قازاقستان تاۋەلسىزدىگىنىڭ 25 جىلدىق مەرەيتويى اياسىندا سىر ءوڭىرى جۇرتشىلىعى داڭعايىر ديقان, ەكى مارتە سوتسياليستىك ەڭبەك ەرى ىبىراي جاقاەۆتىڭ 125 جىلدىعىن كەڭ كولەمدە اتاپ وتكەلى وتىر. بۇل ەلباسىنىڭ «جالپىعا ورتاق ەڭبەك قوعامىنا قاراي 20 قادام» اتتى ماڭىزدى قۇجاتىنان تۋىندايتىن ەل ازاماتتارىن ادال ەڭبەك پەن وتانعا دەگەن سۇيىسپەنشىلىگىن ارتتىرا تۇسەتىن, بىرلىك پەن ىنتىماققا شاقىراتىن ايتۋلى وقيعا بولماق. ناقتى كەزەڭدە ءدۇبىرلى تويعا دايىندىق ۇلكەن قارقىنمەن جۇرگىزىلىپ جاتىر. وسى ورايدا شيەلى كەنتى مەن ىبىراي اتا ءومىر ءسۇرىپ, ەڭبەك ەتكەن بۇرىنعى قىزىلتۋ اتاۋىنداعى اۋىلى قايتا جاڭعىرتىلادى. ەڭ باستىسى, ى.جاقاەۆ اتىنداعى كۇرىش ءوسىرۋ تاريحى مۇراجايىنىڭ جاڭا عيماراتى سول اۋىلدان بۇرىنعى ورنىنا قايتا تۇرعىزىلادى. بۇل اۋىلدىڭ ساۋلەتىنە كورىك قوساتىن تاماشا عيمارات بولعالى تۇر. ارينە, بۇل ەلدىڭ تويى, جۇرتتىڭ ەڭسەسىن بيىكتەتىپ, بىرلىگىن كورسەتەتىن, مەملەكەت باسشىسىنىڭ «ماڭگىلىك ەل» يدەياسىن جۇزەگە اسىراتىن كوپشىلىكتىڭ ىقىلاسىن ارتتىراتىن توي بولۋى ءتيىس.
ناقتى كەزەڭدە اۋدان ورتالىعىنداعى ورتالىق – مۇستافا شوقاي الاڭى قايتا جاڭعىرتىلۋدا, بۇداباي اتىنداعى ورتالىق مادەنيەت ءۇيى 43 ملن تەڭگەگە كۇردەلى جوندەۋدەن وتكىزىلۋدە. بۇل جۇمىستى «پرەستول» جشس جۇزەگە اسىرسا, العاباس, اقمايا جانە بالا بي اۋىلدارىنداعى اۋىلدىق مادەنيەت ۇيلەرى مەن كلۋبتارى دا جاڭاشا كەيىپكە ەنگىزىلمەك. بۇل ءۇشىن جەرگىلىكتى بيۋدجەتتەن جالپى 113 ملن تەڭگە قارجى قاراستىرىلعان ەكەن.
– «جاقسىدان – شاراپات» دەگەن حالقىمىزدىڭ ءسوزى بار عوي, ەل تاۋەلسىزدىگىنىڭ 25 جىلدىعى جانە اتاقتى ديقان اتامىز ىبىراي جاقاەۆتىڭ 125 جىلدىعىنىڭ مەرەيلى مەرەكەسى اۋدان جۇرتشىلىعىنا ەرەكشە سەرپىلىس بەردى. اتالمىش تويدى لايىقتى تابىستارمەن قارسى الۋ بارىسىندا شەتكى ەلدى مەكەن تۇرعىندارى ۇيىمشىلدىق تانىتىپ وتىر. بۇل حالىقتىڭ ورتاق ىسكە دەگەن بەلسەندىلىگىن جانە الداعى كۇندەرگە دەگەن ۇلكەن سەنىمىن بىلدىرەدى, – دەيدى ۇيىمداستىرۋ جۇمىسىنىڭ بەل ورتاسىندا جۇرگەن اۋدان اكىمىنىڭ ورىنباسارى الماسبەك ەسماحانوۆ.
شيەلى – وبلىسىمىزداعى كورىكتى دە كوكورايلى جەر. بۇرىنعى اسەم عيماراتتار قاتارىن سوڭعى جىلدارى تاعى ءبىر ادەمى ورىن تولىقتىردى. ول – ىبىراي جاقاەۆ اتىنداعى ساياباق. 2011 جىلى باستالعان بۇل ءىستىڭ باسىندا باعباندىقتىڭ مامانى, ارداگەر اعامىز پەردالى ارحاباەۆ ءجۇردى. بۇل كۇندەرى 10 گەكتار ساياباقتا 10 مىڭ تۇپتەن استام ءتۇرلى سايالى اعاش ءوسىپ تۇر. اسەم ءبىر كورىنىس, جاڭعا جايلى مەكەن. ورتادا قارا كەتپەندى قۇلاشتاي سوعىپ, جەر قىرتىسىن اۋدارعان قارا شال – ىبىراي اتامىزدىڭ ەسكەرتكىشى تۇر.
– ساياباعىمىز ناعىز دەمالىس ورنىنا اينالىپ كەلەدى. اۋدان باسشىلىعىندا بولعان جىگىتتەردىڭ قاي-قايسىسىنىڭ دا شيەلىنىڭ كورىكتەنۋىنە قوسقان وزىندىك ۇلەستەرى بار. مەرەيلى مەرەكە قارساڭىندا پاركتىڭ تاس توسەنىشتەرى اۋىستىرىلىپ جاتىر. سول سەكىلدى باسسەين مەن سۋبۇرقاق قايتا جاڭعىرتىلىپ, كوپشىلىكتىڭ مادەني دەمالىسىنا, بالالاردىڭ اسىر سالا ويناۋىنا جاعداي جاسالادى. باسقا دا ءتۇرلى اتتراكتسيوندار قويۋ جوسپاردا بار, دەيدى ارداگەر باعبان, وسى ساياباقتى ۇيىمداستىرۋشى پەردالى اعامىز ءوز سوزىندە. دەسە دەگەندەي, ساياباقتاعى اعاشتار مەن گۇلدەردى كۇتۋمەن, تازالىعى مەن باسقا دا شارۋالارىمەن 10 ادام كۇندەلىكتى شۇعىلدانۋدا. ياعني, اۋدان ورتالىعىنداعى مادەني ورىن ى.جاقاەۆ اتىنداعى ساياباقتىڭ كوركىنە كورىك قوسىلىپ, جايناي ءتۇسۋى ءۇشىن تولىققاندى جۇمىستار اتقارىلۋدا.
نۇرماحان ەلتاي
قىزىلوردا وبلىسى,
شيەلى اۋدانى