جۋىردا استاناداعى «فوليانت» باسپاسىنان جۋرناليست-جازۋشى قايسار ءالىمنىڭ «سەيىلمەيتىن مۇڭ» اتتى تراگەديالىق حيكاياتى جارىق كوردى. وندا قازاقستاننىڭ حالىق ءارتىسى ءانۋار بورانباەۆتىڭ وجەت ونەرى مەن شىرقاۋلى, شىتىرماندى شىعارماشىلىق كەزەڭى الۋان قىرىنان جارقىراپ اشىلعان.
كورنەكتى تەاتر جانە كينو اكتەرى ءانۋار 51 جاس قىسقا عۇمىرىندا سوڭىنا وشپەستەي ءىز قالدىرىپ كەتكەن دارا تۇلعا ەدى. ول سومداعان بەينەلەردە الدەبىر زيالىلىقتىڭ نازىك سەزىمى جۇرەك قىلىن تەربەيتىن. ۇلتتىق ءداستۇردىڭ كەنىشىندەي ول ءتىل قۇدىرەتىن تەرەڭ سەزىنە بىلگەن. رۋحاني زەردەسى ۇشقىر, كورەرمەن جانىن باۋراپ العان ول ءاماندا حالقىنىڭ ىستىق ىقىلاسىنا ءبولەنىپ جۇرەتىن. ونىڭ تەاتر ءجانە كينو سالاسىندا جاساعان وبرازدارى ۇمىتىلماستاي مۇرا بولىپ قالعانى بەلگىلى. ءالى دە حالقىنا ءمىنسىز قىزمەت ەتىپ كەلە جاتقانداي جانە ۇرپاقتار كادەسىنە دە قالتقىسىز جاراي بەرەتىنىنە كامىل سەنىمدىمىز.
تاعدىر ءانۋاردى تالاي سىنعا سالدى. بىراق ول مويىمادى, قايتا شاربولاتتاي شىڭدالا ءتۇستى. ءبىر اياعىنان ايىرىلسا دا ساحنامەن قوشتاسپاي, ونەر ايدىنىندا وجەتتەنە ورگە ءجۇزدى. اراعا ءبىراز ۋاقىت سالىپ, 1994 جىلدىڭ ساۋىرىندە «انا – جەر – انانىڭ» 30 جىلدىق مەرەكەلىك قويىلىمىنا شىقتى. كورەرمەندەر سۇيىكتى اكتەرىن كوزدەرىنە جاس ىركىپ تۇرىپ قارسى العان ەدى...
ءانۋار ونەر ءۇشىن جارالعان تۇلعا بولاتىن. ونىڭ ءسانى تەاتردىڭ اجارىن اشاتىن. ۇلتىنىڭ رۋحاني كەمەلدەنۋىنە قالتقىسىز قىزمەت ەتكەن حاس تالانتتىڭ ادامي بولمىسى مەن مازمۇندى دا ابىرويلى ونەر جولى كەيىنگى ۇرپاققا ادەمى ۇلگى بولىپ قالعانىن مەدەت تۇتامىز.
مىنە, اۆتور «سەيىلمەيتىن مۇڭ» تراگەديالىق حيكاياتىندا ءا. بورانباەۆتىڭ وسىنداي قايتالانباس تاعدىر, تالايىن شەبەرلىكپەن ءارى كوركەم ورە ءبىلىپتى. كىتاپ بىلاي اياقتالادى: «اكتەردىڭ مۇڭى سەيىلىپ كورىپ پە؟ اسىرەسە, تۋمىسىنان تالانت سىباعاسىن ەنشىلەگەن ساحناگەردىڭ ماڭدايىنىڭ بەس ەلى سورى بار, بولار-بولماس باعى بار, ءماڭگىلىك سەيىلمەيتىن مۇڭى بار... نە تۋسا دا مۇڭنان تۋادى. شىنشىل عۇمىر مۇڭنان سۇزگىلەنىپ, ەلەنىپ, جاراتىلاتىن سەكىلدى...»
... ءيا, وسى تۇجىرىمدار ءانۋار عۇمىرىنىڭ تىلسىمىن اشا تۇسەتىندەي!
ءسابيت نۇربەكوۆ.