ەلباسى بيىلعى حالىققا جولداۋىندا دا, ودان كەيىنگى «نۇر وتان» حالىقتىق-دەموكراتيالىق پارتياسىنىڭ كەزەكتى ءحىىى سەزىندە دە جاس ۇرپاققا ءبىلىم بەرۋ ماسەلەسىنە ەرەكشە نازار اۋداردى. اسىرەسە, ءبىزدى قاناتتاندىرعان ءبىر ماسەلە, 2016 جىلعا قاراي ءبىلىم بەرۋگە جۇمسالاتىن شىعىن ءىجو-ءنىڭ 5 پايىزىنا دەيىن جوعارىلايتىنى بولىپ وتىر. سونىمەن قاتار, ءبىلىم بەرۋدىڭ ءتيىمدى جولىن قاراستىرۋ ماسەلەسى دە العا مىندەتتەلگەن.
وسى ءبىلىم ساپاسىن كوتەرۋ جونىندە قولعا الىنىپ, قازىر جۇمىس ىستەي باستاعان ينتەللەكتۋالدى 5 مەكتەپتىڭ قاتارىندا ءبىزدىڭ استانا قالاسىندا حيميا-بيولوگيا باعىتىنداعى نازارباەۆ زياتكەرلىك مەكتەبى دە بار. بۇل ءبىلىم ۇياسى وتكەن جىلدىڭ قىركۇيەك ايىندا عانا ءوز جۇمىسىن باستاعان ەدى. مەكتەپتىڭ نەگىزگى اتقاراتىن باعىت-باعدارى تۋرالى ايتار بولسام, بىرىنشىدەن, دۇنيەجۇزىلىك ساپا مەن ەڭبەك رەسۋرستارىنداعى ءبىلىمنىڭ وتىمدىلىگى, ەكىنشى – جەكە-دارا ءبىلىم مەن دەربەس قابىلەتتەردى باعالاۋ, ۇشىنشىدەن, جاراتىلىستانۋ-ماتەماتيكا باعىتتارىنداعى پاندەردى تەرەڭدەتىپ وقىتۋ ارقىلى بەيىندى ءبىلىم بەرۋدى قالىپتاستىرۋ, تورتىنشىدەن, ۇشتۇعىرلى ءتىل ۇلگىسىن ىسكە اسىرۋ, بەسىنشىدەن, اقپاراتتىق-كوممۋنيكاتسيالىق تەحنولوگيالاردى ەنگىزۋ. زياتكەرلىك مەكتەپتەر وسى ماقساتتى مۇلتىكسىز ورىنداي وتىرىپ, الەمدىك ءبىلىم كەڭىستىگىنە شىعۋدى قولعا الۋدا.
سول سەكىلدى مەكتەپ پەن جوعارى وقۋ ورىندارىنىڭ اراسىنداعى بايلانىستى نىعايتۋ, جوبالىق جانە زەرتتەۋ جۇمىستارىن ءدايىم جۇرگىزىپ وتىرۋ باستى نازاردا. ءبىز پروفيلدىك پاندەر بويىنشا مۇعالىمدەردىڭ قىزمەتتەرىن جۇيەلى ۇيىمداستىرىپ وتىرۋ ءۇشىن جاراتىلىستانۋ باعىتىنداعى كافەدرالار قۇردىق. ول نەگىزىنەن حيميا جانە بيولوگيا پاندەرى مۇعالىمدەرىن حالىقارالىق دەڭگەيدەگى عىلىمي-ادىستەمەلىك جۇيە بويىنشا وقۋدى قالىپتاستىرۋ بولىپ تابىلادى. سول سەكىلدى وتانىمىزداعى بيولوگيا-حيميا سالاسىندا جۇمىس ىستەپ كەلە جاتقان بەلدى مەكەمەلەرمەن بايلانىستى كۇشەيتە باستادىق. ولاردىڭ قاتارىندا: ەلىمىزدەگى جەتەكشى عىلىمي ورتالىق بولىپ سانالاتىن «ۇلتتىق بيوتەحنولوگيالار ورتالىعى» رمم, ءبىلىم جانە عىلىم مينيسترلىگىنىڭ عىلىم كوميتەتى مەن شورتاندىداعى ا.باراەۆ اتىنداعى استىق ءوندىرۋ شارۋاشىلىق ورتالىعى, تاعى باسقالار بار.
قازىر ءبىزدىڭ مەكتەپ وقۋشىلارى ءوز وتانىمىزدا وتكەن ءبىلىم سايىستارىنا قاتىسىپ, جۇلدەگەرلەر قاتارىنان كورىنىپ كەلەدى. ونداي تالانتتى وقۋشىلارىمىز ل.ءاليمانوۆا, ا.مۇقاشەۆا, د.تالعاتوۆ, ا.التاەۆ, م.سايدۋللا, ە.قايرۋللاەۆ, ب.تۇرتكارين, ءا.تۇرماحانوۆ, ءا.مامەت. ءبىز وقۋشىلارعا تەك اكادەميالىق ءبىلىم بەرىپ قانا قويماي, ەلىن قادىرلەيتىن, مەملەكەتىن قۇرمەتتەيتىن تۇلعا بولىپ قالىپتاسۋىنا سەپتىگىن تيگىزەتىن داعدىلار مەن مادەنيەتتەردىڭ وزىق ۇلگىلەرىن دە ۇيرەتىپ وتىرامىز.
جالپى, زياتكەرلىك مەكتەپتەردىڭ ءبىر ۇلكەن ەرەكشەلىگى, مۇندا ءار ءپان تەرەڭدەتىلىپ وقىتىلۋمەن بىرگە, ونىڭ ناتيجەسىن دەر كەزىندە باعالاپ وتىرۋ نەگىزگى مىندەتىمىز سانالادى. دارىندى بالانىڭ تالانت كوزىن اشۋ ءۇشىن ساباق بەرىپ قويۋ ءوز الدىنا, ونىمەن جۇمىس ىستەۋ, جان دۇنيەسىن ءتۇسىنىپ, وي-ءورىسىن ءوسىرۋ ماسەلەسى ءبىرىنشى كەزەكتە تۇرۋى ءتيىس. ال مەكتەپ پەن اتا-انانىڭ اراسىنداعى بايلانىس – بۇل ۇلكەن جاۋاپكەرشىلىككە جەتەلەيتىن ءىس. سوندىقتان دا بولار, پرەزيدەنتتىڭ پارتيا سەزىندە اتا-انالارعا ارنايى قايىرىلىپ, ءبىلىم بەرۋ مەن تاربيەنى قاتار جۇرگىزۋ ءار ازاماتتىڭ پارىزى, دەپ «بالانىڭ باس ۇستازى – اتا-انا» دەگەن بايلامعا توقتاۋى بولىپ تابىلادى.
عاليا سىزدىقوۆا, حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ ديرەكتورى.
استانا.