جۇمىسقا قابىلدانعان قىزمەتكەرلەردى جاڭا قوندىرعىلاردىڭ ءتىلىن بىلۋگە ءتاجىريبەلى تەحنولوگتار مەن ينجەنەرلەر وقىتاتىن كورىنەدى.
قىزمەت كورسەتۋ سالاسىنا كەلسەك, قازىرگى تالاپتىڭ ءبىرى – تۇتىنۋشى ناندى بۋى بۇرقىراعان ىستىق كۇيىندە العاندى قالايدى. ياعني, تاڭ اتار-اتپاستان پەشتەن جاڭا عانا شىققان نان دۇكەن سورەلەرىندە تۇرۋى كەرەك. سوندىقتان دا مۇندا ءوندىرىستىڭ دامۋى ءوز الدىنا, ءونىمدى جەتكىزۋ مەن وتكىزۋگە دە باسا كوڭىل بولىنگەن. باس ديرەكتوردىڭ ايتۋىنشا, نان-توقاش ونىمدەرىنىڭ ساتىلىمدا جوعارى ناتيجەگە جەتۋىنە لوگيستيكانىڭ ىقپالى زور بولماقشى. سوندىقتان زاۋىت جانىنان جونەلتىم ايماعى سالىنىپ, جەكە كولىك تسەحى قۇرىلعان. ونىڭ قۇرامى قازاقستاندا جاساپ شىعارىلعان 57 جاڭا نان تاسۋشى اۆتوموبيلدەن تۇرادى. بۇدان بولەك, زاۋىتتىڭ ءوز مەنشىگىندەگى تۇراقتى دۇكەندەر جەلىسى دە سالىنباقشى. تەك قانا زاۋىت ونىمدەرىن ساتاتىن بۇل ساۋدا نۇكتەلەرىنىڭ سانى 47-گە جەتكىزىلەدى. ولاردىڭ ارقايسىسىنىڭ اۋماعى 30 شارشى مەتردى قۇرايتىن بولادى دەپ جوسپارلانعان.
جاڭا زاۋىتتىڭ وتىز جىلدان بەرى نان ءپىسىرۋ سالاسىندا ەڭبەك ەتىپ كەلە جاتقان تاجىريبەلى باسشىسىنىڭ پايىمداۋىنشا, ادامدار ىلعي دا وزدەرىنىڭ اتا-اناسى جەگەن نان ونىمدەرىن تۇتىنۋعا بەيىلدى بولىپ تۇرادى ەكەن. دەگەنمەن, قازاقستاندىق ناۋبايحاناشىلار قولدانىپ جۇرگەن ەسكى رەتسەپتتەردى بىرتە-بىرتە جاڭا تەحنولوگيالارمەن الماستىرۋ باسىم باعىتتاعى شارۋالاردىڭ ءبىرى بولىپ وتىر. مىسالى, زاۋىتتاعى ۇن قاپتالماعان ءادىس بويىنشا ساقتالماق. ۇن ساقتايتىن قويمانىڭ قابىرعاسى تات باسپايتىن بولاتتان جاسالعان. مۇنداي قويمالار بۇكىل ەۋروپانىڭ وزىندە ءبىردى-ەكىلى جەردە عانا كەزدەسەدى ەكەن.
ناننىڭ ءدامدى بولىپ ءپىسۋى ۇنىنا دا بايلانىستى. جاڭا زاۋىتقا ۇن جەتكىزۋشىلەر قازىردىڭ وزىندە بەلگىلى. ولاردىڭ بارلىعى دا جەرگىلىكتى استىق وندىرۋشىلەر. تاڭداۋدىڭ بۇلايشا ءتۇسۋى دە تەگىن ەمەس. نەگە دەسەڭىز, ورتالىق قازاقستاندا وسىرىلەتىن قاتتى بيداي سۇرىبى كەڭەستىك كەزەڭنەن كەيىنگى كەڭىستىكتەگى ناۋبايحاناشىلار اراسىندا جوعارى سۇرانىسقا يە ەكەن.
بابىنا جەتپەگەن اشىتقىسىز ناننىڭ ءدامى تاتىپ العىسىز بولادى. سوندىقتان دا جاڭا كاسىپورىن اشىتۋ ءبولىمىنىڭ جۇمىسىنا ەرەكشە ءمان بەرمەكشى. بۇل جەردە فرانتسيادان اكەلىنەتىن اشىتقى داقىلدارى نەگىزىندە اشىتىلعان ءسۇت ونىمدەرى اشىتقىسى پايدالانىلاتىن قامىر ساقتالاتىن بولادى.
جالپى, سوڭعى جىلدارى وبلىستا نان جانە نان-توقاش ونىمدەرىن شىعاراتىن كاسىپورىندارعا دەگەن كوزقاراس ەرەكشە. مىسالى, بىلتىر بالقاش قالاسىندا دا 140-قا تاياۋ ادامدى جۇمىسپەن قامتىعان جاڭا نان زاۋىتى سالىنعان بولاتىن. قىسقا عانا ۋاقىت ىشىندە بوي كوتەرگەن, زاماناۋي تالاپتارعا ساي بۇل كاسىپورىننىڭ بۇگىندە 60-تان استام اسا ساپالى نان ونىمدەرىن شىعارىپ, جۇرتتىڭ ىستىق ىقىلاسىنا ءبولىنىپ وتىرعانى بەلگىلى.
ءبارىن ايت تا, ءبىرىن ايت, ارقا ءوڭىرى تۇرعىندارىنىڭ اق داستارقانىنان بۇگىنگى تالاپقا ساي تەحنولوگيامەن پىسىرىلگەن, ءدامى ءتىل ۇيىرەتىن نان-توقاش ءونىمدەرىنىڭ ۇزىلمەيتىندىگى قۋانتادى.
قايرات ءابىلدينوۆ,
«ەگەمەن قازاقستان»
قاراعاندى