كەشە ورتالىق سايلاۋ كوميسسياسىنىڭ وتىرىسى ءوتىپ, وندا پرەزيدەنتتىككە كانديداتتار – پارلامەنت سەناتىنىڭ دەپۋتاتى, قازاقستان پاتريوتتارى پارتياسىنىڭ توراعاسى عاني قاسىموۆتىڭ, ءوزىن-ءوزى ۇسىنعان كانديدات ادالبەك قۇنانباەۆتىڭ مەملەكەتتىك ءتىلدى مەڭگەرگەندىگىن انىقتاۋ تۋرالى جانە ءوزىن-ءوزى ۇسىنعان امانتاي اسىلبەكتى ۇمىتكەرلەر تىزىمىنە قوسپاۋ جونىندە ماسەلە قارالدى.
ورتالىق سايلاۋ كوميسسياسىنىڭ حاتشىسى باقىت مەلدەشوۆتىڭ حاباردار ەتۋىنشە, عاني قاسىموۆتىڭ كونستيتۋتسيادا جانە «سايلاۋ تۋرالى» كونستيتۋتسيالىق زاڭدا قويىلاتىن تالاپتارعا سايكەس كەلەتىندىگى انىقتالعان. ەندى وعان قول جيناۋ ءۇشىن قول قويۋ پاراقتارى بەرىلەدى. ەگەر كانديدات كەم دەگەندە 91010 سايلاۋشىنىڭ قولىن جيناپ, ول راستالسا, عاني قاسىموۆتى ورتالىق سايلاۋ كوميسسياسى پرەزيدەنتتىككە كانديدات رەتىندە تىركەيتىن بولادى.
ورتالىق سايلاۋ كوميسسياسى ادالبەك قۇنانباەۆتى كانديدات رەتىندە تىركەۋدەن باس تارتۋ تۋرالى قاۋلى قابىلدادى. وسك حاتشىسى باقىت مەلدەشوۆتىڭ وتىرىستا حابارلاعانىنداي, كانديداتتىڭ لينگۆيستيكالىق كوميسسيانىڭ وتىرىسىندا ونىڭ مەملەكەتتىك ءتىل – قازاق ءتىلىن ەركىن مەڭگەرمەگەندىگى تۋرالى قابىلداعان شەشىمى باسشىلىققا الىنعان. ويتكەنى, ول لينگۆيستيكالىق كوميسسيانىڭ وتىرىسىندا بەرىلگەن تاپسىرمالاردى تالاپ دەڭگەيىندە ورىنداي الماعان. مۇنى كانديداتتىڭ ءوزى دە مويىنداعان.
ورتالىق سايلاۋ كوميسسياسى لينگۆيستيكالىق كوميسسيانىڭ وتىرىسىنا ءۇش رەت كەلمەگەن امانتاي اسىلبەكتى پرەزيدەنتتىككە كانديداتتار تىزىمىنە قوسۋدان باس تارتۋ تۋرالى قاۋلى قابىلدادى. قاۋلىدا بىلاي دەلىنگەن: «...قر پرەزيدەنتتىگىنە كانديدات ا.ح.اسىلبەكتىڭ لينگۆيستيكالىق كوميسسيانىڭ وتىرىسىنا كەلمەۋىنە بايلانىستى ونىڭ قر كونستيتۋتسياسىنىڭ جانە «سايلاۋ تۋرالى» كونستيتۋتسيالىق زاڭنىڭ مەملەكەتتىك ءتىلدى ەركىن مەڭگەرۋ بولىگىندەگى تالاپتارىنا سايكەستىگى انىقتالمادى دەپ كورسەتىلسىن».
ءاليسۇلتان قۇلانباي.