بۇگىن استانادا 10 مىڭنان استام كوشەت وتىرعىزىلدى. بۇل «استانا – تازا قالا!» جالپىقالالىق سەنبىلىگى اياسىندا ۇيىمداستىرىلدى. اعاش وتىرعىزعانداردىڭ قاتارىندا استانا قالاسى اكىمى اسەت يسەكەشەۆ تە بار.
«ءبارىمىز دە قالامىزدى جاقسى كورەمىز, ەلوردامىزدى تازارتۋعا جانە كوركەيتۋگە ۇلەس قوسايىق. سەنبىلىكتەر وسكەلەڭ ۇرپاقتى دا, ەرەسەكتەردى دە تازالىققا تاربيەلەيدى. وسىلايشا, ءبىز قالامىزعا دەگەن سۇيىسپەنشىلىگىمىزدى جەتكىزىپ, پاتريوتتىق تانىتامىز», – دەدى استانا قالاسىنىڭ اكىمى ءا.يسەكەشەۆ.
اكىمنىڭ ايتۋىنشا, قالالىق بيلىك ەلوردانى كوگالداندىرۋ, بارلىق اۋدانداردا جانە شاعىن اۋدانداردا گۇلباقتار مەن ساياباقتار سانىن ارتتىرۋدى ءوز الدىنا مىندەت ەتىپ وتىر.
قالا اكىمدىگىنىڭ ءباسپاسوز قىزمەتى تاراتقان مالىمەتكە سۇيەنسەك, جالپىقالالىق سەنبىلىككە 89 مىڭنان استام ادام, سونىڭ ىشىندە كاسىپورىندار مەن ۇيىمداردىڭ 4 مىڭعا جۋىق قىزمەتكەرى, 45 جوعارى جانە ورتا ارنايى وقۋ ورنى, 133 مەكتەپكە دەيىنگى جانە ءبىلىم بەرۋ مەكەمەسى قاتىستى, 430 ارنايى تەحنيكا تارتىلدى.
سەنبىلىككە قاتىسۋشىلار «الماتى» اۋدانىندا ۇلتتىق مۋزەي اۋماعىنا, «ەسىل» اۋدانىندا «حان – شاتىر» ساۋدا ويىن-ساۋىق ورتالىعى اينالاسىنا, سونداي-اق, ەڭبەكشىلەر كوشەسىنەن «تەلمان» تۇرعىن الابىنا دەيىن, «سارىارقا» اۋدانىندا – سارىبۇلاق وزەنىنىڭ جاعالاۋىنا اعاش ەكتى. سونىمەن قاتار, ءبىلىم, دەنساۋلىق ساقتاۋ مەكەمەلەرىنىڭ, كاسىپورىندار مەن تۇرعىن ءۇي كەشەندەرىنىڭ اۋماعىنا دا اعاش وتىرعىزىلدى.
ايتقانداي, استانادا قالانى سانيتارلىق تازارتۋ, اباتتاندىرۋ جانە كوگالداندىرۋ جونىندەگى كۇزگى ەكولوگيالىق ايلىق 12 قىركۇيەكتەن باستالعان بولاتىن. ول 12 قازانعا دەيىن جالعاسادى.
دينارا بىتىكوۆا