دانيار مارات ۇلى ەلەۋسىنوۆ
بوكسشى. ەڭبەك سىڭىرگەن سپورت شەبەرى.
استانا قالاسى
1991 جىلى 13 ناۋرىزدا باتىس قازاقستان وبلىسى, قازتالوۆ اۋدانى, قايىڭدى اۋىلىندا تۋعان.
– وليمپيالىق ويىنداردىڭ چەمپيونى (ريو-دە-جانەيرو, 2016), 69 كگ;
– الەم چەمپيونى (الماتى, 2013), 69 كگ;
– الەم چەمپيوناتىنىڭ كۇمىس جۇلدەگەرى (دوحا, 2015), 69 كگ;
– ازيا ويىندارىنىڭ چەمپيونى (گۋانچجوۋ, 2010), 69 كگ;
– ازيا ويىندارىنىڭ چەمپيونى (ينچحون, 2014), 69 كگ;
– ازيا چەمپيونى (اممان, 2013), 69 كگ;
– ازيا چەمپيونى (بانگكوك, 2015), 69 كگ.
جاتتىقتىرۋشىسى: مارات ءتالىپ ۇلى ەلەۋسىنوۆ.
سول كۇنى ريوداعى بۇل جەكپە-جەكتى ءبارىمىز كوردىك. سەبەبى وسىنىڭ الدىندا جارتىلاي فينالدىق شايقاسىن فرانتسيالىق سۋلەيمان سيسسوكومەن وتكىزگەن دانياردىڭ قاباعى جارىلعانى قاتتى الاڭداتىپ ەدى. ەكىنشى راۋندتا دارىگەرلەردىڭ شەشىمىمەن توقتاتىلعان سول جەكپە-جەكتىڭ ءبىزدىڭ كاپيتاننىڭ پايداسىنا شەشىلگەنى قانداي جاقسى بولدى.
سوندىقتان وسىنداي قيىندىقپەن فينالدىق ايقاسقا شىققان 69 كيلوعا دەيىنگى تارلانىمىزدىڭ ۇرىسىن تاپجىلماي وتىرىپ كۇتكەن ەدىك. ال دانيار ەلەۋسىنوۆ ءبىزدىڭ ءبارىمىزدىڭ سول ءۇمىتىمىزدى اقتادى. ول وزىمەن التىن مەدال ءۇشىن تالاسقا تۇسكەن وزبەك بوكسشىسى شاحرام گياسوۆتى ەش كۇمانسىز جەڭدى. سوندىقتان تورەشىلەر وعان جەڭىستى ءبىر اۋىزدان بەردى. ەسەپ – 3:0 (29:28, 29:28, 29:28). وسى شايقاستا دانياردىڭ ءۇش راۋند بويى الدىندا الىپ قالعان جاراقاتىنا سوققى تيگىزبەي, رينگتە اسا ساۋاتتى ونەر كورسەتكەنى ماماندار مەن جانكۇيەرلەردى ەرەكشە ءتانتى ەتتى.
بۇل ريو وليمپياداسىنداعى قازاقستاننىڭ جالپى ءۇشىنشى, ال بوكستان قورجىنعا تۇسكەن العاشقى دا سوڭعى التىن مەدالى بولدى. سونىمەن بىرگە دانيار ءبىزدىڭ بوكسشىلاردىڭ 2004 جىلى افينادا ىرگە قالاعان 69 كيلوعا دەيىنگى سالماقتا التىن مەدالدى جەڭىپ الۋ ءداستۇرىن ودان ءارى جالعاستىردى. ول سونداي-اق 1996 جىلى قازاقستان قۇراماسى وليمپيالىق ويىندارعا العاش رەت دەربەس كوماندا رەتىندە قاتىسقان كەزدەن باستاپ بوكسشىلارىمىزدىڭ كەمىندە ءبىر التىن مەدال الۋ ءۇردىسىن دە جالعاپ بەردى. قازاقستان بوكسشىلارى قاتارىنان بەسىنشى وليمپيادادا ەڭ جوعارى ناگراداعا قول جەتكىزدى. بۇل التىن مەدال بىزگە سونىسىمەن دە قىمبات!
