ىزدەنگەن جەتەر مۇراتقا دەيدى حالقىمىز. شىندىعىندا ءىستىڭ ىڭعايىن تاپقان ادامعا الىنبايتىن قامال جوق. ايتالىق, ابىرالى ءوڭىرىندەگى تاڭات اۋىلىنىڭ تۇرعىنى ءومىرجان جاقىپوۆ دەگەن جاسى جەتپىستەن اسىپ بارا جاتقان اقساقالدىڭ وسى جاسىندا تۋعان جەرىنە جاساپ وتىرعان جاقسىلىعى تۋرالى جازعان بولاتىنبىز. سونى قىسقاشا عانا قايتالاپ ايتاتىن بولساق, وسى كىسىنىڭ باستاماسىمەن تاڭات اۋىلىندا حالقىمىزدىڭ ايتۋلى اقىنى تولەۋجان ىسمايىلوۆتىڭ مۇراجايى اشىلدى. اۋىل مەكتەبىنە قامقورلىق تانىتىپ كەلە جاتقان دا ومەكەڭ. اۋىل اقساقالى اۋىل شارۋاشىلىعىن كوتەرۋ ماسەلەلەرىنەن دە سىرت قالىپ وتىرعان جوق. ول سونىڭ بارىنە ءتۇرلى مازمۇنداعى حالىقارالىق گرانتتاردى جەڭىپ الىپ كەلە جاتقان العىرلىعى ارقاسىندا قول جەتكىزۋدە.
ەندى, مىنە, وسى وڭىردەن ومەكەڭنىڭ جولىن قۋعان جانە ءبىر ازاماتتىڭ شىققاندىعىن ەستىپ, ءبىلىپ وتىرمىز. ياعني, وسىنداعى اقبۇلاق اۋىلىنىڭ تۇرعىنى ادىلەت توكەنوۆ تە بۇۇ-نىڭ دامۋ باعدارلاماسى بويىنشا ءبىر گرانتتى ۇتىپ العان ەكەن. حالىقتىڭ قامىن جەگەن الگى ازامات وسى باعدارلاماسى اياسىندا جاريالانعان قۇنى 3 مىڭ دوللارلىق جوبانى اكىمدىك عيماراتىنداعى بوس تۇرعان ءتورت بولمەنى اۋىل كلۋبى رەتىندە پايدالانۋ ماقساتىمەن ىسكە كىرىسىپ كەتەدى. جانە ونى جوندەپ, قاتارعا قوسۋعا جەرگىلىكتى تۇرعىندار تارتىلادى.
ال اۋىل كلۋبىن جابدىقتاپ, شتاتپەن قامتاماسىز ەتۋگە قالالىق مادەنيەت ءبولىمى كومەككە كەلدى. ونىڭ سەبەبى سول, ابىرالى ءوڭىرى قالاعا قارايدى. سونىمەن, سالتاناتتى جاعدايدا اشىلعان اۋىلداعى ونەر ورداسى ىسكە قوسىلدى. قازىر مۇندا دومبىرا ءۇيىرمەسى, بوكس سەكتسياسى تەزدەتىپ اشىلىپ ۇلگەرىلدى. الدا باسقاداي ۇيىرمە, سەكتسيالار اشىلماق.
– ەل تاۋەلسىزدىگىنىڭ 20 جىلدىعىنا وراي ءتۇرلى مادەني شارالاردى قولعا الىپ جاتىرمىز, – دەيدى كلۋب باسشىسى ج.ءسادۋاقاسوۆ. ىسكە ءسات دەيمىز ءبىز دە!
داۋلەت سەيسەن ۇلى, شىعىس قازاقستان وبلىسى.