مەملەكەت باسشىسىنىڭ تاپسىرماسىمەن «قازاقستان» تەلەارناسىنىڭ 100% قازاق تىلىندە حابار تاراتقانىنا 5 جىل تولدى.
«قازاقستان» ۇلتتىق تەلەارناسى جاڭا ماۋسىمىن جاعىمدى جاڭالىقتارمەن باستادى. اتاپ ايتار بولساق, جاڭادان سەگىز سەريال, سونىمەن قاتار العاش رەت «مۋزارت LIVE» اۋقىمدى جوباسىن ۇسىنعالى وتىر. 10 قىركۇيەكتەن باستاپ «Kazsport» تەلەارناسى حابار تارالىمىن جوعارى تەلەۆيزيالىق HD فورماتىندا كورسەتتى. سونىمەن قاتار, جاقىندا قازاق راديوسى ەفيرگە شىققانىنا 95 جىل تولعانىن مەرەكەلى راۋىشتە اتاپ وتپەك. «قازاقستان» تەلەارناسى تازا قازاق تىلىندە حابار تاراتا باستاعان بەس جىل ىشىندە اۋديتوريا سانىن 2 ەسەگە دەيىن ارتتىرا الدى.
ۇلتتىق ارنانىڭ ءباسپاسوز قىزمەتىنىڭ مالىمەتى بويىنشا, تاۋەلسىزدىكتىڭ 25 جىلدىق مەرەيتويىن اتاپ ءوتۋ قارساڭىندا كورپوراتسيانىڭ 2016-2017 جىلدارعا ارنالعان تەلەۆيزيالىق جاڭا ماۋسىمى اشىلۋ ءراسىمىنىڭ نەگىزگى ارقاۋى «بۇل –مەنىڭ قازاقستانىم!» ۇرانى بولىپ تابىلادى. جاڭا ماۋسىمدا كورەرمەنگە جاڭا جوبالار مەن تەلەسەريالدار ۇسىنىلا وتىرىپ, سونداي-اق سۇيىكتى باعدارلاماعا اينالعان, كوپ قولداۋىنا يە بولعان جوبالاردىڭ كەزەكتى شىعارىلىمدارى جارىق كورەدى.
ايتا كەتسەك, «ايتۋعا وڭاي...», «دارا جول», «ايەل باقىتى», «تۇنگi ستۋديادا» ءتارىزدى حالىقتىڭ كورۋگە اسىعاتىن باعدارلامالارى جاڭا فورماتتا, جاڭارعان ستۋديادا قىزىقتى دا اكتۋالدى تاقىرىپتار تارتۋ ەتەدى دەپ كۇتىلۋدە.
جاڭا تەلەۆيزيالىق ماۋسىمدا اقپاراتتىق-ساراپتامالىق باعدارلامالار بلوگى كۇشەيتىلمەك. «سۇحبات» جوباسى تىكەلەي ەفير ارقىلى تارايدى. باعدارلاما بارىسىندا قاراپايىم ادامداردىڭ كوكەيىندەگى وزەكتى ماسەلەلەر قوزعالىپ, كورەرمەن وزدەرىن تولعاندىرعان ماسەلەلەرگە ۇكىمەت مۇشەلەرى, بيلىك, ساياسات جانە بيزنەس وكىلدەرى تاراپىنان جاۋاپ تابادى.
سونداي-اق, ەفيرگە شىعا باستاعان «قوعامدىق كەڭەس» جوباسىنىڭ الار ورنى ايرىقشا. مۇنىڭ ەرەكشەلىگى, قاتىسۋشى باس كەيىپكەرلەر, ايتۋلى وقيعالارعا قاتىسى بار ادامدار جانە بەس ينستيتۋتسيونالدىق رەفورمادا كورسەتىلگەن 100 ناقتى قادام اياسىندا قۇرىلعان قوعامدىق كەڭەستەردىڭ ءمۇشەلەرىمەن پىكىرتالاس جۇرگىزىلەدى. سپيكەرلەر تىكەلەي ەفيردە ءار تاقىرىپقا بايلانىستى ءوز يدەيالارىمەن ءبولىسىپ, اڭگىمە وربىتەدى.
«سەرپىلىس» قوعامدىق-ساياسي توك-شوۋى جاڭا تەلەۆيزيالىق ماۋسىمدا پىكىرتالاستار ۇيىمداستىرىپ, اۋقىمدى فورماتتا شىعۋدى كوزدەپ وتىر. ياعني, بۇل ارنانىڭ «حارد-توك» فورماتىنداعى جاندى رەجىمدەگى توك-شوۋى بولماق. قوعام قايراتكەرى مۇرات ابەنوۆ مودەراتور رەتىندە وزەكتى تاقىرىپتاردى ورتاعا سالادى, ستۋديادا جينالعان نيۋسمەيكەرلەر ەلىمىزدەگى سوڭعى وقيعالار توڭىرەگىندە ءوز ويلارىمەن بولىسەدى.
