كەشە «نۇر وتان» حدپ استانا قالالىق فيليالىندا قازاقستان رەسپۋبليكاسى پرەزيدەنتتىگىنە كانديدات ن.نازارباەۆتى قولداۋ جونىندەگى قالالىق قوعامدىق شتابتىڭ تۇساۋكەسەرى بولدى.
ول 12 اقپاندا قۇرىلعان رەسپۋبليكالىق قوعامدىق شتابتىڭ فيليالى بولماقشى. تۇساۋكەسەر ءراسىمىن «نۇر وتان» حدپ استانا قالالىق فيليالى توراعاسىنىڭ ءبىرىنشى ورىنباسارى, شتاب ءتوراعاسى ءامىرحان راحىمجانوۆ اشىپ, جۇرگىزىپ وتىردى. شتابتىڭ باستى ماقساتى پرەزيدەنتتىككە كانديدات, «نۇر وتان» حدپ توراعاسى نۇرسۇلتان نازارباەۆتىڭ سايلاۋ ناۋقانىنا بىرەگەي قولداۋ كورسەتۋ, ونىڭ سايلاۋالدى تۇعىرناماسىن ناسيحاتتاۋ ءجونىندەگى ۇگىت-ناسيحاتتىق ءىس-شارالار وتكىزۋ, دەدى ول ءوزىنىڭ كىرىسپە سوزىندە. بۇگىن شتاب مۇشەلەرىنىڭ ءبارىن جيناپ, جۇمىس جوسپارىمەن تانىستىرامىز. شتاب بولىمشەلەرىنىڭ, قوعامدىق جىلجىمالى قابىلداۋلاردىڭ قايدا بولاتىنى, بارلىق ورنالاسقان جەرلەرى بۇگىن ايتىلاتىن بولادى. 3 ناۋرىزدان باستاپ رەسمي تۇردەگى ناسيحات جۇمىستارى باستالاتىنى بەلگىلى. ءبىز سول ۋاقىتتان باستاپ حالىقپەن ءجيى كەزدەسىپ, ۇگىت-ناسيحات ءونىمدەرىن تاراتۋمەن قاتار, قابىلداۋلار وتكىزەتىن بولامىز.
استانا قالالىق قوعامدىق شتابىنىڭ قۇرامى 19 ادامنان تۇرادى. ولاردىڭ قاتارىندا پارتيا بەلسەندىلەرى, ارداگەرلەر, ەتنومادەني بىرلەستىكتەر, ۇەۇ باسشىلارى جانە ت.ب. بار. جۇمىسشى ورگانى التى بولىمنەن تۇرادى. سونىڭ ىشىندە ۇيىمداستىرۋ, زاڭگەرلىك, قارجىلىق, ماتەريالدىق-تەحنيكالىق قامسىزداندىرۋ, باسپاسوز جانە قوعامدىق قابىلداۋ ءبولىمدەرى بار. بۇگىنگى تاڭداعى قىزۋ جۇمىس ن.نازارباەۆتىڭ پرەزيدەنتتىككە كانديداتتىعىن قولداۋعا قول جيناۋ بولىپ وتىر ەكەن. شتاب توراعاسىنىڭ ايتۋىنا قاراعاندا, قالادان 20 مىڭنان ارتىق قول جينالۋعا ءتيىستى. ودان ءارى پرەزيدەنتتىككە كانديداتتىڭ سەنىمدى وكىلدەرىن ىرىكتەۋ, پارتيانىڭ سايلاۋ ۋچاسكەلەرىندەگى باقىلاۋشىلارىن انىقتاۋ جانە ت.ب. تولىپ جاتقان شارالار كەتەدى.
مىنە, وسىنداي كوزگە كورىنبەسە دە, ماڭىزى زور قىرۋار شارۋامەن شتاب قىزۋ اينالىساتىن بولادى.
جاقسىباي سامرات.