تاۋەلسىزدىكتىڭ العاشقى جىلدارىنان-اق ەلباسىمىز ەلىمىزدە ءبىلىم مەن عىلىمنىڭ دامۋىنا, ونى قارجىلاندىرۋعا ەرەكشە كوڭىل ءبولىپ كەلەدى. سوڭعى ون جىلدا ءبىلىم بەرۋدى دامىتۋعا جۇمسالعان قارجى ون ەسەگە ارتىپ, بۇل كورسەتكىش 2010 جىلى ىشكى جالپى ءونىمنىڭ 4,1 پايىزىنا جاقىندادى جانە بىرقاتار ەۋروپالىق ەلدەردىڭ دەڭگەيىنە جەتتى. پرەزيدەنت ءوزىنىڭ قازاقستان حالقىنا بيىلعى جولداۋىندا ءبىلىم بەرۋدى جاڭعىرتۋ, ونى جاڭا بەلەسكە كوتەرۋگە ەرەكشە نازار اۋداردى. ويتكەنى, ساپالى ءبىلىم يندۋستريالاندىرۋ مەن يننوۆاتسيالىق دامۋدىڭ نەگىزى بولىپ تابىلادى.
جۋىردا بولىپ وتكەن ءبىلىم جانە عىلىم مينيسترلىگىنىڭ القا ماجىلىسىندە ءسوز سويلەگەن مينيستر باقىتجان جۇماعۇلوۆ ءبىلىم بەرۋدى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىن ىسكە اسىرۋ اياسىندا العاشقى رەت مۇعالىم مارتەبەسىن كوتەرۋ ماسەلەسى كورىنىس تاپقانىن تىلگە تيەك ەتكەن بولاتىن. ءيا, باعدارلامادا, ەڭ الدىمەن, پەداگوگتاردىڭ ءمارتەبەسىن كوتەرۋ, ولاردىڭ بىلىكتىلىگىن ارتتىرۋ, قارجىلاندىرۋدىڭ جاڭا جۇيەسىن ەنگىزۋ, ەكىنشىدەن ماتەريالدىق ءال-اۋقاتىن ارتتىرۋ ارقىلى ىنتالاندىرۋ, ءۇشىنشىدەن, پەداگوگتاردىڭ بەدەلىن ءوسىرۋ ءۇشىن بارىنشا اۋقىمدى جۇمىستار جۇرگىزۋ كوزدەلگەن.
ءبىلىم بەرۋ ىسىندە مينيسترلىك تاراپىنان جوعارى وقۋ ورىندارىندا ەڭبەك ەتىپ جۇرگەن وقىتۋشىلاردىڭ جاعدايىن جاقسارتۋ, ولاردىڭ الاڭسىز جۇمىس ىستەۋىنە مۇمكىندىك بەرۋ, قولداۋ ماقساتىندا 2005 جىلدان بەرى جۇزەگە اسىپ كەلە جاتقان ۇزدىك وقىتۋشى مەملەكەتتىك گرانتىن بەلگىلەۋدىڭ ماڭىزى ەرەكشە دەپ ايتا الامىز. بۇل ءسوز جوق, جوعارى وقۋ ورىندارىنىڭ وقىتۋشىلارىنا دەگەن ۇلكەن كومەك. بۇل گرانت عىلىمي ىزدەنىستەردە جانە پەداگوگيكالىق قىزمەتتە بۇدان دا جوعارى كورسەتكىشتەرگە قول جەتكىزۋگە, جۇمىستى جۇيەلى, ناقتى جۇرگىزۋگە جول اشادى جانە پەداگوگ ءمارتەبەسىن كوتەرەدى. وقىتۋشىلاردىڭ الدىڭعى قاتارلى وقۋ ورىندارىندا تاعىلىمدامالاردان ءوتۋلەرىنە جانە زامان تالابىنا ساي بولۋىنا كومەكتەسەدى. مەملەكەتتىك گرانت وقىتۋشىلاردىڭ عىلىمي-زەرتتەۋ جۇمىستارى مەن ستۋدەنتتەرگە ساباق بەرۋدەگى ءادىس-تاسىلدەرىن جەتىلدىرۋگە دەگەن ىنتاسىن ارتتىرا ءتۇسەتىنى ءسوزسىز. ەلىمىزدىڭ ءبىلىم بەرۋ دەڭگەيىن كوتەرىپ, ساپاسىن ارتتىرۋعا باعىتتالعان وسى كونكۋرس الداعى ۋاقىتتا دا جالعاسىن تاپقانى ءجون دەپ ويلايمىز.
سەيدەحان الىبەك, م.اۋەزوۆ اتىنداعى وقمۋ-دىڭ فاكۋلتەت دەكانى, تاريح عىلىمدارىنىڭ دوكتورى.
شىمكەنت.