وبلىسقا جۇمىس ساپارىمەن پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ كەلىپ كەتتى. مينيستر ساپارىن اۋىلدان باستادى.
ەكىباستۇز قالاسىنىڭ اۋىلدىق اۋماعىنا قاراستى قۇلاكول اۋىلىندا بەس جۇزگە جۋىق حالىق تۇرادى.ءبىر سوزبەن ءوندىرىستى اۋىل دەپ اتاۋعا بولادى. اسەت يسەكەشەۆ اۋىل اكىمدىگىندە وبلىستاعى اۋىلشارۋاشىلىق جانە كاسىپكەرلىك سالاسى وكىلدەرىمەن جيىن ءوتكىزدى. ەلباسى جولداۋىندا دامۋ الەۋەتى جوعارى اۋىلداردا ينفراقۇرىلىمداردى دامىتىپ, كاسىپكەرلىككە ۇيرەتۋ, كاسىپكەرلىكتىڭ جاڭا جوباسىن جاساپ شىعارۋ تاپسىرىلعان بولاتىن. وسى رەتتە اۋىلعا ءوز كاسىبىن قولعا الۋدىڭ جاڭا مۇمكىندىكتەرى اشىلىپ وتىر, دەپ اتاپ ءوتتى ءا.يسەكەشەۆ. جيىندا «ەرتەڭىڭ ءۇشىن ايانبا» دەگەن قاناتتى جوبا تانىستىرىلدى. بۇل جوبا حالىقتىڭ قولجەتىمدى نەسيە الۋىن, وقىتۋدى, جۇمىستى ۇيىمداستىرۋ كۋرستارىن اشۋدى, ەڭبەك جاسىنداعى جاستارعا كومەك كورسەتۋدىڭ تيىمدىلىگىن ارتتىرۋدى كوزدەيدى جانە بىرنەشە باعىت بويىنشا جۇرگىزىلەدى. وڭىردە كەز كەلگەن كىسى ءوز كاسىبىن اشامىن دەسە, وعان اقپارات كەرەك. ال جوبادا بارلىق اقپارات جازىلعان.
قۇلاكول اۋىلىنان سوڭ اسەت يسەكەشەۆ ەكىباستۇزدىڭ گرەس-1 ستانساسىنا كەلدى. ستانسا باسشىلىعى قۇنى 220,4 ملرد. تەڭگە بولاتىن ينۆەستيتسيانىڭ الداعى جىلدارى جۇزەگە اسىرىلاتىنىن ايتتى.
بۇل باعدارلاما توقتاپ تۇرعان 3 ەنەرگوبلوكتى قالپىنا كەلتىرۋدى, 8 ەلەكتر سۇزگىسىن ورناتۋدى, قولدانىستاعى 5 ەنەرگوبلوكتى جانە جالپىستانسالىق جابدىقتاردى جاڭعىرتۋدى كوزدەيدى. كەلەسى كەزەكتە اسەت يسەكەشەۆ ۆاگون جاساۋ كاسىپورنىندا بولىپ, ونىڭ جۇمىسىمەن تانىستى. بولاشاقتا جىلىنا 5 مىڭ ۆاگون شىعارىلماقشى. وسىندا شىعارىلعان جۇك ۆاگوندارىن وزىمىزدە جانە تمد ەلدەرىنە ەكسپورتقا شىعارۋ جوسپاردا بار. جۋىردا عانا №5 ەنەرگوبلوكتا قورشاعان ورتانى لاستانۋدان قورعايتىن ەلەكترلى سۇزگى ىسكە قوسىلدى. جاڭا قۇرىلعى اۋاعا تارالاتىن زياندى كۇلدىڭ مولشەرىن جىلىنا 17,5 مىڭ تونناعا دەيىن تومەندەتە الادى. بۇعان دەيىن ەكولوگياعا زالال كەلتىرەتىن قالدىقتاردىڭ اۋاعا تارالۋ مولشەرى جىلىنا 20,5 مىڭ توننانى قۇراسا, ەندى ول كورسەتكىش 3 مىڭ تونناعا دەيىن ازايادى. بۇل كاسىپورىننىڭ قارجى ۇنەمدەۋىنە دە اسەر ەتەدى. مىسالى, ەكولوگيالىق زارداپتار ءۇشىن جىلىنا تولەنەتىن قاراجات كولەمى 70,6 ميلليون تەڭگەگە قىسقارادى. ستانساداعى № 2 جانە № 8 ەنەرگوبلوكتاردى قايتا قالپىنا كەلتىرۋ جۇمىستارىنا قۇيىلاتىن ينۆەستيتسيا كولەمى 53,4 ملرد. تەڭگە بولادى. جوبانى ىسكە اسىرۋ مەرزىمى – 2014 جىل. ەنەرگەتيكا – ەل ەكونوميكاسىنىڭ قوزعاۋشى كۇشى. ەلىمىزدە قولعا الىنىپ جاتقان ۇدەمەلى يندۋستريالىق-يننوۆاتسيالىق دامۋ باعدارلاماسى دا ەنەرگەتيكا سالاسىمەن تىعىز بايلانىستى. بۇل رەتتە, گرەس-1 ستانساسىنىڭ ورنى ەرەكشە. قازىر ستانسادا 5 ەنەرگوبلوك جۇمىس ىستەپ تۇر. اسەت يسەكەشەۆ بۇدان كەيىن جالىنداعان وتسىز, ءتۇتىنسىز مەمبراندى جاڭا تەحنولوگيامەن جۇمىس جاسايتىن «كاۋستيك» اق-تى ارالاپ كوردى. وسىندا وتكەن وتاندىق تاۋار وندىرۋشىلەر جيىنىنا قاتىستى. وبلىس اكىمى باقىتجان ساعىنتاەۆ 14 ناۋرىزدا ونكۇندىك ساپارمەن ءوندىرىستى وڭىرگە كەلەتىن نەمىس كاسىپكەرلەرىنىڭ ساپارى, ولاردىڭ ماقسات-جوبالارى ءجونىندە ايتىپ ءوتتى. جەرگىلىكتى كاسىپورىنداردىڭ تاۋار مەن قىزمەت كورسەتۋدەگى قازاقستاندىق ۇلەس سالماعى دا ارتىپ كەلەدى. قازىر كاسىپورىندار شەتەلدىك تاۋارلاردان گورى ەلىمىزدە وندىرىلەتىن ونىمدەرگە نازار اۋدارا باستاپتى. ۇكىمەت ەلباسى تاپسىرمالارىنا وراي وتاندىق تاۋار ءوندىرۋشىلەردى قورعاۋ, مەملەكەتتىك جانە ەلىمىزدە جۇمىس جاسايتىن شەتەلدىك ينۆەستورلار تاپسىرىسىنداعى ولار شىعاراتىن تاۋارلاردىڭ ۇلەسىن ارتتىرۋ ماسەلەسىمەن شۇعىلدانىپ كەلەدى. كەدەن وداعىنا ەنگەننەن كەيىن وتاندىق تاۋارلارعا قويىلاتىن تالاپ تا جوعارى. شىعارعان ءونىم باسەكەگە قابىلەتتى, نارىق زاڭىنا توتەپ بەرە الاتىنداي بولۋى كەرەك.
فاريدا بىقاي, پاۆلودار وبلىسى.