ازيادا التىنى اسكەردەن بوساتادى
وڭتۇستىك كورەيا سپورتشىلارى جالپى كوماندالىق ەسەپتە ءۇشىنشى ورىنعا تۇراقتاعانى بەلگىلى. قۇلديلاپ سىرعاناۋدا قولا العان وسى ەلدىڭ سپورتشىسى دجۋنگ دوحيون جارىستىڭ العاشقى كۇندەرىندە قولا مەدالدى قولعا ءتۇسىرىپ, ودان ازيادانىڭ التىنىن جەڭىپ الماق بولعانىن بىلەمىز. 31 قاڭتاردا كورەي سپورتشىسى: – بۇگىن مەن چەمپيون اتانا المادىم. بىراق, الداعى جارىس كۇندەرى بۇل ماقساتىم ورىندالادى دەگەن ۇمىتتەمىن. وڭتۇستىك كورەيا زاڭى بويىنشا ءىرى حالىقارالىق جارىستاردىڭ چەمپيوندارى اسكەري بورىشىن وتەۋدەن بوساتىلادى. بىزدە ءتىپتى ايگىلى ءارتىستەرگە دە, پرەزيدەنتتىڭ ۇلىنا دا مۇنداي جەڭىلدىك بەرىلمەيدى. سوندىقتان جەڭىسكە ۇمتىلۋىما سەبەپ بار. اسكەردەن بوساسام جاتتىعۋلارىمدى ءارى قاراي جالعاستىرامىن. سايكەسىنشە, ءوز ەلىمنىڭ ابىرويىن قورعاپ, جەڭىس تۋىن جەلبىرەتۋگە ءمۇمكىندىگىم كوبەيەدى, – دەگەن بولاتىن. قۇلديلاپ ءتۇسۋ جارىستارىندا قازاقستاندىق دميتري كوشكين مەن يگور زاكۋرداەۆ ءبىرىنشى, ەكىنشى ورىنعا يە بولدى دا, ءۇشىنشى ورىندا وسى دجۋنگ دوحيون تۇرعان ەدى. وڭتۇستىك كورەيا ازياداعا تاۋ شاڭعىشىلارىنان جاساقتالعان جاڭا قۇراما جىبەرگەنى بەلگىلى. ولار ءوز ەلىنىڭ اماناتىن اقتادى دەسەك تە بولادى. ءسويتىپ, بۇل ەلدىڭ سپورتشىلارى 3 التىن, 1 كۇمىس, 3 قولا مەدالدى جەڭىپ الدى. كيم سان دجۋ دەگەن قىزدارى ەكى رەت قۇرمەت تۇعىرىنىڭ بيىك ساتىسىنا كوتەرىلدى. سونداي-اق, ەرلەر اراسىندا دجۋن دوحيون 1 التىن, 1 قولا مەدالدى يەلەندى. ەندى اسكەردەن بوساتىلاتىن دجۋن دوحيون الاڭسىز جاتتىعۋمەن اينالىسىپ, تالاي رەت جۇلدەگەرلەر تۇعىرىنا كوتەرىلەتىن بولار؟!الماتىنىڭ اۋاسى دا ساتىلدى
ازيادا باستالماي تۇرىپ-اق, ەلىمىزگە ازيانىڭ ءار قيىرىنان قوناقتار اعىلىپ كەلىپ جاتتى. سپورتشىلار مەن جاتتىقتىرۋشىلاردى ايتپاعاننىڭ وزىندە, شەتەلدىك جانكۇيەرلەر مەن جۋرناليستەر ءبىر قاۋىم ەل بولدى. الىستان كەلگەن مەيماندار قازاقستاننان ەستەلىككە نە الىپ كەتتى دەپ ويلايسىز؟ ازيادانىڭ ءدۇبىرى ەستىلگەننەن-اق ەلىمىزدەگى كادەسىي, تابەرىك جاساۋمەن جانە ساتۋمەن اينالىساتىن كاسىپكەرلەر وليمپيادادان ءوز ناسىپتەرىن الىپ قالۋعا ۇمتىلدى. ازيادا-2011 سيمۆولى بولعان يربي دەگەن اتاۋعا يە ءىربىزدىڭ بالاسىنىڭ سۋرەتى بەينەلگەن تاۋارلار ءتيىستى ورىنداردان تابىلدى. سول سياقتى الماتى مەن استاناداعى سپورت سارايلارىنىڭ فويەسىندە, جارىس ءجۇرىپ جاتقان كەشەندەردە ازيادا-2011-ءدىڭ ەمبلەمالارى مەن تاڭبالارى بار كادەسىيلاردى ساتۋ باستالدى. ازيادا-2011 اتريبۋتيكاسىن