تالعات رايىمبەك,
«ەگەمەن قازاقستان»
نيدجات ءالي وعلى راحيموۆ
اۋىر اتلەت. حالىقارالىق دارەجەدەگى
سپورت شەبەرى
اتىراۋ قالاسى
1993 جىلى 13 تامىزدا ازەربايجان استاناسى
باكۋ قالاسىندا تۋعان.
2014 جىلعى تامىزدان بەرى قازاقستان رەسپۋبليكاسىنىڭ ازاماتى.
– وليمپيالىق ويىنداردىڭ چەمپيونى (ريو-دە-جانەيرو, 2016), 77 كگ;
– الەم چەمپيونى (حيۋستون, 2015), 77 كگ.
جاتتىقتىرۋشىسى: ۆيكتور الەكسەەۆيچ ني.
ەكى جىلدان بەرى قازاقستان ازاماتتىعىن الىپ, ءبىزدىڭ ەلىمىزدىڭ نامىسىن قورعاپ جۇرگەن ءتۇبى اتىراۋلىق ۇلتى ازەربايجان اۋىر اتلەت نيدجات راحيموۆ ريو-دە-جانەيرودا شىن مانىندە دە ايدى اسپاننان ءبىر-اق شىعارعانداي بولدى. سايىستا 77 كيلوعا دەيىنگى سالماقتا سىنعا تۇسكەن ول قازاقستان قۇراماسى قورجىنىنا العاشقى التىن مەدالدى سالىپ, بۇكىل ەلدىڭ ەڭسەسىن كوتەرىپ جىبەردى. مۇنى سپورتشىنىڭ ءوزى سول ساتتە قىزۋ قاندى بي قيمىلىمەن ايشىقتاپ كورسەتىپ بەردى.
نيدجاتتىڭ التىن تۇعىردا تۇرعان ساتىندەگى جان تولقىتار ساتتەر ەستەن كەتپەيدى. قازاقستان گيمنىن قوسىلا ايتىپ تۇرعان ونىڭ كوزدەرى سول كەزدە بوتالاپ قويا بەرگەن ەدى.
ال سودان كەيىنگى ەڭ ءبىر ەستە قالارلىق ءسوزى ونىڭ ەندى قازاقستاننان كەتپەيتىنى تۋرالى مالىمدەمەسى بولدى. «ازەربايجانعا كەتپەيمىن, وندا تەك قوناق بولىپ قانا باراتىن شىعارمىن», دەدى قازاق ەلىنە كەلىپ, باعى جانعانىن جاقسى سەزىنگەن اتلەت. ول ءبىزدىڭ ەلىمىزگە كەلگەن ساپارىن مۇنىڭ الدىندا, 2015 جىلدىڭ قاراشا ايىندا اقش-تىڭ حيۋستون قالاسىندا وتكەن الەم چەمپيوناتىندا توپ جارىپ شىعۋىمەن باستاعان بولاتىن. ەندى, مىنە, وليمپ شىڭىن دا باعىندىرىپ ۇلگەردى.
ريودا جۋرناليستەردىڭ ءبىرى اتىراۋلىق اتلەتكە: «ەگەر وتانىڭا قايتا شاقىرسا, باراسىڭ با؟» دەگەن سۇراق قويدى. ال نيدجات سول تۇستا ءبىز كۇتكەندەي جاۋاپ قايتاردى. «جوق, مەن قازاقستاندا قالامىن. ەلگە ەندى تەك قوناق رەتىندە باراتىن شىعارمىن, قازاقستانعا ابدەن ۇيرەنىپ قالدىم», دەدى ول قاراپايىم عانا.
