جولداۋ: اپتا ايشىقتارى

وب­لىس­تا بۇل باعىتتاعى شارالار قازىردىڭ وزىندە باستالىپ تا كەتتى. وبلىس ورتالىعىنداعى نۇرپەيىس بايعانين اتىنداعى وبلىستىق بالالار كىتاپ­حاناسى ۇيىمداس­تىرعان «تاۋەلسىز ەل — باقىتتى ەل!» اتتى كىتاپ كورمەسى تۋرا  تاۋەلسىزدىكتىڭ 20 جىلدىعىنىڭ تاريحي  جىلناماسى ىسپەتتى بولدى. كورمەگە قاتىسۋشىلارعا شاعىن كونتسەرتتىك باعدارلاما ۇسى­نىل­دى.

ساتىبالدى ءساۋىرباي, اقتوبە.

جاستار اۆتوكەرۋەنى جولعا شىقتى

وبلىس اكىمدىگى ىشكى ساياسات باسقارماسى جاستار ورتالىعىنىڭ ديرەكتورى د. قايىپوۆ, جامبىل وبلىسى بىلىمگەرلەرى مەن جاستار وداعى بىرلەستىگىنىڭ توراعاسى ا. اجىباەۆ جانە «نۇر وتان» حدپ وبلىستىق فيليالىنىڭ «جاس وتان» جاستار قاناتىنىڭ مۇشەلەرى شالعايداعى سارىسۋ جانە تالاس اۋداندارىن باعىتقا الدى. ولاردىڭ باسىن قوسقان اقپاراتتىق-مادەني اۆتوكەرۋەننىڭ ماقساتى –  «جول­داۋ: جاستاردان –جاستارعا!» دەپ اتالاتىن اكتسيانى ويداعىداي جۇزەگە اسىرۋ. بۇعان دەيىن جامبىل جانە جۋالى اۋداندارىنداعى اۋىل جاستارىمەن كەزدەسىپ, بيىلعى جولداۋدىڭ ماڭىزىن ەكى جاقتى ۇن­قاتىسۋ ارقىلى تۇسىن­دىرۋمەن اينالىسقان اۆتوكەرۋەن مۇشەلەرى  مۇنداي ءتيىمدى ۇگىت-ناسيحات جۇ­مىستارىن ەندى الىس اۋداندار­دا­ع­ى زامانداستارى اراسىندا جالعاستىرماقشى.

كوسەمالى ساتتىباي ۇلى, جامبىل وبلىسى.

كۋالىك نەمەرەسىنە تاپسىرىلدى

الاش ارىستارىنىڭ ءبىرى حالەل دوسمۇحامەدوۆتىڭ قازاق ەلىنىڭ كەلەشەگى ءۇشىن اتقارعان ەڭبەگى ۇرپاقتار جادىندا جاڭعىرىپ تۇرادى. اسىرەسە, اتىراۋدا عالىمنىڭ ەسىمى بەرىلگەن ۋنيۆەرسيتەت الدىندا ەسكەرتكىشى اشىلعان. ءبىر كوشە عالىم ەسىمىمەن اتالادى. ەلىمىزدىڭ ءار وڭىرىندە وسىنداي ەستە قالدىرۋ شارالارى بار. بىلتىر ح. دوسمۇحامەدوۆكە وبلىستىڭ قۇرمەتتى ازاماتى اتاعى بەرىلگەن. وتكەن اپتادا وسىعان وراي عالىم اتىمەن اتالاتىن ۋنيۆەرسيتەتتە ارنايى كۋالىكتى عالىمنىڭ نەمەرەسى مارات دوسمۇحامەدوۆكە تاپسىرۋ ءراسىمى ءوتتى. «قازىر قىزىلوردا قالاسىندا تۇرعانىممەن, ەلىمىزدىڭ ءار وڭى­رىندە حالەل اتامنىڭ اتى اسقاقتاعانىن ءبىلىپ جۇرەمىن. بۇل مەن ءۇشىن, ارتىنداعى ۇرپاعى ءۇشىن ۇلكەن مارتەبە», دەگەن ول اتىراۋ ۋنيۆەرسيتەتىنىڭ مۇراجايىنا ح.دوسمۇحامەدوۆتىڭ سانكت-پەتەربۋرگتە, ورالدا تۇس­كەن سۋرەتتەرىنىڭ  تۇپنۇسقالارىن تاپسىردى.

جولداسبەك شوپەعۇل, اتىراۋ وبلىسى.

