«تابيعات» ەكولوگيالىق قورىنىڭ جەتەكشىسى مەلس ەلەۋسىزوۆكە پرەزيدەنتتىككە تالپىنۋ تاڭسىق ەمەس. ول وسىعان دەيىن, ياعني 2005 جىلى دا ءوز كانديداتۋراسىن ۇسىنىپ, 0,28 پايىز داۋىس جيناعان بولاتىن.
جىعىلعان جۇدىرىققا تويمايدى دەگەندەي, ەكولوگيا ماسەلەسىن اندا-ساندا ەسكە ءتۇسىرىپ جۇرەتىن ەلەۋسىزوۆ مىرزا كەزەكتى رەت پرەزيدەنتتىك سايلاۋعا تۇسكەلى وتىر. جۇما كۇنى ول بۇل نيەتىن رەسمي تۇردە مالىمدەسە, كەشە الماتىداعى ۇلتتىق ءباسپاسوز ورتالىعىندا جۋرناليستەرمەن كەزدەستى.
ول وسىدان ساناۋلى كۇندەر بۇرىن عانا 2011 جىلى پرەزيدەنتتىك سايلاۋعا قاتىسپايمىن دەپ ءمالىم ەتكەن بولاتىن. ەلەۋسىزوۆ باق بەتتەرىندە بەرگەن سۇحباتىندا ساياساتتان الدەقاشان كەتكەنىن جانە وندا «قاراجاتى مەن ادامداردىڭ قولداۋى جوق» ەكەندىگىن مالىمدەگەن ەدى. ەندى مىنە, اياق استىنان سايلاۋدا باق سىنايتىن بولىپ وتىر.
ەلەۋسىزوۆ مىرزا باق وكىلدەرىمەن ءباسپاسوز ءماسليحاتىن بىردەن سۇراق-جاۋاپتان باستادى. زامانا قانشا دەگەنمەن وزگەرىپ جاتىر, بۇرىنعى سايلاۋعا قاراعاندا, باعدارلاماسى ءوزگەرگەن بولار دەگەن ءدامەمىزدەن تۇك شىقپادى. بۇرىنعى باعدارلاماسى جۇمىس ىستەپ جاتپاعانىن العا تارتقان كانديدات قولىنداعى باعدارلاماسى تۋرالى دا ەشتەڭە بايانداي قويمادى. ارىپتەستەرىمىزدىڭ وسى جولعى سايلاۋدان قانشا داۋىس الاتىندىعى تۋرالى سۇراقتارى دا جاۋاپسىز قالدى. جالپى «ەسكى دە جاڭا كانديدات» جۋرناليستەردىڭ بارلىق ساۋالدارىنا سىرعىتپا جاۋاپتار بەرىپ وتىردى دەسە دە بولادى. بىرەسە ەلىمىزدە دەموكراتيا بار, بىرەسە جوق, دەپ وتىرعان ەلەۋسىزوۆ مىرزانىڭ ساياسات تۋرالى پىكىرلەرى دە ەكىۇشتى. ساياسات – بۇل سپەكتاكل, – دەگەن ەلەۋسىزوۆ ەندى بىردە, پرەزيدەنت بولۋ جەڭىل جۇمىس ەمەس, ول ءۇشىن كوپ ەڭبەك ەتۋ كەرەك, دەگەن جالپىلاما ءسوز ايتادى.
ساياساتتى جاقسى بىلەمىن دەگەن ول ەندى بىردە, تابيعاتتى دا جاقسى بىلەمىن دەپ ءوزىنىڭ ەسكى جىرىنا اۋىسادى. ايتقانداي, ەكولوگيا ءماسەلەسىمەن جيىرما جىلداي اينالىسقان ەلەۋسىزوۆ قوقىس, تۇرمىستىق قالدىقتار ماسەلەسىن دە ءبىراز قاۋزاعان بولاتىن. جۋرناليستەردىڭ ونىڭ ەكولوگيا سالاسىندا وسى جىلدار ارالىعىندا ناقتى اتقارعان شارۋالارىن بىلمەك بولعان ارەكەتى دە ىسكە اسپادى. ءبىزدىڭ ۇققانىمىز, ەلەۋسىزوۆ كوتەرگەن ماسەلەلەر ءالى شەشىمىن تاپپاعان, جاساعان ۇسىنىستارى جوبا تۇرىندە قالىپ تۇر.
ول مەملەكەتتىك ءتىلدى قاي ءدارەجەدە بىلەسىز دەگەن ساۋالعا جامان ەمەس دەپ جاۋاپ بەردى. دەگەنمەن, وتكەن جىلى بىرنەشە وبلىستى ارالاپ قايتقان ەلەۋسىزوۆ ەلدىڭ جاعدايىن بىلەتىن بولىپ شىقتى. ءالى كۇنگە دەيىن ناقتى باعدارلاماسى جوق, ءالى وسك-عا بارىپ, بۇكىل تالاپ-تىلەكتەرمەن تولىق تانىسىپ تا ۇلگەرمەگەن كانديداتتىڭ ساناۋلى ايدىڭ ىشىندە سايلاۋ الدى كومپانيالارى مەن ۇگىت-ناسيحات جۇمىستارىن قالاي جۇرگىزەرى بەلگىسىزدەۋ.
قىسقاسى, وتكەن سايلاۋدا دا پرەزيدەنتتىك ورىننىڭ اۋىلى الىستا بولعاندىعىن بىلە تۇرا قاتىسقان ەلەۋسىزوۆ ءسوزى مىناعان سايادى:
– پرەزيدەنتتىك سايلاۋعا ءتۇسۋ ارقىلى تابيعات, ەكولوگيا ماسەلەلەرىن كەڭىنەن كوتەرۋگە مۇمكىنشىلىك بولاتىنىن بۇرىننان ايتىپ كەلەم. وتكەن سايلاۋدا بىرقاتار ماسەلەلەردى كوتەرىپ, ولاردىڭ شەشىلۋىنە قول جەتكىزە الدىم. تابيعات تا ءۇلكەن ساياسات, سوندىقتان ودان تىس قالعىم كەلمەيدى. قازىر دۇنيە ءجۇزىندە ۇلكەن اپاتتار ورىن الىپ جاتىر, اۋا رايى وزگەرۋدە, سول سەبەپتەن قول قۋسىرىپ وتىرا المايمىن.
سونداي-اق, ول دەموكراتيالى ەل بولعاندىقتان, ۇمىتكەر رەتىندە قاتىسۋعا قۇقىلى ەكەندىگىن ايتادى. «مەن پرەزيدەنتتىكە وتەم بە, ءوتپەيمىن بە, ول مەنى مازالامايدى. مەن دەموكراتيالى ەلدىڭ ازاماتى رەتىندە ءوزىمدى ۇسىنامىن. ءبىزدىڭ قوعامنىڭ كەمشىن تۇسى بار. ول – حالىقتىڭ سايلاۋعا نەمقۇرايلى قاراۋى. ءۇمىتكەرلەر ۇناۋ, ۇناماۋى ماڭىزدى ەمەس, باستىسى – دەموكراتيالى ەلدىڭ ازاماتى رەتىندە سايلاۋعا قاتىسىپ, ءوز ءۇنىڭدى ءبىلدىرۋ», – دەيدى ۇمىتكەر.
ايناش ەسالي.
الماتى.