ساتۋشىلاردىڭ اراسىندا جۇرگىزىلگەن ساۋالناما كورسەتكەندەي, شەتەلدىك تۋريستەر ازيادا تۇمارى – يربي بارىسى بەينەلەنگەن توسبەلگىلەر مەن كىلتباۋلارعا قىزىققان. ال قازاقستاندىقتار, ءبىرىنشى كەزەكتە, «قازاقستان» دەگەن جازۋى بار باس كيىم مەن بوكەبايلاردى ساتىپ الۋعا تىرىسادى. جەرلەستەرىمىز كوبىنەسە ءيربيدىڭ بەينەسى بار توڭازىتقىشقا جابىستىراتىن ماگنيتتەر, سونداي-اق قازىر قازاقستان قۇراماسىندا ويناپ جاتقان «بارىس» كلۋبىنىڭ فوتوسۋرەتىن ساتىپ العان. حوككەي كەزدەسۋلەرى اراسىنداعى ءۇزىلىستەردە مۇز ارەنالارىنىڭ فويەسىندە ءبىر-بىرىمەن توسبەلگى ايىرباستاۋشىلاردى دا كورۋگە بولاتىن ەدى. ەرلەر حوككەيى تۋرنيرىنە قاتىسۋشى كوماندالاردىڭ توسبەلگىلەرى ەڭ ۇلكەن سۇرانىسقا يە بولدى. مىنا قىزىقتى قاراڭىز, ازيادا-2011 ويىندارىنىڭ باس ءباسپاسوز ورتالىعى ورنالاسقان «الماتى تاۋەرس» بيزنەس ورتالىعىندا الماتىنىڭ كونسەرۆىلەنگەن اۋاسى ساتىلدى. سۇراستىرىپ كورگەندە, باعاسى – 850 تەڭگە بولىپ شىقتى. سالماعى قانشا ەكەنىن كىم ءبىلىپتى, بىراق, ىشىندە قالاداعى قاپتاعان كولىكتىڭ ءتۇتىنى بار ما ەكەن دەگەن وي تۋدى.جارىستى تاماشالاۋعا ءماجبۇر بولعان تۇلكى
بيىلعى ازيادا جارىستارى ادامدارمەن قاتار, جان-جانۋارلاردى دا قىزىقتىرعانىن بايانداۋ ءتىپتى قىزىق. بۇل اڭگىمە ويىنداردىڭ تۇمارى بولىپ وتىرعان ءىربىزدىڭ بالاسى تۋرالى ايتىلىپ وتىرعان جوق. الماتىداعى حالىقارالىق ترامپليندەر كەشەنىندەگى ك-125 ءترامپلينىنىڭ استىندا تۇلكى تۇرىپ جاتقانى سايىستىڭ سوڭعى كۇندەرىندە عانا بەلگىلى بولدى. قانات جولىنىڭ بيىگىنەن قاراعاندا, ونىڭ ىزدەرى جاقسى كورىنەدى ەكەن. ول بۇل جەردەن وتكەن جازدا وزىنە ءىن قازىپ العان. – بۇل وتە باتىل تۇلكى. سەكىرۋلەر باستالعاندا ول تىعىلىپ قالعان, الايدا, ءبىرىنشى كۇننەن كەيىن قاراڭعى باتقاندا شىعا باستادى. «اش بولساڭ – ىننەن شىعاسىڭ» دەيدى. قارنى اشقان جانۋار ادامداردان قورقۋىن ۇمىتتى, ءبىز ونى اراسىندا تاماقتاندىرىپ قويامىز», – دەپ كۇلەدى ءترامپليننىڭ تەحنيكالىق قىزمەتكەرلەرى. ازيادا جارىستارىنا امالسىز جانكۇيەر بولعان تۇلكى وسىلايشا ادامدارعا دا ۇيرەنە باستاپتى.فريستايل جولى 10 كۇندە سالىنعان
ازيادا تۇساۋىن كەسپەي تۇرىپ, «تاباعان» سپورت كەشەنىندە وتكەن فريستايلشىلاردىڭ بەيرەسمي جاتتىعۋىنان كەيىن جولدىڭ شەيپەر-ارحيتەكتورى جارىستىڭ تەحنيكالىق دەلەگاتىمەن بىرگە سوڭعى سىناقتاردى وتكىزگەن ەدى. شەيپەر-ارحيتەكتور ۆالەنتين كوتلياروۆتىڭ ايتۋىنشا, فريستايلعا ارنالعان جولدى سالۋعا نەبارى 10 كۇن كەتكەن. الايدا, بۇل جولدا وتكەن جىلدىڭ جازىنان باستاپ كۇردەلى جۇمىستار جۇرگىزىلگەن. – ءبىز جولداردى ەۋروپالىق ستاندارتتارعا ساي دايىندادىق. 