كەشە استاناداعى «استانا-ارەنا قاجىمۇقان» سپورت كەشەنىندە «استانا» مەن شوتلانديانىڭ «سەلتيك» كوماندالارى اراسىندا ەۋروپا چەمپيوندار ليگاسى ءۇشىنشى ىرىكتەۋ راۋندىنىڭ ءبىرىنشى ماتچى ءوتىپ, ويىن 1:1 ەسەبىمەن تەڭ اياقتالدى.
بىردەن ايتىپ قويايىق, كەزدەسۋدىڭ ونە-بويىندا الاڭ يەلەرىنىڭ باسىمدىلىقتارى انىق بايقالىپ تۇردى. ولار ويىن تىزگىنىن دە الدىمەن قولعا الدى, ماتچتىڭ ەسەبىن دە ءبىرىنشى بولىپ اشتى. ءبىزدىڭ جەرلەستەرىمىز ۋاقىت ۇزاعان سايىن قارسى قاقپا جاققا جاساعان قىسىمىن كۇشەيتە ءتۇستى. سونىڭ اقىرى 19-مينۋتتا ويىنداعى ءبىرىنشى گولعا الىپ باردى. اۋەلى سول جورىقتار ساتىندە قوناقتار ايىپ الاڭى ىشىندە جۋنيور كابانانگا وتە قولايلى جەردەن ءمۇلت كەتتى. سول دوپتى گلازگولىقتار قورعاۋشىسى قاقپا سىرتىنا قاراي تەۋىپ جىبەرگەننەن كەيىن بۇرىشتاما بەرىلدى. ونى ورىنداعان پاتريك تۆۋماسي دوپتى قاقپاشى الاڭى ىشىندە تۇرعان يۋري لوگۆينەنكوعا ءدال جەتكىزدى. ول دوپتى باسىمەن قاتتى ۇرىپ, قاقپاعا توعىتتى.
استانالىقتاردا بۇدان كەيىن دە ەسەپتى ۇلعايتۋدىڭ بىرنەشە مۇمكىندىگى بولدى. سولاردىڭ بىرىندە ايىپ الاڭى ىشىندە قاقپاشىمەن بەتپە-بەت كەلگەن ازات نۇرعاليەۆتىڭ ۇرعان دوبىن گولكيپەر كرەيگ گوردون ارەڭ قايىرىپ, بۇرىشتاماعا اسىرىپ ۇلگەردى. مۇنىڭ سوڭىنان ءبىزدىڭ جەرلەستەرىمىز تاعى بىرنەشە رەت بۇرىشتاما بەرۋ قۇقىعىنا يە بولدى. بىراق سولاردىڭ باسىم كوپشىلىگىندە تۆۋماسي دوپتى ءدال الدىڭعىداي ەتىپ قاقپا الاڭىنا قاراي جەتكىزىپ بەرە الماي, ولار قوناقتار قورعاۋشىلارىنىڭ وڭاي ولجالارىنا اينالىپ كەتىپ جاتتى.
ەكىنشى تايمنىڭ باس جاعىندا استانالىقتار باسىم كورىنگەنىمەن, قوناقتار ءبىرازدان كەيىن الاڭداعى جاعدايدى تەڭەستىرۋگە قول جەتكىزدى. سول مەزەتتەردە ولار باتىل شابۋىلعا دا شىعا باستادى. وسى قارسى شابۋىلدار 78-مينۋتتا مەيمانداردى جاۋاپ دوپ سوعۋعا جەتكىزدى. بۇعان ءبىزدىڭ قاقپا الاڭىندا ءتورت بىردەي ويىنشىنى الداپ وتكەن پاتريك روبەرتس كوپ ەڭبەك ءسىڭىردى. ونىڭ الاڭ ورتاسىنا قاراي تاستاعان دوبىن سول ساتتە لي گريففيتس توقتاتپاستان قاقپاعا قاراي تەپتى. ءوزىنىڭ سول ءبۇيىرى جاعىنان زۋ ەتە قالعان دوپقا نەناد ەريچ توسقاۋىل قويا المادى. گول! ەسەپ وسىلاي تەڭەستى.
بۇدان كەيىن «استانا» جايداق اتقا قونىپ, تاعى ءبىراز قارسىلاستار الاڭىنا قاراي جوڭكىلە ۇمتىلدى. سول مەزەتتەردە بىرنەشە رەت العا شىعۋدىڭ مۇمكىندىكتەرى بولدى. بىراق ءبىزدىڭ فۋتبولشىلار ودان ءتيىمدى ناتيجە شىعارا المادى. ماتچتىڭ سوڭعى سەكۋندتارىندا مارين انيچيچ ءدال سونداي كەرەمەت مۇمكىندىكتى بوسقا جىبەرىپ قويدى.
ەندى كوماندالار ءبىر اپتادان كەيىن شوتلانديانىڭ استاناسى – گلازگودا قارىمتا ماتچ وتكىزەدى. ونىڭ قورىتىندىسى بويىنشا كەلەسى كەزەڭگە وتەتىن كوماندا بەلگىلى بولادى. «استانا» ءۇشىن بۇل كەزدەسۋدە كەمىندە 2:2 ەسەبىمەن تەڭ ويناۋ نە قانداي دا ءبىر ەسەپپەن ۇتۋ كەرەك.
دامير قوجامقۇل
سۋرەتتى تۇسىرگەن
ەرلان وماروۆ