ريو-دە-جانەيرو قالاسىندا تامىزدىڭ 5-ىنەن 21-ىنە دەيىنگى ارالىقتا كورىك قىزدىرعان XXXI جازعى وليمپيالىق ويىندار دا تارلان تاريحتىڭ تورىنە وزىپ, وتكەننىڭ ەنشىسىندە قالىپ بارادى. بۇل وليمپيادا ەلىمىز تاۋەلسىزدىك العان جىلداردان باستاپ دىڭگەگى تىك كوتەرىلگەن قازاق سپورتى تۋىنىڭ سول قالپىندا كوكتە سامعاپ تۇرعانىن كورسەتىپ بەردى.
ءبىزدىڭ ساڭلاقتارىمىز تاپ وسى ويىندار الدىندا ءبىرقاتار تاڭداۋلى, التىن ءجۇلدەنىڭ بىردەن-ءبىر ۇمىتكەرى سانالعان ۇزدىكتەرى سىرتتان كەلگەن سوققىنىڭ سالدارىنان قاتاردان شىعىپ قالعاندارىنا قاراماستان, بۇل الاماندا وزدەرىنىڭ ەلدىڭ نامىسى, وتاننىڭ ار-وجدانى جولىندا بارىن سارپ ەتە الاتىن ناعىز قاھارماندار ەكەندەرىن تانىتىپ شىقتى. سونىڭ ارقاسىندا قازاقستان قورجىنىنا 3 التىن, 5 كۇمىس جانە 9 قولا مەدال ءتۇستى. وسىلايشا 17 مەدالدى ەنشىلەگەن كوماندا مۇنىڭ الدىندا بەيجىڭدە ومىرگە كەلىپ, لوندوندا قايتالانعان رەكوردتىق دەڭگەيدەن 4 مەدال اسىپ ءتۇستى. مۇندا تەك التىن مەدال جونىنەن عانا مۇنىڭ الدىنداعى لوندون وليمپياداسىنان مەجەمىزدى ءتۇسىرىپ الساق, كۇمىس جانە قولا مەدالدار جونىنەن بۇرىن-سوڭدى بولماعان كورسەتكىشكە قول جەتكىزدىك. وسى باسىرەلى باسەكە الدىندا ەڭ قاتتى سوققىعا ۇشىراعان اۋىر اتلەتتەرىمىز شىن ءمانىندە دە ەرلىككە ءتان ارەكەت جاساپ, الەمنىڭ كىل مىقتى ءزىلتەمىرشىلەرى كۇش جارىستىرعان شايقاستا كوماندالىق بەسىنشى ورىنعا يە بولدى. قازاقستان سپورتشىلارى ساپىنان ءبىرىنشى التىن مەدالدى اكەلگەن دە وسى زىلتەمىر تارلاندارى بولدى. بۇل قالعان ساڭلاقتارىمىزعا ۇلكەن سەرپىن بەردى.
وسى ويىنداردا رەسپۋبليكا سپورتشىلارى ءبىرىنشى رەت سۋ سپورتى تۇرلەرىنەن جاي مەدال الىپ قانا قويعان جوق, ونىڭ چەمپيوندىق تۇعىردى سىيلايتىن التىن جۇلدەسىنە قول جەتكىزدى. مۇنىڭ سوڭىن بىلعارى قولعاپ شەبەرلەرى ءىلىپ اكەتتى. ولار ورتاق قازىناعا 1 التىن, 2 كۇمىس جانە 2 قولا مەدال اكەلىپ, بۇعان دەيىن وليمپيادالارداعى جالپى مەدالدار سانىنان ارتىق كورسەتكىش كورسەتتى. بالۋان قىزدارىمىزدىڭ ەرلىكتەرى ءوز الدىنا ءبىر توبە! جەڭىل اتلەتيكاداعى تابىستى جول تاعى جالعاسىن تاپتى.
وسىنىڭ ءبارى سپورتشىلارىمىزدىڭ ريو تورىندە ەلىمىزدىڭ جالاۋىن اسقاق جەلبىرەتىپ قايتقانىن كورسەتەدى.
ال بۇگىن استانادا وليمپياداشىلارعا قۇرمەت كورسەتۋ شاراسى وتكەلى تۇر.