يتاليادا ITF تاەكۆوندو بويىنشا جاسوسپىرىمەر جانە ارداگەرلەر اراسىندا وتكەن الەم چەمپيوناتىنان قاراعاندىلىق جەكپە-جەك شەبەرلەرى تاماشا تابىسپەن ورالدى. جالپى, بۇل دۇنيەجۇزىلىك دودادان قازاقستاندىق تاەكۆوندوشىلار قۇندىلىعى ءارتۇرلى 18 مەدالمەن ورالدى. ال قاراعاندىلىق سپورتشىلاردىڭ ەنشىسىنە وسى جۇلدەلەردىڭ باسىم بولىگى بۇيىردى: ءتورت التىن, سەگىز كۇمىس جانە ءتورت قولا مەدال!
الەم چەمپيوناتىندا 68 ەلدەن كەلگەن 800-دەن استام تاەكۆوندوشى باق سىناعان. مىنە, وسىنداي باسەكەسى وتە جوعارى جارىستا نامىستى قولدان بەرمەگەن قاراعاندىلىق شەبەرلەردىڭ تابىسىن قاي جاعىنان ماقتاسا دا ابدەن ورىندى. چەمپيوناتتاعى ايقاستاردىڭ شيەلەنىستى جاعدايدا وتكەنى سونشالىقتى, فينالدىق سىنعا جولداما الۋ ءۇشىن ءاربىر سپورتشىعا كەم دەگەندە 5-6 جەكپە-جەك وتكىزۋگە تۋرا كەلگەن.
16-17 جاستاعى جاسوسپىرىمدەر اراسىنداعى سىندا گەورگي اندروسوۆ 63 كيلو سالماقتا توپ جارسا, ءاليا سۇلەيمەنوۆا 70 كيلو سالماق دارەجەسى بويىنشا ارداگەرلەر اراسىندا الەم چەمپيونى اتاندى. ال كوماندالىق ارنايى تەحنيكا سىنىندا جەڭىس تۇعىرىنىڭ ەڭ بيىك ساتىسىنا كوتەرىلگەن ەل قۇراماسىنىڭ ساپىندا قاراعاندىلىق گەورگي اندروسوۆ پەن الەكساندر ورلوۆ سىندى شەبەرلەر بولدى.
– مىنە, 15 جىلدان بەرى ەل قۇراماسىنىڭ نەگىزىن قاراعاندىلىق سپورتشىلار قۇراپ كەلەدى, – دەيدى تاەكۆوندودان قازاقستان قۇراما كومانداسىنىڭ اعا جاتتىقتىرۋشىسى ۆالەري كوگاي. – بۇگىنگى كۇندە مۇنداي ءداستۇر ابدەن قالىپتاسىپ, ءوزىنىڭ يگى جەمىسىن بەرىپ جاتىر. قازىر ءبىز ءاربىر چەمپيوناتتان جۇلدەسىز قايتىپ جۇرگەن جوقپىز. دەگەنمەن, بيىلعى ناتيجە – قاراعاندى تاەكۆوندوسىنىڭ تاريحىنداعى ەڭ ۇلكەن جەتىستىك.
يتاليادان ولجامەن ورالعان سپورتشىلاردى جەرلەستەرى قۇشاق جايا قارسى الىپ, لايىقتى سىي-قۇرمەت كورسەتتى.
قايرات ءابىلدينوۆ,
«ەگەمەن قازاقستان»
قاراعاندى