استانادا ۇلتتىق وليمپيادا كوميتەتىنىڭ پرەزيدەنتى تيمۋر ق ۇلىباەۆ پەن مادەنيەت جانە سپورت ءمينيسترى ارىستانبەك مۇحامەدي ۇلى وليمپيا ويىندارىنىڭ چەمپيوندارىمەن جانە جۇلدەگەرلەرىمەن كەزدەستى.
كەزدەسۋگە سپورتشىلارمەن بىرگە جاتتىقتىرۋشىلار, وليمپياداعا ەلىمىزدىڭ دەلەگاتسياسىنىڭ قۇرامىندا بارعان سپورت ماماندارى قاتىستى.
كەزدەسۋدە ۇوك پرەزيدەنتى مەن مادەنيەت جانە سپورت ءمينيسترى وتانداستارىمىزدى جەڭىستەرىمەن قۇتتىقتاپ, وليمپياداعا قاتىستى ءوز ويلارىن ورتاعا سالدى. وندا الدىمەن ۇلتتىق وليمپيادا كوميتەتىنىڭ باسشىسى ءسوز الىپ, سپورتشىلارعا ريزاشىلىعىن ءبىلدىردى.
– سىزدەردى وليمپيادانىڭ ءساتتى اياقتالعانىمەن قۇتتىقتايمىن. وليمپيادا ءبىزدىڭ سپورتشىلار ءۇشىن ەل نامىسىن ابىرويمەن قورعاپ, وتانسۇيگىشتىگىمىزدى كورسەتەتىن جارىس الاڭى بولدى. سپورتشىلارىمىزدىڭ جەڭىسى ەلىمىزدە سپورتتى دامىتۋدا ءتيىستى جۇمىستاردىڭ جاسالىپ جاتقانىن كورسەتتى. قازاقستان وليمپيادادا ەشقاشان 17 جۇلدە الىپ كورگەن ەمەس. سىزدەر جارىس الاڭىندا نامىسقا تىرىسىپ, وسى مەدالداردى جەڭىپ اكەلدىڭىزدەر, – دەدى ول.
وسىدان كەيىن مادەنيەت جانە سپورت ءمينيسترى ءسوز الىپ, سپورتشىلار مەن جاتتىقتىرۋشىلاردىڭ ەڭبەگىن, ۇلتتىق قۇرامانىڭ جارىسقا جاقسى دايىندالعانىن, سول ءۇشىن ۇلتتىق وليمپيادا كوميتەتى مەن جاتتىقتىرۋشىلاردىڭ وسى ىسكە باسىنان سوڭىنا دەيىن ارالاسقان باسقا دا سپورت ماماندارىنىڭ ەڭبەگىن باس بارماقپەن باعالايتىنىن ايتتى.
كەلەسى كەزەكتە ءسوز وليمپيادا چەمپيوندارى مەن جۇلدەگەرلەرىنە بەرىلدى. الدىمەن بوكسشى دانيار ەلەۋسىنوۆ مىنبەرگە شىعىپ, ۇوك پرەزيدەنتىنە وليمپيادادا عانا ەمەس, وعان دايىندىق كەزىندە دە كورسەتكەن قولداۋىنا العىس ءبىلدىردى. ودان كەيىن وليمپيادادا العان اسەرى تۋرالى جۇزگىش دميتري بالاندين دە ايتىپ بەردى.
– فينالدا ءجۇزىپ بولعاننان كەيىن, تابلوعا قاراسام, ەشنارسە تۇسىنبەدىم. قاتەلىك بولعان شىعار دەپ ويلادىم. سودان كەيىن عانا قۇرمەت تۇعىرىنا شىققاندا جەڭىسكە جەتكەنىمدى سەزىندىم. سول جەردە ەلىمىزدىڭ ءانۇرانى شىرقالىپ, كوك تۋىمىز كوتەرىلگەندە, بويىمدى بارلىق قازاقستان حالقى ءۇشىن ماقتانىش سەزىمى كەرنەدى. بۇل سەزىمدى جەتكىزۋ قيىن. قازاقستانعا سونداي سەزىمدى سىيلاعانىما قۋاندىم. جەڭىس تۇعىرىندا ەلىمىزدىڭ كوك بايراعىنىڭ وزگەلەردەن بيىك تۇرعانىن ماقتان تۇتتىم, – دەدى وليمپيادا چەمپيونى.
ايەلدەر كۇرەسىنەن كۇمىس جۇلدەگەر گۇزەل مانيۋروۆا دا وليمپياداداعى سپورتشىلارىمىزدىڭ جەڭىسى بۇكىل ەلىمىزدىڭ ورتاق جەڭىسى ەكەنىن اتاپ ءوتتى.
وسىدان كەيىن بوكستان ۇلتتىق قۇراما كوماندانىڭ باس جاتتىقتىرۋشىسى مىرزاعالي ايتجانوۆ ءسوز الىپ, جارىستا بولعان باسەكەلەستىك تۋرالى ايتتى.
جيىننىڭ سوڭىندا وليمپيادادا ءباسپاسوز ورتالىعىنىڭ جەتەكشىسى قىزمەتىن اتقارعان باقىتجان ورداباەۆ وليمپيادا جاڭالىقتارىن بەرىپ, رەپورتاج جاساعان جۋرناليستەردىڭ جۇمىسىن جوعارى باعالادى.
داستان كەنجالين,
«ەگەمەن قازاقستان»