سانالى ۇرپاق ءوسىرىپ, ساپالى ءبىلىم مەن تاربيە بەرۋ بارشامىزدىڭ ورتاق پارىزىمىز بولسا كەرەك. ۇستازدىڭ جۇلدىزىن جاعىپ, مارتەبەسىن بيىكتەتەتىن دە, تاعىلىمىن قالىپتاستىرىپ, تانىمىن كەڭەيتەتىن دە – وسى ولشەمدەر. ەلباسىمىز تاۋەلسىز قازاقستاننىڭ كەلەشەگى قاشاندا قوعامداعى ءبىلىم دەڭگەيىنە تاۋەلدى ەكەنىن ۇنەمى ايتىپ كەلەدى. وسى ورايدا, الاش كوسەمدەرىنىڭ ءبىرى احمەت بايتۇرسىنوۆتىڭ «مەكتەپتىڭ جانى – مۇعالىم. مۇعالىم قانداي بولسا, مەكتەپ سونداي بولماق» دەگەن سوزدەرى ەسكە تۇسەدى. وسى ءبىر اتالى ۇعىم ۇستازدار قاۋىمى ءۇشىن باستى ۇستانىم بولۋى شارت.
«مەكتەپ – كەمە, ءبىلىم – تەڭىز» دەسەك,ەل ەرتەڭىن بىلىممەن قارۋلاندىراتىن, تاربيە بەرەتىن كيەلى شاڭىراق اركەز ادامزاتتىڭ بارلىق اسىل قاسيەتتەرىن وسكەلەڭ ۇرپاق بويىنا ءسىڭىرىپ, قوعامدىق كوزقاراستارىن دۇرىس قالىپتاستىرىپ كەلە جاتقانى داۋسىز. ۇستازدار قاۋىمى بولسا, شاكىرتتەردىڭ جان-جاقتى دامىعان تۇلعا بولىپ ەرجەتۋىنە زور ىقپال ەتەرى كامىل. بۇگىنگى مەكتەپ وقۋشىلارى – ەل تىزگىنىن ۇستار ەرتەڭىمىز. ءبىلىمنىڭ وركەندەۋى – قوعامنىڭ العا جىلجۋى, وركەنيەتىمىزدىڭ ونەگەلى ولشەمى. ءححى عاسىردا كەز كەلگەن ەلگە شىراق بولاتىن دا – ءبىلىم. ال, ءبىلىمنىڭ قاينار كوزى – مەكتەپ. 2007 جىلى پايدالانۋعا بەرىلگەن قازاق مەكتەپ-گيمنازياسى وبلىس ورتالىعىنداعى ىرگەلى ءبىلىم وشاعى سانالادى. قازىرگى تاڭدا مۇندا 1100 وقۋشى ءبىلىم الادى. ولارعا 23 جوعارى, 32 ءبىرىنشى, 18 ەكىنشى ساناتتى مۇعالىم ساباق بەرەدى. ماتەريالدىق-تەحنيكالىق بازاعا توقتالاتىن بولساق, 2 سپورت زالى, 1 باسسەين, 2 شەبەرحانا, دارىگەرلىك كابينەت, جانتانۋشىعا ارنالعان ارنايى بولمە, 2 جاڭا موديفيكاتسيالىق لينگافوندى-مۋلتيمەديالىق كابينەت, 2 ينفورماتيكا كابينەتى, 22500 كىتاپ قورى بار كىتاپحانا, وقۋ زالى, ادىستەمەلىك كابينەت, 240 ورىندى اكت زالى, جايلى اسحانا, 77 ورىندى شاعىن ورتالىق جۇمىس ءىستەيدى. ينتەرنەت قولجەتىمدى, ارنايى ەلەكتروندى وقۋ جۇيەسى e-lerning-كە قوسىلعان. 2007 جىلدان بەرى ۇشتىلدىلىك باعىتتا ەكسپريمەنتتىك ءبىلىم بەرىلىپ كەلەدى. ماتەماتيكا ءپانى قوسىمشا فاكۋلتاتيۆ كۋرسىندا اعىلشىن تىلىندە وقىتىلادى. 