جاستار: اپتا ايشىقتارى

وندا م.-ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ ستۋدەنتى ف.جارقىنبەكوۆا, تاراز مەملەكەتتىك پەداگوگيكالىق ۋنيۆەرسيتەتىنىڭ ستۋدەنتى ءا.مۇساباي جانە «جاستار اۆياتسيا ورتالىعى» اق كۋرسانتى يا.سەمەردجيدي ەل جاستارىنىڭ الاڭسىز ءبىلىم الىپ, بىلىكتى مامان اتانۋىنا ۇنەمى قامقورلىق جاساپ كەلە جاتقان مەملەكەت باسشىسىنا دەگەن ۇرپاق العىسىن ريزاشىلىقپەن پاش ەتتى. زامانا اۋانىنا وراي قىزىقتى كونتسەرتپەن باستالعان اكتسيا وبلىستاعى بارلىق وقۋ ورىندارى ستۋدەنتتەرىن ەلباسى جولداۋىنان تۋىندايتىن مىندەتتەردى جۇزەگە اسىرۋعا ءبىر كىسىدەي اتسالىسۋعا شاقىرعان ۇندەۋ قابىلداۋمەن اياقتالدى.

كوسەمالى ساتتىباي ۇلى. جامبىل وبلىسى. 

تازالىق – اركىمنىڭ باستى مىندەتى. اتىراۋ قالاسى مەن وعان ىرگەلەس ەلدى مەكەندەردىڭ سانيتارلىق تازالىعى ۇنەمى ساقتالا بەرمەيدى. سەس ماماندارى ۇنەمى دابىل قاعادى. وسىعان وراي وتكەن اپتادا وبلىس اكىمىنىڭ تاپسىرماسىمەن وبلىستىق شتاب قۇرىلدى. قالا اۋماعىنا قاراستى وكرۋگتەر تازالىعىن قاداعالايتىن ارنايى توپتار ىسكە كىرىسىپ, تازالىقتى ساقتاۋعا ءاربىر تۇرعىننىڭ مىندەتتى ەكەنى تۇسىندىرىلۋدە. تەكسەرۋ بارىسىندا گەولوگ, جۇمىسكەر, بالىقشى وكرۋگتەرىندە تازالىقتىڭ ناشارلىعى انىقتالدى. وسىعان وراي كىنالىلەرگە 516 ەسكەرتۋ بەرىلىپ, 46 رەت ايىپپۇل سالىندى.

جولداسبەك شوپەعۇل. اتىراۋ وبلىسى. 

ۆيلگەلم – سپورت دەمەۋشىسى. وتكەن اپتادا قاشىر اۋدانىنىڭ ورتالىعى – تەرەڭكول اۋىلىندا قىزدار اراسىندا ۆولەيبولدان جارىس بولىپ ءوتتى. بۇل جارىسقا وبلىستىڭ اۋداندارىنان كەلگەن بىرنەشە كوماندا قاتىستى. سپورت مەرەكەسى اۋىل سپورتشىلارىنا دەم بەرگەندەي. اۋدان كومان­دالارىنىڭ بارلىعى دا ەلىمىزدە وتەتىن جارىستاردىڭ جەڭىم­پازدارى كورىنەدى. قازىر ولار ناۋرىز ايىندا شىمكەنت قالاسىندا وتەتىن تۋرنيرگە دايىندالۋدا. ءسويتىپ, ءبىرىنشى ورىندى تەرەڭكولدىكتەر, ەكىنشى ورىندى لەبياجىلىكتەر, ال ءۇشىنشى ورىندى پاۆلودار اۋدانىنىڭ كومان­دالارى يەلەندى. ۆولەيبولشىلار بۇل جارىستىڭ وتۋىنە سەبەپكەر بولعان «ۆيلگەلم» شارۋا قوجالىعىنا ىرزالىقتارىن ءبىلدىردى.

فاريدا بىقاي. پاۆلودار وبلىسى.

ەڭ ۇزدىك پوليتسيا قوسىنى. پەتروپاۆل قالاسىنداعى №12 ۋچاسكەلىك تىرەك پۋنكتى ىشكى ىستەر مينيسترلىگى وتكىزگەن «قالالىق جانە اۋىلدىق جەرلەردەگى ۇزدىك ۋچاسكەلىك پوليتسيا قوسىنى – 2010» رەسپۋبليكالىق بايقاۋىندا ءبىرىنشى ورىندى يەلەندى. 20 شاعىن اۋداندا ورنالاسقان پوليتسيا قوسىنى 30 مىڭنان استام تۇرعىنعا قىزمەت كورسەتەدى. مۇندا كاسىبي بىلىكتىلىگى جوعارى جەتى پوليتسەي جۇمىس ىستەيدى. بىلتىر ولار ءتۇرلى قىلمىستاردىڭ ءىزىن سۋىتپاي اشۋمەن قاتار, الدىن الۋدا, سان الۋان تۇسىنىك جۇمىستارىن جۇرگىزۋدە دە ءوز جۇمىستارىن تيىمدىلىكپەن ات­قارا ءبىلدى. اۋىر قىلمىستار دا تولىق اشكەرەلەندى. ەندى, مىنە, قالالىق جەر­لەر­دەگى پوليتسەيلەر اراسىندا توپ جارىپ, ماقتاۋلىلار قاتارىنا قوسىلىپ وتىر.