3 اكروباتيكا ترامپلينىن سالدىق, موگۋلعا ارنالعان جوتالار جاسادىق. جولداردىڭ تەحنيكالىق جاعدايىن ازيادا تەحنيكالىق دەلەگاتى قابىلداپ, بەكىتكەن, – دەدى كوتلياروۆ. ال فريستايل سايىسىندا ونەر كورسەتكەن سپورتشىلار فريستايل تراسساسىنىڭ 10 كۇندە سالىنعانىنا سەنبەيدى. ساپاسى جاعىنان ءسوز كەلتىرمەيتىن جارىس جولى الىمساقتان بەرى سولاي كەلە جاتقانداي, ساقاداي ساي ەدى. دميتري رەيحەرد:«تەلەفون قوڭىراۋى ماعان كۇش-جىگەر بەردى»
سونىمەن «تاباعان» سپورت كەشەنىندە قازاقستاننىڭ فريستايل قۇراماسىنىڭ كوشباسشىسى دميتري رەيحەرد 31 قاڭتاردا جانكۇيەرلەردىڭ ءۇمىتىن اقتاپ, ازيا ويىندارىندا موگۋل سايىسىنىڭ جەڭىمپازى اتاندى. وليمپيادا ويىندارىنا قاتىسۋشى, الەم كۋبوگى مەن ەۋروپا كۋبوكتارىنىڭ ءتۇرلى كەزەڭدەرىندە الدىنا جان سالماعان دميتري 23,63 ۇپاي جيناپ, جاپوندىق ۋەنو وسامۋدى ارتتا قالدىردى. جاتتىعۋلار بارىسىندا تراسسانى تەكسەرىپ كورگەننەن كەيىن, دميتري قانداي ەلەمەنتتەردى ورىندايتىنىنا شەشىم قابىلداپ: – تاڭداعان باعدارلامامدى جەڭىل دەپ ايتا المايمىن, الايدا, ازيادادا مەن كەرەمەت ءبىر نارسە كورسەتۋدى جوسپارلاعان دا جوقپىن – تەك ءوزىمنىڭ ادەتتەگى ورىنداپ جۇرگەن ەلەمەنتتەرىم, – دەگەن ەدى. موگۋلدىڭ التىنىن اسىنعان رەيحەرد: – مەن تۋعان ەلىمە تاعى ءبىر التىن جۇلدە الىپ كەلگەنىمە قۋانىشتىمىن! الايدا, الدا ءالى قاتار موگۋل بويىنشا سايىستار بار. سوندىقتان, ازىرشە «ۋھ» دەيتىن ۋاقىت كەلگەن جوق, – دەگەن بولاتىن. – جارىس باستالار الدىندا نە جايلى ويلادىڭىز؟ – بۇل قىزىقتى وقيعا: ءدال سورە كەزىندە, مەنىڭ شىعاتىنىم حابارلانىپ قويعان, جارىسقا دايىن تۇرمىن. تاپ وسى ۋاقىتتا تەلەفونىم شىرىلدادى. ودان شىققان كوڭىلدى اۋەن ماعان كۇش-جىگەر بەردى! – سوڭعى وليمپياداداعى ءساتسىز ءناتيجەلەرىڭىز ازيادادا بار كۇشىڭدى سالۋعا ىنتا بەرگەن جوق پا؟ – جوق, مەن ءبىر نارسەنى ويىمنان شىعارماي, ساتسىزدىكتەردەن كەيىن توقىراپ قالاتىن ادام ەمەسپىن. ارقاشان العا قاراۋ كەرەك, الدىڭا جاڭا ماقساتتاردى قويىپ, سول ماقساتتارعا جەتۋ كەرەك.بىرەۋدىڭ قاتەلىگىنە قۋانامىن دەپ التىن جۇلدەدەن ايىرىلىپ قالدى
