بوسنيا جانە گەرتسەگوۆينا وتكەن جىلدىڭ 15 اقپانىندا ەۋروپالىق وداققا مۇشەلىككە وتۋگە تاپسىرىس بەرگەن ەدى. سول كەزدە مۇنداي تاپسىرىستىڭ تۇسكەنىن ەو-نىڭ شەتەل ىستەرى جانە قاۋىپسىزدىك ساياساتى جونىندەگى جوعارعى وكىلى فەدەريكا موگەريني مالىمدەگەن بولاتىن.
موگەريني حانىم مۇنى اتالعان ەل ءۇشىن دە جانە ەۋروپالىق وداق ءۇشىن دە جاقسى جاڭالىق رەتىندە قابىلداعان ەدى. بريۋسسەلدە بوسنيا جانە گەرتسەگوۆينانىڭ ەۋروپالىق وداققا ءوتۋى ءۇشىن ەو-نىڭ بارلىق ستاندارتتارىنا سايكەس كەلمەيتىنىنە قاراماستان, ساراەۆونىڭ ءمۇشەلىككە تاپسىرىسى قارالاتىنى اتاپ كورسەتىلگەن بولاتىن.
سول تۇستا بوسنيا جانە گەرتسەگوۆينا تورالقاسىنىڭ توراعاسى دراگان چوۆيچ ءوز ەلىنىڭ ۇمىتكەر رەتىندەگى مارتەبەسى كوپكە سوزىلمايتىنىنا ءۇمىت ارتقان ەدى. «ءبىزدى رەفورمالاردىڭ ۇزاق جولى كۇتىپ تۇر. بىراق العان بەتىمىزدەن قايتپايمىز», دەگەن ەدى د.چوۆيچ.
ءوز كەزەگىندە, ەو-نى كەڭەيتۋ جانە كورشىلەستىك ساياساتى جونىندەگى ەۋروكوميسسار يوحاننەس حان «بوسنيا جانە گەرتسەگوۆينانىڭ ەو-عا مۇشەلىگى ءبىرنەشە اي, ءتىپتى بىرنەشە جىلدان كەيىن دە مۇمكىن ەمەس» ەكەنىن كولدەنەڭ تارتقان بولاتىن.
2015 جىلدىڭ 1 ماۋسىمىندا 2008 جىلى قول قويىلعان ەو مەن بوسنيا جانە گەرتسەگوۆينا اراسىنداعى تۇراقتاندىرۋ جانە اسسوتسياتسيا تۋرالى كەلىسىم كۇشىنە ەندى. بۇل ساراەۆوعا ەۋروپالىق وداققا قوسىلۋعا رەسمي تاپسىرىس بەرۋ ءۇشىن بەيرەسمي مۇمكىندىك اشقان ەدى.
كۇنى كەشە ەۋروپالىق وداق ەلدەرى ەۋروپالىق كوميسسياعا بوسنيا جانە گەرتسەگوۆينانىڭ كانديدات مارتەبەسىن العانىن ناقتىلاۋدى تاپسىردى. «ءبىز ەو-عا ۇمتىلىپ وتىرعان ەلدەرگە قاراي قادام جاساۋعا ءتيىسپىز», دەپ اتاپ ءوتتى سلوۆاكيا سىرتقى ىستەر مينيسترلىگىنىڭ جوعارى شەندى وكىلى يۆان كورچوك.
ەندى بوسنيا جانە گەرتسەگوۆينانىڭ ەكونوميكاسى باعامدالىپ, دەموكراتياعا قاتىستى احۋالى مەن زاڭ ۇستەمدىگى جانە ادام قۇقى ماسەلەلەرى ساراپتالاتىن بولادى. بۇل ەلدىڭ مۇشەلىككە قاتىستى مىندەتتەمەلەردى ساقتاۋعا قابىلەتتىلىگىن بايقاۋ ءۇشىن قاجەتتى قاعيداتتار بولىپ تابىلادى.
وسى وقيعاعا وراي, بوسنيا جانە گەرتسەگوۆينا پرەمەر-مينيسترى دەنيس زۆيزديچ بىلاي دەپ مالىمدەدى: «ءبىز ءۇشىن بۇل كۇن – شىن مانىندە تاريحي كۇن... ءسويتىپ, ەلىمىز ەۋروپاعا قاتىستى باعىتىن, ياعني ءوزىنىڭ بولاشاعىن ايقىندايتىن بولادى. بۇل جاعىمدى جاڭالىق, اسىرەسە, جاستار ءۇشىن ماڭىزدى».
اتاپ كورسەتەتىن جايت – ەلدىڭ ەو-عا ەنۋى ءۇشىن بىرنەشە اي نەمەسە ءتىپتى بىرنەشە جىل قاجەت بولۋى ىقتيمال.