ءومىر ەسقالي. سولتۇستىك قازاقستان وبلىسى. 

كوللەدجدە جاڭالىق كوپ. سەمەيدە سپورت كوللەدجىنىڭ اشىلىپ, جۇمىس ىستەي باستاعانىنا ونشاقتى جىل بولدى. سوندىقتان ونى مۇنداعىلار تاۋەلسىزدىك كوللەدجى دەسەدى. ويتكەنى, كەشەگى كەڭەس زامانىنىڭ جەتپىس جىلدىق تاريحىندا مۇنداي ارنايى سپورت وقۋ ورنىنا قول جەتكىزۋ مۇمكىن بولماعانى راس قوي. قازىردە مۇندا 250-گە جۋىق وقۋشى وقيدى. جۋىردا اتالعان وقۋ ورنىندا جاڭا جاتتىقتىرۋ زالى اشىلدى. جاڭا زال سپورت قۇرال-جابدىقتارىمەن جەتكىلىكتى قامتاماسىز ەتىلگەن. وندا ءبىر مەزگىلدە وتىزعا جۋىق جاس تالاپ جاتتىعا الادى. كۇنى ەرتەڭ-اق بولاشاق ازيا, الەم چەمپيوندارى وسى تاۋەلسىزدىك كوللەدجىنەن شىقپاسىنا كىم كەپىل!؟

داۋلەت سەيسەن ۇلى. سەمەي. 

ەسىك اشقان اۋىل كلۋبتارى. زەرەندى اۋدانىنىڭ ورتاعاش اۋىلى ءبىر كۇندە قۇلپىرىپ شىعا كەلدى. مۇندا ون بەس جىلدان كەيىن مادەنيەت وشاعى سالتاناتتى جاعدايدا جۇمىسىن باستادى. اۋداندىق ءماسليحات حاتشىسى قايرات اۋعاليەۆ وسىناۋ قۋانىشتى وقيعانىڭ باستى قاھارمانى اۋىل اقساقالى جەڭىس حاسەنوۆ ەكەندىگىن اتاپ ءوتتى. زەينەتكەر اعامىز ەسكى كلۋب ءۇيىنىڭ ەسىك-تەرەزەسى مەن كىرپىش­تەرىنىڭ كىم كورىنگەننىڭ قولىندا كەتپەۋىن قاداعالاپ, ۇنەمى باقىلاپ وتىرعان كورىنەدى. ول كىسىنىڭ ءتيىستى جەرلەرگە جازعان وتىنىشتەرى قاناعات­تاندىرىلىپ, نەبارى ەكى ايدىڭ ىشىندە ماڭىزدى نىسان قاتارعا قوسىلدى. جوندەۋ جۇمىستارىنا 2 ميلليون تەڭگە جۇمسالعان.

باقبەرگەن امالبەك. اقمولا وبلىسى.

تانىمال سۋرەتشىنى ەسكە الدى. ورالدىق قىلقالام شەبەرى, مارقۇم ساكەن عۇماروۆتىڭ ءتولتۋما تۋىندىلارى ەڭ العاش تاياۋ جانە الىس شەتەلدەردە مويىندالىپ, باعالانعان ەدى. تەك سودان كەيىن عانا ونىڭ ولمەس مۇراسى قازاقستاندىق قاۋىمنىڭ جۇرەكتەرىنەن ورىن الا باستاعان-تىن. ءتىرى بولسا وسى ءبىر كۇندەردە ول 74 جاسقا تولار ەدى. س.عۇماروۆتىڭ وسى داتاعا وراي ورالداعى مۇراجايىندا ءوزىنىڭ ەسىمىن يەلەنگەن سۋرەت مەكتەبى وقۋشىلارىنىڭ كورمەسى وتكىزىلدى. ولارعا ساكەن عۇماروۆتىڭ جارى گۇلسارا ۋاليقىزى ەستەلىكتەر ايتىپ, بەينەلەۋ ونەرى حاس شەبەرىنىڭ كارتينالارىنا قاتىستى قويىلعان سۇراقتارعا جاۋاپتار قايتاردى.

تەمىر قۇسايىن. ورال.