ازيا ويىندارىنىڭ چەمپيونى, قازاقستان بياتلونشىسى الەكساندر چەرۆياكوۆ جارىس كۇندەرىندە جانكۇيەرلەرىن قۋانتۋدان جالىقپادى-اۋ. التىن مەدال الۋ جوسپارىن دا تولىقتاي ورىندادى. 1 اقپاندا ول بياتلوندى سپرينت جارىسىندا التىن السا, كەلەسى كۇنى دە 12,5 شاقىرىمدىق ىزگە-ءتۇسۋ جارىسىندا سول جەتىستىگىن قايتالادى. ايتقانداي, وسى جولى چەرۆياكوۆ جارىسقا ءبىرىنشى بولىپ شىقتى. 6 سەكوندتەن كەيىن سپورت سايىسىن قىتايلىق رەن لونگ جالعاستىردى. 33,5 سەكوند وتكەن سوڭ جارىس الاڭىنا جاپونيا سپورتشىسى دجۋندجي ناگاي شىقتى. جول بويىندا وسى ناگاي قىتاي بياتلونشىسىنان وزىپ كەتىپ, چەرۆياكوۆتىڭ سوڭىنا ءتۇستى. ءبىراق قازاقستاندىق سپورتشىنى ءبىر جايت قۇتقارىپ قالدى. چەرۆياكوۆتىڭ نىساناعا اتقان وقتارى تيمەي جاتقانىن كورگەن جاپونيا سپورتشىسى قۋانعانى سونشالىق ءوزىنىڭ نىسانالارىنان كوڭىلى اۋىپ كەتىپ, مۇقيات بولعان جوق. مۇنىسىن جاپوندىق سپورتشى ويىن اياقتالعان سوڭ ءوزى مالىمدەدى. – چەرۆياكوۆ – وتە ءتاجىريبەلى بياتلونشى. دەگەنمەن, بۇگىن ونىڭ جولى بولماعان سياقتى. اتىس شەبىنە مەن چەرۆياكوۆتان كەيىن كەلىپ جەتىپ, ونىڭ كوزدەي الماعان نىساندارىن كوردىم. جاسىراتىن نەسى بار, قارسىلاسىمنىڭ ءمۇلت كەتكەنىن كورىپ, قاتتى قۋاندىم. ورىنسىز بولعان قۋانىش ءوزىمدى تىعىرىققا اپارىپ تىقتى. بۇرىن مەندە نىسانا دالدەۋدە ەشقانداي كەمشىلىك كەتپەيتىن ەدى. دەي تۇرعانمەن, ناعىز بياتلوننىڭ قانداي بولۋى كەرەك ەكەندىگىن بارشاعا كورسەتتىك. جارىس تارتىسقا تولى بولدى. ويىن اياقتالعانشا جۇرەگىمىز ءجيى قاعىپ, قوبالجىدىق. مەندە الەكساندرمەن كەزدەسەتىن ءساتتەر ءالى بولادى. ءبىز ەستافەتادا جەكە جارىس كەزىندە باق سىناسامىز. ەسەمدى قايتارامىن دەپ ويلايمىن, – دەگەن بولاتىن. سول جولى الەكساندر چەرۆياكوۆتىڭ ايتۋىنشا, كەرىسىنشە ونىڭ جولى بولعان, سونىڭ ارقاسىندا ول جەڭىسكە جەتتى. – ىزگە ءتۇسۋ جارىسى الدىندا ەس جيناۋعا ءبىر تاۋلىكتەن از ۋاقىت بەرىلدى. تراسسادا شارشاعانىمىز ءبىلىنىپ تۇردى. ەگەر جاپوندىقتار مەنىڭ قالاي اتقانىما ەمەس, وزدەرىنىڭ ويىنىنا ءجىتى كوڭىل بولگەندە, ناتيجە باسقاشا بولار ەدى. بۇل جولى مەنىڭ جولىم بولدى. سپرينتتە كۇمىس مەدال العان قىتاي بياتلونشىسى رەن لونگ العان قولا جۇلدەسى جايلى بىلاي دەپ وي بولىسەدى: – چەرۆياكوۆ دەگەندە بىردەن شاپشاڭ بياتلون دەگەن وي تۇسەدى. ول مەرگەندىگىمەن بولماسا دا, شاپشاڭدىعىمەن جەڭىستى كەز كەلگەن ادامنىڭ ۋىسىنان سۋىرىپ الا الادى. جارىسقا شىققان ساتتەن باستاپ قازاقستاندىق سپورتشىنىڭ سوڭىنان جۇگىردىم. اتىس شەبىنە دەيىن ونى وزىپ كەتەم بە دەپ ەدىم. بىراق مەن وتە باياۋ اتتىم. اتىس شەبىندە ۋاقىتىمدى ءولتىرىپ الدىم. بۇل ازيادادا ەندى جارىسقا شىقپايمىن. باپكەرلەردىڭ ءۇمىتىن اقتاماعانىما قىنجىلامىن. وسىلايشا, دجۋندجي ناگاي قازاقستاندىق سپورتشىنىڭ قاتەلىگىنە قۋانامىن دەپ بوساڭسىپ, التىن جۇلدەدەن ايىرىلىپ قالعان. ايناش ەسالي.