بۇگىن استانادا وليمپيالىق ويىنداردىڭ چەمپيوندارى مەن جۇلدەگەرلەرىن ماراپاتتاۋ ءراسىمى ءوتتى.
سالتاناتتى شارادا مەملەكەت باسشىسى نۇرسۇلتان نازارباەۆ وليمپيادا چەمپيوندارىن II دارەجەلى «بارىس» وردەنىمەن ماراپاتتادى. بۇل ناگرادانى بوكسشى دانيار ەلەۋسىنوۆ, جۇزگىش دميتري بالاندين مەن نيجات راxيموۆ الدى. سونىمەن بىرگە ەلباسى وسى وردەندى بوكستان وليمپيادانىڭ كۇمىس جۇلدەسىن العان ۆاسيلي لەۆيت پەن ادىلبەك نيازىمبەتوۆكە تاپسىردى.
نۇرسۇلتان نازارباەۆ ولاردىڭ كۇمىس مەدالى التىن جۇلدەمەن پارا-پار ەكەنىن, سوندىقتان كۇمىس جۇلدە وليمپيادا چەمپيونى اتاعىمەن تەڭەستىرىلەتىنىن ايتتى.
«وليمپيادادا بوكسشىلار ۆاسيلي لەۆيت پەن ادىلبەك نيازىمبەتوۆ لايىقتى ونەر كورسەتتى. سول سەبەپتى ولاردىڭ جۇلدەلەرى التىن مەدالدىڭ سىياقىسىمەن تەڭەستىرىلەدى», دەدى ول.
كەزدەسۋدە ەلباسى كۇمىس جۇلدەگەرلەر جازيرا جاپپارقۇل (اۋىر اتلەتيكا), ەلدوس سمەتوۆ (دزيۋدو), گۇزەل مانيۋروۆا (ايەلدەر كۇرەسى) مەن بوكستان قولا جۇلدەنى يەلەنگەن يۆان دىچكوعا «پاراسات» وردەنىن تابىس ەتتى. سونىمەن بىرگە مەملەكەت باسشىسى «قۇرمەت» وردەنىمەن قولا جۇلدەگەرلەر - دزيۋدوشى گالبادراx وتگونتسەتسەگ, زىلتەمىرشىلەر كارينا گوريچەۆا, الەكساندر زايچيكوۆ پەن فارxات حاركي, ەركىن كۇرەس شەبەرلەرى ەكاتەرينا لاريونوۆا مەن ەلميرا سىزدىقوۆانى جانە بوكسشى داريعا شاكىموۆانى ماراپاتتادى.
سالتاناتتى شارادا مەملەكەت باسشىسى سپورتشىلارىمىزدىڭ 270 ەلدىڭ اراسىندا 22-ءشى ورىندى يەلەنىپ, بارشا الەمنىڭ الدىندا ەلىمىزدىڭ ابىرويىن اسقاقتاتقانىن ايتتى.
«بيىلعى وليمپيادادا ەلىمىزدىڭ ءانۇرانى ءۇش رەت شىرقالىپ, كوك بايراعىمىز ءۇش مارتە كوتەرىلدى. بوكستان ۇلتتىق قۇرامانىڭ كاپيتانى دانيار ەلەۋسىنوۆ جەڭىس تۇعىرىنان كورىندى. ال ەلىمىزدىڭ تاريحىمىزدا العاش رەت جۇزگىش دميتري بالاندين التىن مەدالدى يەلەندى. مۇنداي تابىس ەلىمىزدە بۇرىن-سوڭدى بولعان جوق. مەنىڭ ويىمشا, ەندى جۇزۋگە قىزىعۋشىلىق تانىتقان بالالار كوبەيىپ, وليمپيادا چەمپيوندارىنىڭ سانى ارتادى. وليمپيادادا اۋىر اتلەت نيجات راحيموۆتىڭ ەڭبەگى لايىقتى باعالاندى», دەدى ول.
وسىدان كەيىن ەلباسى وليمپيادانىڭ كۇمىس جۇلدەگەرلەرى ادىلبەك نيازىمبەتوۆ پەن ۆاسيلي لەۆيتتىڭ ەڭبەگىن ايتا كەلىپ, ولاردىڭ جاھاندىق جارىستا كورسەتكەن ونەرىنە ريزاشىلىعىن ءبىلدىردى.
«ءبىز ەكى بوكسشىمىزدىڭ مەدالدارىن وليمپيادانىڭ التىن جۇلدەسى دەپ ساناۋىمىز كەرەك. وسىعان بايلانىستى ولاردىڭ جۇلدەسىن ىنتالاندىرۋ تۇرعىسىن العاندا التىن مەدالمەن تەڭەستىردىم», دەدى پرەزيدەنت.
سول سياقتى ول جەڭىل اتلەت ولگا رىپاكوۆانىڭ قولا مەدالىنە التىن جۇلدە رەتىندە باعالايتىنىن اتاپ ءوتتى.
«ولگا رىپاكوۆا وليمپياداعا جاقسى دايىندالدى. ول لوندوندا جانە ريو-دە-جانەيرودا وتكەن وليمپيادالاردىڭ اراسىندا شەكەسى تورسىقتاي ۇل تاپتى. قازىر بالاسى 3 جاستا. بىرىنشىدەن ول انا, ەكىنشىدەن ناعىز باتىر ايەل. ەكى ۇلكەن دودانىڭ اراسىندا جارىستارعا قاتىسىپ, بيىك بەلەستەردەن كورىنىپ ءجۇردى. بۇل سپورتشىنىڭ ءوز كاسىبىنە ادالدىعىن, ءوز ەلىنە دەگەن قىزمەتىن كورسەتەدى», دەدى.
ەلباسى ەلىمىز سپورتتىڭ باسقا تۇرلەرىنەن كۇمىس جانە قولا مەدال العان وتانداستارىمىزدىڭ ەڭبەگىن باعالايتىنىن, بولاشاقتا بۇدان دا بيىك بەلەستەردى باعىندىرۋلارىنا تىلەكتەستىگىن جەتكىزدى.
كەزدەسۋدە نۇرسۇلتان نازارباەۆ وليمپيادا چەمپيوندارى مەن جۇلدەگەرلەرىنە وزدەرى تۋىپ-وسكەن جەرلەرىندە دە سىي-قۇرمەتتىڭ كورسەتىلەتىنىن, دەگەنمەن وسى اتاق, قۇرمەتكە ماساتتانباي, بەلدىكتەرىن بۋىپ, الداعى جارىستارعا دايىندالىپ ءجۇرۋ كەرەكتىگىن ايتتى.
ماراپاتتاۋ راسىمىندە وليمپيادا چەمپيوندارى مەن جۇلدەگەرلەرىن ەلباسىنىڭ ەلىمىزدە سپورتتى دامىتۋدا جۇرگىزىلىپ جاتقان ساياساتىنا, جانكۇيەرلەردىڭ قولداۋىنا ريزاشىلىعىن ءبىلدىردى.
بيىلعى وليمپياداعا قازاقستان وسىمەن 6 رەت قاتىسىپ, جازعى جانە قىسقى وليمپيالىق وينىداردى ەسەپتەگەندە ەڭ كوپ جۇلدەگە يە بولدى. بارلىعى 17 مەدال ۇتىپ الدى. سونىڭ ىشىندە 3 التىن, 5 كۇمىس جانە 9 قولا جۇلدە بار.
داستان كەنجالين
فوتو: ەرلان وماروۆ