بۇعان قوسا, «وي-تولعاۋ» جوباسى كوپشىلىك نازارىنا ۇسىنىلماق. باعدارلامانى تانىمال, تالانتتى اقىن قالقامان سارين جۇرگىزەدى. ءاربىر باعدارلامادا ەكى تۇلعانىڭ ءتۇرلى وقيعالارى اڭگىمەگە ارقاۋ بولماق. سونىمەن بىرگە, «مۋزارت LIVE» مەگا جوباسى ەفيرگە جول تارتپاق. بۇل نەگىزىنەن – حالىقارالىق جوبالار فورماتىندا («داۋىس», «تالانت-شوۋ») كورەرمەنگە ۇسىنىلاتىن «قازاقستان» تەلەارناسىنىڭ تۇڭعىش ءتول ءونىمى. كورپوراتسيا قازاقستاننىڭ تەلەۆيزيالىق نارىعىنداعى سەريالدار ءوندىرىسى جاعىنان كوشباسشى سانالادى. سوعان وراي جىل سايىن ءوز كونتەنتىنىڭ ءوندىرىس ۇلەسىن ارتتىرىپ كەلەدى. قازىرگى تاڭدا كورپوراتسيا قورجىنىندا 62 سەريال ساقتاۋلى نەمەسە 1322 سەريا. كورپوراتسيا 12 قىركۇيەكتەن باستاپ 100 سەريالى وتاندىق «ايمان-شولپان» دراماسىن حالىققا ۇسىنا باستادى. ونىڭ سيۋجەتى وتباسى ينستيتۋتىن نىعايتىپ, قالىپتاستىرۋ يدەياسىنا قۇرىلعان.
«قازاقستان» تەلەراديوكورپوراتسياسى كونتەنتىن جاڭعىرتۋ اياسىندا حالىقارالىق ىنتىماقتاستىقتى كۇشەيتىپ, وتاندىق كونتەنتتى ىلگەرىلەتۋ ماقساتىندا بەلسەندى جۇمىستار ءجۇرگىزۋدە. مىسالى, «سىرعالىم», «قاسىم», «جامبىل» جانە باسقا دا كوركەم سەريالداردىڭ ليتسەنزيالىق قۇقىعىن ءوز ەلىمىزبەن قاتار, تاياۋ جانە الىس شەت ەلدەردىڭ دە (رف, تاتارستان, اقش, كيپر, سلوۆەنيا) يەلەنىپ وتىرعانىن اتاپ وتكەن ابزال. مۇنداي قادام كورپوراتسياعا ءوز كونتەنتىن قارجىلاندىرۋ ءۇشىن جۇيەلى جۇمىستار اتقارۋعا مۇمكىندىكتەر بەرەدى.
«قازاقستان» رترك» اق تاپسىرىسىمەن تۇسىرىلگەن «اكە» حيكاياتىنىڭ باس كەيىپكەرى وڭتۇستىك كورەيادا وتكەن «سەۋل ينتەرنەيشنل دراما ەۆوردس 2016» حالىقارالىق كينوفەستيۆالىندە «جىلدىڭ ۇزدىك اكتەرى» اتالىمى بويىنشا جەڭىمپاز اتانعان بولاتىن. ءسويتىپ, 51 ەلدىڭ وكىلدەرى قاتىسقان دودالى باسەكەدە «ازيا وسكارى» اتاعىنىڭ قازاقستاندىق اكتەرگە بۇيىرۋى وتاندىق ارنا تاريحىنداعى ەلەۋلى وقيعا بولىپ سانالادى. وسىلايشا, كورپوراتسيا شەتەلدىك رىنوكتاعى قازاقستاندىق كينووندىرىستىڭ ورنىن نىعايتا وتىرىپ, ءوز ۇلەسىن قوسۋدا.
قازاق راديوسى حالىقارالىق ىنتىماقتاستىقتى ارتتىرۋ شەڭبەرىندە مەملەكەتارالىق راديوكوپىرلەر وتكىزۋدى جوسپارلاپ وتىر, اتاپ ايتقاندا, رەسەي راديوسىمەن استانا – ماسكەۋ راديوكوپىرىن, بەلورۋسسيا راديوسىمەن استانا – مينسك راديوكوپىرىن. 2016 جىلدان باستاپ «بۇل – ءبىز!» اتتى بىرلەسكەن جوبا اياسىندا مولدوۆا, ارمەنيا, گرۋزيا راديوستانتسيالارىمەن تىعىز قارىم-قاتىناس ورناتىلدى. جاڭا ماۋسىمدا بالاقايلار «بالاپان» تەلەارناسىنىڭ سۇيىكتى انيماتسيالىق سەريالدارىنىڭ جالعاسىن تاماشالايدى. ولار: «ءالي مەن ايا» (20 شىعارىلىم), «سالەم, استانا!», «دانىشپان قارعا» دەپ اتالادى. تىكەلەي ەفيردەگى «ويلان, تاپ!», «مىڭ ءتۇرلى سۇراق», «بىرگە - ءبىر», سونداي-اق ارنانىڭ ءتول ءونىمى بولىپ سانالاتىن «اۆس+», «شىتىرمان», «العىر التاۋ» جوبالارى دا جالعاسىن تاپپاق. ەكىنشى ماۋسىمدا كورەرمەن كوزايىمىنا اينالعان «شىتىرمان» سپورتتىق باعدارلاماسىنىڭ ۇسىنار بازارلىعى كوپ, جارىس جەڭىمپازىنىڭ ىشىنەن باس جۇلدەگەرگە پاريج قالاسىنداعى «ديسنەيلەندكە» جولداما تابىس ەتىلدى. 2011 جىلدىڭ قىركۇيەك ايىنان باستاپ «قازاقستان» تەلەارناسىنىڭ اۋديتوريالىق كورسەتكىشتەرى جاعىمدى وزگەرىستەرگە تولى بولدى. جاڭا ماۋسىمنىڭ باسىندا 100 مىڭ+ اۋديتورياسىنداعى ورتا تاۋلىكتىك ۇلەس 4,5%-دى, ال 2016 جىلدىڭ 8 ايى ىشىندەگى تەلەارنانىڭ وسى سياقتى اۋديتوريالىق ۇلەسى 8,5%-دى قۇرايدى, بۇل ۇلەستىڭ 89%-عا وسكەندىگىن كورسەتەدى.
قاراشاش توقسانباي,
«ەگەمەن قازاقستان»