بۇل جاۋاپ بىزگە ايرىقشا ۇنادى.
جولداسبەك شوپەعۇل,
«ەگەمەن قازاقستان»
دميتري يگورەۆيچ بالاندين
سۋدا ءجۇزۋشى. سپورت شەبەرى
ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى.
1995 جىلى 4 ساۋىردە الماتى قالاسىندا تۋعان.
– وليمپيالىق ويىنداردىڭ چەمپيونى (ريو-دە-جانەيرو, 2016), 200 م. براسس;
– ازيا ويىندارىنىڭ ءۇش دۇركىن چەمپيونى (ينچحون, 2014), 50 م., 100 م., 200 م. براسس;
– ۋنيۆەرسيادا چەمپيونى (كۆاندجۋن, 2015), 100 م. براسس; ۋنيۆەرسيادانىڭ قولا جۇلدەگەرى (كۆاندجۋن, 2015), 50 م. براسس.
جاتتىقتىرۋشىسى: الەكسەي نيكولاەۆيچ كازاكوۆ.
سۋدا ءجۇزۋشى دميتري بالاندين سۋ سپورتى تاريحىندا قازاقستاننىڭ وليمپيالىق ويىندارداعى ەڭ العاشقى چەمپيونى اتانعان سپورتشى بولدى. راس, 1956 جىلى اۆستراليانىڭ مەلبۋرن قالاسىندا وتكەن وليمپيادادا گەننادي نيكولاەۆ ەسىمدى قازاقستاندىق ءجۇزگىش 4ح200 مەترلىك ەستافەتاسىندا قولا مەدالعا قول جەتكىزگەن ەدى. بىراق الماتىدا تۋىپ-وسكەن سپورتشى سول جولى الامانعا ماسكەۋ قالاسىنىڭ اتىنان بارعان بولىپ شىقتى.
ال بيىلعى 11 تامىز كۇنى الماتىلىق ستۋدەنت دميتري بالاندين ريوداعى ويىنداردىڭ فينالىنا شىققان كەزدە قانداي قۋاندىق دەسەڭىزشى! ايتا كەتەيىك, بۇعان دەيىن براسس ادىسىمەن 100 مەترگە جۇزگەن دميتري بالاندين فينالدىق كەزەڭگە دەيىن شىعىپ, شەشۋشى سىندا نەبارى سەگىزىنشى ورىن العان بولاتىن. الايدا ساڭلاعىمىزدان تاپ وسىنداي ەرلىكتى كۇتە قويعان جوقپىز. ول بولسا سونىڭ بارىنەن جوعارى دەڭگەيدەن كورىنىپ, 200 مەترگە براسس ادىسىمەن جۇزۋدە سەنساتسيا جاساپ, ويىنداردىڭ چەمپيونى اتاندى. ول, سىندا 2:07,46 مينۋت ۋاقىت كورسەتكىشىمەن توپ جاردى.
«الماتىنىڭ التىن بالاسى» بۇل تابىسقا جەتۋ جولىندا 2014 جىلى الدىمەن وڭتۇستىك كورەيانىڭ ينچحون قالاسىندا وتكەن ازيا ويىندارىندا ءۇش التىن مەدال, 2015 جىلى سول ەلدىڭ كۆاندجۋن شاھارىندا وينالعان ۋنيۆەرسيادادا ءبىر التىن, 1 قولا مەدالعا قول جەتكىزگەن بولاتىن.
برازيليا جەرىندەگى باسىرەلى باسەكەدە بالانديننەن كەيىنگى ەكىنشى ورىندى امەريكالىق دجوش پەرنو السا (2:07,53), ۇزدىك ۇشتىكتى 2:07,70 ۋاقىتىمەن رەسەي وكىلى انتون چۋپكوۆ تياناقتادى.
تالعات ءسۇيىنباي,
«ەگەمەن قازاقستان»