سەزد دەلەگاتتارى انىقتالدى

وتكەن اپتادا وبلىس ايەلدەرىنىڭ باسىن قوسقان كونفەرەنتسيا بولىپ ءوتتى. وندا  اقپاننىڭ ورتاسىنان 1 ناۋرىزعا دەيىن وتەتىن «تىلەكتەر ءتىزىمى» رەسپۋبليكالىق اكتسياسىنىڭ شەڭبەرىندە جۇرگىزىلەتىن جۇمىس جوسپارلارى تالقىلاندى. ادام قۇقىعى جونىندەگى حالىقارالىق بيۋرونىڭ  قوستاناي وبلىستىق فيليالىمەن بىرلەسىپ «ايەلدەر كوشباسشىلىعى», «ايەلدەر وزبىرلىققا قارسى»  تاقىرىپتارىندا سەمينارلار وتەدى. سونىمەن قاتار جەتىم بالالارعا كومەك اكتسياسى دا ۇيىمداستىرىلادى. وسى كونفەرەنتسيادا 5 ناۋرىزدا وتەتىن رەسپۋبليكالىق ايەلدەر سەزى­نە وبلىستان قاتىساتىن دەلەگاتسيا قۇرامى جاساقتالدى. ولار­دىڭ اراسىندا قوعامداعى بەلسەندى ايەلدەرمەن قاتار, 20 بالا تاۋىپ, تاربيەلەپ وتىرعان قاماش سەيىتجانوۆا, اتاقتى مەحانيزاتور, ەڭبەك ەرى كامشات دونەنباەۆا جانە جاستار بار.

ءومىر ەسقالي, قوستاناي.

سالىق تولەۋشىلەرگە جاقسى جاعداي

ەگەمەن ەل اتانىپ, تاۋەلسىزدىككە قول جەتكىزگەننەن بەرگى جەردە مەملە­كەتىمىزدىڭ ىرگەسى نىعايا ءتۇسىپ كەلەدى. شاڭىراعىمىز شايقالماي, ءتۇتىنىمىز ءتۇزۋ شىعۋ ءۇشىن سالىق سالاسىنىڭ ۋىعى بەرىك بولۋى كەرەكتىگى ايتپاسا دا تۇسىنىكتى. سوعان وراي انا ءبىر جىلدارى قاڭىراپ بوس قالعان بۇرىنعى كاسىپشىلەر وداعىنىڭ عيماراتى قالالىق سالىق كوميتەتىنە بەرىلگەن ەدى. جۋىردا اتالعان كوميتەت بۇعان قوسىمشا جاڭا عيماراتپەن تولىقتى. سولايشا سالىق تولەۋشىلەرگە قىزمەت دەڭگەيى بۇرىنعىدان دا جاقسارا ءتۇستى. جاڭا عيماراتتىڭ اشىلۋ سالتاناتىنا وبلىس, قالا باسشىلارى بەردىبەك ساپارباەۆ پەن ايبەك كارىموۆ قاتىستى.

داۋلەت سەيسەن ۇلى, سەمەي.

ناۋرىزدىڭ ورتاسىنا دەيىن جالعاسۋدا

وبلىستىق «ورال ءوڭىرى» گازەتى مۇز استىنداعى بالىقتاردى تۇنشىعۋدان قۇتقارۋ اكتسياسىنا باستاماشى بولدى. وعان قاتىسۋشىلار شاعان وزەنىندە 523 ويىق, 10 سۋات جاسادى. شارا كەزىندە مۇزدىڭ قالىڭدىعى 50-55 سانتيمەترگە جەتكەنى انىقتالدى. سونىمەن بىرگە, قىس كەزىندە بالىقتى تۇنشىعۋدان قورعاۋ شارالارىمەن وبلىستا «ەسبوسىنوۆ» جەكە كاسىپورنى اينالىسىپ كەلەدى. ولار بۇل ءىستى ناۋرىزدىڭ ورتاسىنا دەيىن جالعاستىرماق. وزەن-كولدەردىڭ بەتىن مۇز قۇرساپ, قالىڭ قار جابۋى, ءسوز جوق, بالىقتاردىڭ تۇنشىعۋىنا, ءتىپتى, قىرىلۋىنا اكەلىپ سوقتىرادى. بۇل ءجايت سۋ قۇرامىنداعى وتتەگىنىڭ ازايىپ كەتۋىنەن ورىن الادى. اتالمىش اكتسيانىڭ اسا قاجەتتىلىگى دە وسىندا, – دەيدى باتىس قازاقستان اگرارلىق-تەحنيكالىق ۋنيۆەرسيتەتىنىڭ دوتسەنتى مارلەن شۇكىروۆ.

تەمىر قۇسايىن, ورال.