2012 جىلدان نازارباەۆ ينتەللەكتۋالدىق مەكتەبىنىڭ ءىس-تاجىريبەسى ەنگىزىلدى. ۇستازدارىمىز قازىرگى زامانعى قاجەت بىلىمدەردى وقۋشىلاردىڭ ءوز بەتىنشە مەڭگەرۋىنە جۇيەلى اتسالىسىپ كەلەدى. ءار شاكىرتتى بەلسەندى تانىمدىق ۇردىسكە تارتۋ ارقىلى العان بىلىمدەرىن تاجىريبەدە قولدانۋعا, ينتەللەكتۋالدىق, دەنەلىك كۇشتەرىن دامىتۋعا, ءوز ويلارىن ايتۋعا ۇيرەتۋدەن جالىققان ەمەس. ەلىمىزدە بولىپ جاتقان ۇدەرىستەر ءبىلىم بەرۋ جۇيەسىنە تىڭ كوزبەن قاراۋدى, قول جەتكەن تابىستاردى سىن كوزبەن باعالاي وتىرىپ سارالاۋدى, وقۋشىلاردىڭ شىعارماشىلىق الەۋەتىن دامىتۋدى, مۇعالىمنىڭ ءىس-ارەكەتىن جاڭاشا تۇرعىدا ۇيىمداستىرۋدى تالاپ ەتەدى. پرەزيدەنتىمىزدىڭ «قازاقستاننىڭ بولاشاعى – بۇگىنگى جاستار. سىزدەر ولارعا قالاي ءبىلىم بەرەسىزدەر, قازاقستان سول دەڭگەيدە بولادى» دەگەن ءسوزى بۇگىنگى ءبىلىم بەرۋ جۇيەلەرىندەگى وقۋ-تاربيە ۇدەرىسىندە زاماناۋي وقىتۋ تەحنولوگيالارىن ءتيىمدى قولدانۋ ارقىلى ءبىلىمى مەن بىلىكتىلىگىن ارتتىرۋدىڭ وزەكتىلىگىن كورسەتسە كەرەك.
قازىرگى قوعام الدىندا تۇرعان وزەكتى ماسەلەنىڭ ءبىرى – كوپمادەنيەتتى, شىعارماشىل, الەۋمەتتىك بەيىمدەلگەن تۇلعا قالىپتاستىرۋ. وقۋشى قابىلەتتەرىن جان-جاقتى دامىتىپ, شىعارماشىلىعىن ۇشتاي ءبىلۋ ءۇشىن ۇستاز ءوزى شىعارماشىل تۇلعا بولۋى ءتيىس. بۇل ورايدا بارلىق دەڭگەيدەگى تامىز كونفەرەنتسيالارىنىڭ بەرەرى مول. ولاردا ءبىلىم ساپاسىن ارتتىرۋ, تۇپكى ناتيجەگە باعىتتاۋ, مۇعالىمدەردىڭ كاسىبي شەبەرلىكتەرىن ارتتىرۋ, اقپاراتتىق – كوممۋنيكاتيۆتى مادەنيەتى جوعارى تۇلعالىق-دامىتۋشىلىق فۋنكتسيانى جەتىلدىرۋ سەكىلدى وزەكتى ماسەلەلەر تالقىلانىپ, ناقتى مىندەتتەر بەلگىلەنەدى. ۇلاعاتتى ۇستاز اتانا ءبىلۋ, ونى قادىر تۇتۋ, ارىڭداي تازا ۇستاۋ – ءار مۇعالىمنىڭ بورىشى. وزگەرمەلى قوعامداعى جاڭا فورماتسيا مۇعالىمى – پەداگوگيكالىق قۇرالداردىڭ بارلىعىن مەڭگەرگەن, ءوزىن ءوزى جەتىلدىرۋگە تالپىنعان, رۋحاني دامىعان, تولىسقان شىعارماشىل تۇلعا. نارىق جاعدايىنداعى مۇعالىمگە قويىلاتىن تالاپتار: باسەكەگە قابىلەتتىلىگى, ءبىلىم بەرۋ ساپاسىنىڭ جوعارى بولۋى, كاسىبي شەبەرلىگى, ادىستەمەلىك جۇمىستاعى شەبەرلىگى.
تاۋەلسىز ەل تىرەگى – ءبىلىمدى ۇرپاق دەسەك, مەكتەبىمىزدىڭ كۇن تارتىبىندە تۇرعان باستى ماسەلە- ءبىلىم بەرۋ, عىلىمدى دامىتۋ. وركەنيەت بىتكەننىڭ وزەگى, عىلىم, تاربيە ەكەندىگىنە ەشكىمنىڭ تالاسى جوق. وسى ورايدا ءبىلىم ورداسى – مەكتەپ, ال مەكتەپتىڭ جانى – مۇعالىمدەردىڭ باستى مىندەتى – ءوز ۇلتىنىڭ تاريحىن, مادەنيەتىن, ءتىلىن قاستەرلەي وتىرىپ, جالپى ادامزاتتىق رۋحاني قۇندىلىقتارعا ۇشتاستىرا بىلەتىن تۇلعا تاربيەلەۋ.
بۇلبۇل احماديقىزى,
قازاق مەكتەپ-گيمنازياسىنىڭ
ديرەكتورى
پەتروپاۆل